ທ່ານ ດຣ. ບຸນກອງ ສີຫາວົງ ລັດຖະມົນຕີ ກະຊວງ ສາທາລະນະສຸກ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 27 ມັງກອນ 2021 ນີ້ວ່າ: ໃນທ່າມກາງບັນຍາ ກາດການກະກຽມ ຂະບວນການເລືອກຕັ້ງຢ່າງຟົດຟື້ນ ຂອງຜູ້ລົງສະໝັກເລືອກຕັ້ງ ແລະ ປະຊາຊົນຜູ້ທີ່ມີສິດເລືອກຕັ້ງ, ພ້ອມທຸກພາກສ່ວນຕ່າງ ກໍພວມສຸມໃສ່ປະກອບສ່ວນ ໃຫ້ແກ່ເລືອກຕັ້ງສະມາຊິກສະພາ ຊຸດທີ IX, ສະມາຊິກ ສະພາປະຊາຊົນຂັ້ນແຂວງ ແລະ ນະຄອນຫລວງວຽງຈັນ ຊຸດທີ II ທີ່ຈະຈັດຂຶ້ນໃນເດືອນກຸມພາ 2021 ທີ່ຈະມາເຖິງນີ້ ຢ່າງເປັນຂະບວນ ຟົດຟື້ນນັ້ນ.

ສໍາລັບທີມນັກຮົບເສື້ອຂາວ ຂອງພວກເຮົາ ແມ່ນໄດ້ກຽມພ້ອມແລ້ວ ເພື່ອປະກອບສ່ວນຮັບໃຊ້ ຕໍ່ການເລືອກຕັ້ງ ດັ່ງກ່າວ, ໂດຍສະເພາະ ແມ່ນໄດ້ຈັດທີມແພດ ທີ່ຢູ່ແຕ່ລະແຂວງ ໃຫ້ຈັດຕັ້ງກັນລົງໄປ ຢູ່ແຕ່ລະເມືອງ ແລະ ແຕ່ລະຈຸດຂອງການ ເລືອກຕັ້ງ ໃນຂອບເຂດທົ່ວປະເທດ. ປັດຈຸບັນ, ກະຊວງສາທາລະນະສຸກ ພວກເຮົາ ແມ່ນໄດ້ເລີ່ມແຈກຢາຍ ເຄື່ອງປ້ອງກັນໂຕເອງ ລົງໄປໃຫ້ແຕ່ລະ ແຂວງແລ້ວ ເປັນຕົ້ນ ຜ້າອັດ ປາກ-ດັງ ພ້ອມກັບເຈວລ້າງມື. ສະເພາະຢູ່ສູນກາງພວກເຮົາ ກໍໄດ້ກະກຽມທີມແພ ດຫລາຍຮ້ອຍຄົນ ໄວ້ຢູ່ຫລາຍຈຸດ ຂອງການເລືອກຕັ້ງ ເພື່ອຮັບໃຊ້ ໃຫ້ແກ່ການ ເລືອກຕັ້ງໃນຄັ້ງນີ້ ເຫັນວ່າທີມແພດຂອງພວກເຮົາມີພຽງພໍ.

ທ່ານ ດຣ. ບຸນກອງ ສີຫາວົງ ກ່າວຕື່ມວ່າ: ການເລືອກຕັ້ງຄັ້ງນີ້, ຖືເປັນວຽກງານທີ່ສໍາຄັນ ເພາະການເລືອກຕັ້ງ ສະມາຊິກສະພາ ແຫ່ງຊາດ, ເຊິ່ງມັນໄດ້ເວົ້າເຖິງປະຊາທິປະໄຕ, ເວົ້າເລື່ອງສິດເປັນເຈົ້າຂອງປະເທດຊາດ. ສະນັ້ນ, ພວກເຮົາໝົດທຸກຄົນ ຈະຕ້ອງໄດ້ເຂົ້າຮ່ວມ. ແພດໝໍຈະຕ້ອງຖື ວ່າການເລືອກຕັ້ງນີ້ ມີຄວາມສຳຄັນຫລາຍ ມີໜ້າທີ່ໄປຮັບໃຊ້ ແລະ ໄປໃຊ້ສິດແລ້ວຍັງຕ້ອງ ໄດ້ຂົນ ຂວາຍໃຫ້ພໍ່ແມ່ ພີ່ນ້ອງຂອງຕົນເອງ ໃຫ້ໄປໃຊ້ສິດເລືອກຕັ້ງນຳ ເພື່ອເປັນການປະກອບສ່ວນ ຢູ່ໃນເຂດບ້ານຂອງຕົນເອງ. ນອກຈາກນີ້, ພວກເຮົາກໍໄດ້ມີຕົວແທນ ຂອງກະຊວງ ສາທາລະນະສຸກ ທີ່ໄດ້ເຂົ້າສະໝັກເລືອກຕັ້ງ ເປັນຜູ້ແທນ ສະມາຊິກສະພາແຫ່ງຊາດ ໃນຄັ້ງນີ້ອີກດ້ວຍ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)