ອີງຕາມການຖະແຫຼງຂ່າວ ຈາກຄະນະກຳມະການເລືອກຕັ້ງລະດັບຊາດ ທີ່ໄດ້ຈັດຂຶ້ນໃນວັນທີ 30 ຕຸລາ 2020 ທີ່ສະພາແຫ່ງຊາດ (ຫຼັກ6) ໃຫ້ຮູ້ວ່າ: ຄະນະປະຈຳສະພາແຫ່ງຊາດໄດ້ກຳນົດເອົາວັນທີ 21 ກຸມພາ 2021 ເປັນວັນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II; ປະທານປະເທດແຫ່ງ ສປປ.ລາວ ກໍ່ໄດ້ອອກລັດຖະດຳລັດສະບັບເລກທີ 187/ປປທ; ວ່າດ້ວຍການປະກາດເອົາວັນອາທິດ ກົງກັບວັນທີ 21 ກຸມພາ 2021 ເປັນວັນເລືອກຕັ້ງສະມາຊິກສະພາແຫ່ງຊາດຊຸດທີ IXແລະ ສະມາຊິກສະພາປະຊາຊົນແຂວງຊຸດທີ II ໃນທົ່ວປະເທດຕາມການສະເໜີຂອງຄະນະປະຈຳສະພາແຫ່ງຊາດ.

ຈາກຂໍ້ມູນນັ້ນສະແດງໃຫ້ເຫັນວ່າ ວັນອາທິດກົງກັບວັນທີ 21 ກຸມພາ 2021 ແມ່ນວັນສຳຄັນຂອງຄົນລາວບັນດາເຜົ່າ ທີ່ຈະໄດ້ໄປໃຊ້ສິດຂອງຕົນຢ່າງມີປະຊາທິປະໄຕເລືອກເອົາຕົວແທນແຫ່ງສິດຜົນປະໂຫຍດຂອງຕົນເຂົ້າໃນອົງການອຳນາດລັດຂັ້ນສູນກາງ ແລະ ທ້ອງຖິ່ນ.

ໃນມະຕິກອງປະຊຸມຄົບຄະນະຄັ້ງທີ XI ຂອງຄະນະບໍລິຫານສູນກາງພັກສະໄໝທີ X ເຊິ່ງດຳເນີນແຕ່ວັນທີ 12 ເຖິງ ວັນທີ 16 ຕຸລາ 2020 ນັ້ນກໍໄດ້ມີທິດຊີ້ນຳກ່ຽວກັບການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II ດັ່ງນີ້:

ຄະນະບໍລິຫານງານສູນກາງພັກ ໄດ້ເປັນເອກະພາບສູງດ້ານທັດສະນະ ຖືການເລືອກຕັ້ງຄັ້ງນີ້ ເປັນເຫດການກສຳຄັນທາງການເມືອງບັ້ນໜຶ່ງ ໃນການສືບຕໍ່ສ້າງ ແລະ ບູລະນະລະບອບປະຊາທິປະໄຕ ປະຊາຊົນໃຫ້ໜັກແໜ້ນ, ເຂັ້ມແຂງ ຕາມທິດສ້າງລັດທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ; ຍົກສູງປະສິດທິພາບການເຄື່ອນໄຫວປະຕິບັດພາລະບົດບາດ, ໜ້າທີ ແລະ ຂອບເຂດສິດຂອງສະພາແຫ່ງຊາດ ແລະ ສະພາປະຊາຊົນແຂວງ, ນະຄອນຫຼວງ ໃນເງຶ່ອນໄຂໃໝ່, ສ້າງການຫັນປ່ຽນທີ່ເຂັ້ມແຂງ, ເລິກເຊິ່ງ ແລະ ຮອບດ້ານ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຕາມກົດໝາຍຢ່າງເຂັ້ມງວດ ແລະ ສັກສິດ. ບົດຈິດໃຈດັ່ງກ່າວ, ຄະນະບໍລິຫານງານສູນກາງພັກ ໄດ້ໃຫ້ທິດນຳ ດັ່ງນີ້:

