ພາຍຫລັງ ທີ່ສວນອະນຸສາວະລີ ພຣະເຈົ້າໄຊຍະເສດຖາທິຣາດ ມະຫາຣາດ ທີ່ບ້ານຫາດຊາຍຂາວ ໄດ້ສໍາເລັດການກໍ່ສ້າງເປັນທີ່ຮຽບຮ້ອຍແລ້ວ ທາງອໍານາດການປົກຄອງ ເມືອງໄຊເສດຖາ ແຂວງອັດຕະປື ໄດ້ມີແຜນການສືບຕໍ່ປົກປັກຮັກສາ ແລະ ຄຸ້ມຄອງສວນ ໃຫ້ເປັນລະບົບ ເພື່ອອໍານວຍຄວາມສະດວກ ແລະ ສ້າງຄວາມປະທັບໃຈໃຫ້ແກ່ບັນດາແຂກຄົນ ກໍຄືນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ຈະເຂົ້າມາທ່ຽວຊົມໃນອະນາຄົດ.

ທ່ານ ວົງອາໄພ ວົງສາລະສິດ ຮອງເຈົ້າເມືອງໄຊເສດຖາ ເປີດເຜີຍເມື່ອວັນທີ 26 ມັງກອນ 2021 ນີ້ວ່າ: ຫລັງຈາກນີ້ໄປ ທາງການນໍາຂອງເມືອງ ຈະໄດ້ປະສານສົມທົບກັບອໍານາດການປົກຄອງບ້ານ ແລະ ພາກສ່ວນກ່ຽວຂ້ອງ ເພື່ອແຕ່ງຕັ້ງຄະນະຮັບຜິດຊອບເປັນອັນລະອຽດ ພ້ອມທັງຈະໄດ້ແບ່ງການຄຸ້ມຄອງບໍລິຫານ, ປົກປັກຮັກສາ ເພື່ອອໍານວຍຄວາມສະດວກໃຫ້ແກ່ແຂກຄົນ ກໍຄືບັນດານັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ຈະເຂົ້າມາທ່ຽວຊົມ ແລະ ກາບໄວ້ ຮູບປັ້ນຫລໍ່ເໝືອນ ພຣະເຈົ້າໄຊຍະເຊດຖາທິຣາດ ພາຍໃນສວນອະນຸສາວະລີແຫ່ງນີ້ ເຊິ່ງຄາດວ່າໃນຕໍ່ໜ້າຈະມີເຂົ້າມາຢ່າງຫລວງ ຫລາຍ.

ທ່ານ ວົງອາໄພ ວົງສາລະສິດ ກ່າວຕື່ມວ່າ: ສ່ວນອານຸສາວະລີ ພຣະເຈົ້າໄຊຍະເຊດຖາທິຣາດ ມະຫາຣາດ ແມ່ນສະຖານທີ່ແຫ່ງໜຶ່ງທີ່ມີຄວາມສັກສິດ ແລະ ມີຄວາມສໍາຄັນທາງປະຫວັດສາດ ຂອງຊາດລາວເຮົາ ໂດຍສະເພາະຊາວເມືອງໄຊເສດຖາ ແຂວງອັດຕະປື ເພາະວ່າ: ພຣະເຈົ້າໄຊຍະເຊດຖາທິຣາດ ແມ່ນເຈົ້າກະສັດລາວອົງໜຶ່ງມີຄວາມປີຊາສາມາດຮອບດ້ານ ໃນການປົກຄອງແຜ່ນດິນ ໃຫ້ມີຄວາມໝັ້ນຄົງເຂັ້ມແຂງ ທາງດ້ານການທະຫານ, ມີຄວາມເກັ່ງກ້າໃນການວາງແຜນສູ້ຮົບ, ມີຄວາມສະຫລາດຫລັກ ແຫລມເບິ່ງກ້ວາງມອງໄກ, ມີວິໄສທັດ, ສາມາດເຕົ້າໂຮມຄວາມສາມັກຄີເປັນປຶກແຜ່ນ, ເຮັດໃຫ້ໄລຍະນັ້ນປະເທດຊາດເຮົາ ມີຄວາມຈະເລີນ, ຮຸ່ງເຮືອງສີວິໄລ ດ້ານສິລລະປະ, ວັດທະນະທໍາ,ເຫລື້ອມໃສໃນພຸດທະສາສະໜາ, ເຄົາລົບທໍານຽມ, ຮີດຄອງປະເພນີ ແລະ ອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)