ສູນກາງສະຫະພັນກໍາມະບານລາວ ຈະຈັດຫລາຍກິດຈະກໍາ ເພື່ອສະເຫລີມສະຫລອງວັນສ້າງຕັ້ງສະຫະພັນກໍາມະບານລາວ ຄົບຮອບ 65 ປີ (1/2/1956-1/2/2021) ພ້ອມນັ້ນ, ກໍໃຫ້ເອົາ ໃຈໃສ່ຕໍ່ການປະຕິບັດມາດຕະການສະກັດກັ້ນ ແລະ ປ້ອງກັນພະຍາດໂຄວິດ-19 ຢ່າງເຂັ້ມງວດ.

ເມື່ອບໍ່ດົນຜ່ານມານີ້, ທ່ານ ນາງ ອາລີ ວົງໜໍ່ບຸນທໍາ ກໍາມະການສູນກາງພັກ, ປະທານຄະນະບໍລິຫານງານສູນກາງສະຫະພັນກໍາມະບານລາວ ໄດ້ຖະແຫລງຂ່າວຕໍ່ສື່ມວນຊົນໃຫ້ຮູ້ວ່າ: ສູນກາງສະ ຫະພັນກໍາມະບານລາວ ໄດ້ມີແຈ້ງການ ເຖິງສະຫະພັນກໍາມະບານທຸກຂັ້ນ ນັບແຕ່ສູນກາງຮອດທ້ອງ ຖິ່ນ, ລວມທັງບັນດາໂຮງຈັກ, ໂຮງງານ ທັງພາກລັດ ແລະ ເອກະຊົນ ທີ່ມີເງື່ອນໄຂ ແລະ ຄວາມສາ ມາດ ຈັດຕັ້ງການເຜີຍແຜ່ປາຖະກະຖາ ກ່ຽວກັບມູນເຊື້ອວັນສ້າງຕັ້ງສະຫະພັນກໍາມະບານຄົບຮອບ 65 ປີ.

ພ້ອມດຽວກັນ, ຖ້າມີເງື່ອນໄຂໃຫ້ຈັດຕັ້ງຂະບວນການຕ່າງໆ ເຊັ່ນ: ກອງປະຊຸມວິທະຍາສາດ, ກິດຈະກໍາຖາມ-ຕອບຄວາມຮູ້ ກ່ຽວກັບວຽກງານກໍາມະບານ, ເນື້ອໃນຂໍ້ແຂ່ງຂັນ 5 ເປັນເຈົ້າ, ຈັດຂະບວນການແຂ່ງຂັນກິລາມວນຊົນ, ສິລະປະວັນນະຄະດີ, ລະຄອນສັ້ນ ທີ່ມີເນື້ອໃນກ່ຽວກັບການສຶກສາອົບຮົມການເມືອງ-ແນວຄິດ, ການປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນຜູ້ອອກແຮງງານ ແລະ ວຽກງານກໍາມະບານ. ທ່ານ ນາງ ອາລີ ວົງໜໍ່ບຸນທໍາ ກ່າວຕື່ມວ່າ: ສະເພາະຢູ່ສູນກາງສະຫະພັນກໍາມະບານ ຈະມີການໂຮມຊຸມນຸມ, ຈັດກອງປະຊຸມວິທະຍາສາດ ສົນທະນາແລກປ່ຽນບົດຮຽນ ກ່ຽວກັບການພັດທະນາວຽກງານກໍາມະບານໃນໄລຍະໃໝ່ ຢູ່ຫໍປະຊຸມແຫ່ງຊາດ ໃນວັນທີ 1 ກຸມພາ 2021, ຈັດຕັ້ງປາຖະ ກະຖາມູນເຊື້ອວັນສ້າງຕັ້ງສະຫະພັນກໍາມະບານລາວ, ສົມທົບກັບສະຫະພັນກໍາມະບານນະຄອນຫລວງວຽງຈັນ ແລະ ສູນເລືອດແຫ່ງຊາດ ຈັດກິດຈະກໍາບໍລິຈາກເລືອດເພື່ອຊ່ວຍເຫລືອສັງຄົມໃນ 9 ຕົວເມືອງພາຍໃນນະຄອນຫລວງວຽງຈັນ, ໂດຍເລີ່ມຈັດຕັ້ງປະຕິບັດ ແຕ່ວັນທີ 19 ມັງກອນ 2021 ເປັນ ຕົ້ນມາ ແລະ ຈະຈັດຢູ່ສໍານັກງານສູນກາງສະຫະພັນກໍາມະບານລາວ ໃນວັນທີ 28 ມັງກອນ 2021.

ນອກຈາກນີ້, ຍັງມີຂະບວນການແຂ່ງຂັນກິລາ, ສິລະປະວັນນະຄະດີ, ຂະບວນອອກແຮງງານອະນາ ໄມລວມຕາມເງື່ອນໄຂ ແລະ ສະພາບຄວາມເປັນຈິງ. ການຈັດກິດຈະກໍາຕົວຈິງແຕ່ລະພາກສ່ວນ ຕ້ອງປະຕິບັດຕາມມາດຕະການຂອງຄະນະສະເພາະກິດເພື່ອຄວບຄຸມ, ປ້ອງກັນ ແລະ ແກ້ໄຂການລະບາດ ຂອງພະຍາດໂຄວິດ-19 ຢ່າງເຂັ້ມງວດ.ໃນໂອກາດນີ້, ທ່ານປະທານກໍາມະບານລາວ ຍັງໄດ້ຮຽກຮ້ອງມາຍັງຄະນະບໍລິຫານງານສະຫະ ພັນກໍາມະບານແຕ່ລະຂັ້ນ, ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານທຸກຖ້ວນໜ້າ ຈົ່ງໄດ້ຕັ້ງໜ້າ ແລະ ສາມັກຄີກັນ ເຂົ້າຮ່ວມຂະບວນການຕ່າງໆ ເພື່ອເຮັດໃຫ້ການສະເຫລີມສະຫລອງວັນສ້າງຕັ້ງສະຫະພັນກໍາມະບານລາວ ຄົບຮອບ 65 ປີ ມີເນື້ອໃນ, ຄວາມໝາຍຄວາມສໍາຄັນ, ມີບັນຍາກາດຟົດຟື້ນ ແລະ ມ່ວນຊື່ນ, ພ້ອມທັງເປັນການຊົມເຊີຍຜົນສໍາເລັດ ຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ຜົນສໍາເລັດກອງປະຊຸມໃຫ່ຍ ຜູ້ແທນກໍາມະບານລາວ ທົ່ວປະເທດຄັ້ງທີ VIII, ກຽມພ້ອມເພື່ອກ້າວໄປສູ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາ ຊິກສະພາປະຊາຊົນຂັ້ນແຂວງຊຸດ II ໃຫ້ໄດ້ຮັບຜົນສໍາເລັດຕາມທີ່ຄາດໝາຍໄວ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)