  • ເຫັນດີຕາມແຜນດຳເນີນງານ, ແຜນການກະກຽມເລືອກຕັ້ງຂອງຄະນະກຳມະການເລືອກຕັ້ງລະດັບຊາດ; ໃຫ້ເອົາໃຈໃສ່ປຸກລະດົມຂົນຂວາຍ ແລະ ສຶກສາອົບຮົມປະຊາຊົນໃຫ້ຮັບຮູ້ເຂົ້າໃຈແນວທາງ, ນະໂຍບາຍຂອງ ພັກ-ລັດ, ຄວາມໝາຍສຳຄັນຂອງການເລືອກຕັ້ງ ແລະ ເປັນເຈົ້າການເຂົ້າຮ່ວມໃຊ້ສິດປ່ອນບັດເລືອກຕັ້ງຢ່າງກວ້າງຂວາງ, ທົ່ວເຖິງ; ຮັບປະກັນໃຫ້ບັນລຸຄາດໝາຍ “ສາມຮ້ອຍສ່ວນຮ້ອຍ” ໃຫ້ໄດ້ເປັນຢ່າງດີ.
  • ການກະກຽມເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ແລະ ສະພາ ປະຊາຊົນຂັ້ນແຂວງ ຊຸດທີ II ແມ່ນຢູ່ໃນໄລຍະເວລາທີ່ດຳເນີນກອງປະຊຸມໃຫຍ່ ອົງຄະນະພັກ ກະຊວງ, ອົງການ, ແຂວງ, ນະຄອນຫຼວງວຽງຈັນ ແລະ ກອງປະຊຸມໃຫຍ່ຄັ້ງທີ XI ຂອງພັກ. ດັ່ງນັ້ນ, ຄະນະພັກແຕ່ລະຂັ້ນ ຈົ່ງຍົກສູງຄວາມຮັບຜິດຊອບ, ເອົາໃຈໃສ່ຊຊີ້ນຳຈັດຕັ້ງປະຕິບັດໃຫ້ໄດ້ຮັບຜົນດີ.
  • ຮີບຮ້ອນປະສານສົມທົບກັບພາກສ່ວນທີ່ກ່ຽວຂ້ອງ ເພື່ອກຳນົດເປົ້າໝາຍທີ່ຈະສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ນະຄອນຫຼວງ, ຮັບປະກັນດ້ານໂຄງປະກອບບຸກຄະລາກອນໃຫ້ມີທັງຜູ້ເກ່ົາ ແລະ ໃໝ່, ມີທັງຜູ້ປະຈຳການ ແລະ ຜູ້ຄວບຕຳແໜ່ງ, ມີຕົວແທນຈາກບາງຂົງເຂດວຽກງານທີ່ມີຄວາມຈຳເປັນ, ມີເພດ, ເຜົ່າ, ຮຸນອາຍຸ ໃນສັດສ່ວນທີ່ສົມເຫດສົມຜົນ ແລະ ແທດກັບສະພາບເງື່ອນໄຂຕົວຈິງ ຕາມທິດຫັນເປັນໜຸ່ມແໜ້ນ, ໃນນີ້ ຄວນພິຈາລະນາເປົ້າໝາຍບຸກຄະລາກອນຜູ້ທີ່ດີເດັ່ນ ໃນຂົງເຂດນັກຮຽນຮູ້ປັນຍາຊົນ, ນັກວິທະຍາສາດ, ນັກວິຊາການ, ນັກທຸລະກິດ, ນັກພັດທະນາ ແລະ ເປົ້າໝາຍທີ່ຈະເປັນສະມາຊິກສະພາປະຈຳການ (ອາຊີບ) ໃຫ້ຫຼາຍຂຶ້ນກວ່າເກົ່າ. ເສີມຂະຫຍາຍບົດບາດຂອງແນວລາວສ້າງຊາດ, ອົງການຈັດຕັ້ງມະຫາຊົນແຕ່ລະຂັ້ນ ໃນການມີຄຳເຫັນ ແລະ ຄັດເລືອກເປົ້າໝາຍຜູ້ຮັບສະໝັກເລືອກຕັ້ງເປັນສະມາຊິກສະພາ.
