ເມື່ອອາທິດຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄອບຄົວ ເດີນທາງຢ້ຽມຢາມ ແລະ ທ່ຽວຊົມສະຖານທີ່ທ່ອງທ່ຽວພູຜາມ່ານ (The Rock Viewpoint) ຢູ່ເມືອງຄູນຄຳ ແຂວງຄຳມ່ວນ.

ທັງນີ້, ກໍເພື່ອເປັນການສົ່ງເສີມການທ່ອງພາຍໃນ ຫລື ລາວທ່ຽວລາວ ແລະ ໃຫ້ທິດຊີ້ນຳ ໃນການພັດທະນາວຽກງານທ່ອງທ່ຽວຢູ່ພາຍໃນປະເທດ ໃຫ້ມີຄວາມຍືນຍົງ. ການຢ້ຽມຢາມຄັ້ງນີ້, ມີຂຶ້ນໃນລະຫວ່າງການເດີນທາງເຂົ້າຮ່ວມພິທີ ສະເຫລີມສະຫລອງ ແລະ ມອບ-ຮັບໂຄງການກໍ່ສ້າງອະນຸສາວະລີ ພຣະບາດສົມເດັດ ພຣະເຈົ້າໄຊຍະເຊດຖາທິຣາດ ມະຫາຣາດ ຢູ່ແຂວງອັດຕະປື.

ໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍ ບໍລິສັດ ກຣີນ ດິສໂຄເວີລີ ລາວ ໃນການຕັດສິນໃຈລົງທຶນເພື່ອພັດທະນາເຂດດັ່ງກ່າວ ໃຫ້ກາຍເປັນສະຖານທີ່ທ່ຽວທາງທຳມະຊາດທີ່ໜ້າປະທັບໃຈ, ມີຄວາມສວຍງາມ, ໜ້າຕື່ນເຕັ້ນ ແລະ ມີຫລາກຫລາຍກິດຈະກຳ, ທັງທີ່ຫລາຍພື້ນທີ່ຂອງສະຖານທີ່ດັ່ງກ່າວ ບໍ່ມີໃຜສາມາດເຂົ້າເຖິງໄດ້ ຫລື ເຂົ້າໄດ້ກໍແມ່ນຍາກທີ່ສຸດ ເພາະເປັນເຂດພູຜາສູງຊັນ.

ສະຖານທີ່ທ່ອງທ່ຽວແຫ່ງນີ້ (ລົງທຶນໂດຍບໍລິສັດ ກຣີນ ດິສໂຄເວີລີ ລາວ) ພັດທະນາຂຶ້ນ ເພື່ອກາຍເປັນບ່ອນແວ່ພັກເຊົາ-ພັກຜ່ອນ, ຊົມວິວທຳມະຊາດ ແລະ ເຮັດກິດຈະກຳພະຈົນໄພຕ່າງໆ ທີ່ໜ້າຕື່ນເຕັ້ນ ເປັນຕົ້ນແມ່ນ ຂີ່ສາຍສະລິງ, ໄຕ່ຂົວອູ່, ໄຕ່ຂົວເຊືອກໄຍແມງມຸມ ແລະ ອື່ນໆ ແລະ ເປັນອີກໜຶ່ງສະຖານທີ່ທ່ອງທ່ຽວຂອງແຂວງຄຳມ່ວນ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)