  • ຄະນະພັກ, ຄະນະປະຈຳສະພາ, ອົງການປົກຄອງ ແລະ ຄະນະກຳມະການເລືອກຕັ້ງແຕ່ລະຂັ້ນ ມີຄວາມຮັບຜິດຊອບການເມືອງໂດຍກົງ ຕໍ່ຜົນໄດ້ຜົນເສຍໃນການກະກຽມ ແລະ ເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ.
  • ໃຫ້ສືບຕໍ່ນຳພາຊີ້ນຳການກະກຽມຢ່າງໃກ້ຊິດ ບັນຫາໃດທີ່ຍັງບໍ່ທັນຈະແຈ້ງ ກໍ່ຮີບຮ້ອນຄົ້ນຄວ້າແລ້ວອອກຄຳແນະນຳໃຫ້ຊັດເຈນ ແລະ ມີຄວາມເປັນເອກະພາບໃນການຈັດຕັ້ງປະຕິບັດຕົວຈິງ; ກວດກາບັນຊີຈຳນວນຜູ້ມີສິດເລືອກຕັ້ງໃຫ້ມີຄວາມຊັດເຈນ, ກຳແໜ້ນສະພາບການຂອງທ້ອງຖິ່ນ-ຮາກຖານ, ບ່ອນໃດມີຄວາມຫຍຸ້ງຍາກ ໃຫ້ເພິ່ນກຳລັງລົງໄປຕື່ມ.
  • ການນຳໃຊ້ງົບປະມານ ຕ້ອງບົນຈິດໃຈປະຫຍັດ, ຖືກຕ້ອງຕາມເປົ້າໝາຍ, ມີປະສິດທິຜົນ, ສອດຄ່ອງກັບກົດໝາຍ, ລະບຽບການ ແລະ ຮັບປະກັນຜົນສຳເລັດ, ຂຸດຄົ້ນ ແລະ ເສີມຂະຫຍາຍກຳລັງແຮງສັງລວມ ອັນທີ່ສັງຄົມສາມາດປະກອບສ່ວນໄດ້ ໂດຍໃຫ້ຖືເອົາບັ້ນເລືອກຕັ້ງຄັ້ງນີ້ເປັນປາງບຸນໃຫຍ່ຂອງຊາດ ເຊິ່ງພົນລະເມືອງລາວທຸກຄົນຕ້ອງໄດ້ເຂົ້າຮ່ວມຢ່າງພ້ອມພຽງ.

ສະນັ້ນ ເພື່ອນຜູ້ອ່ານຈຶ່ງເຫັນຂ່າວຄາວຫຼາຍຂຶ້ນໃນການເປີດບັ້ນເຊື່ອມຊືມການເລືອກຕັ້ງໃນຄັ້ງນີ້ ເພາະມັນແມ່ນປາງບຸນໃຫຍ່ຂອງຊາດ; ເປັນເຫດການທາງການເມືອງທີ່ມີຄວາມສຳຄັນຂອງຊາດ ເຊິ່ງອົງການຈັດຕັ້ງ ພັກ-ລັດ, ກຳລັງປະກອບອາວຸດ ແລະ ປະຊາຊົນລາວບັນດາເຜົ່າມີໜ້າທີ່ປະກອບສ່ວນເຮັດໃຫ້ການເລືອກຕັ້ງຄັ້ງນີ້ ດຳເນີນດ້ວຍບັນຍາກາດເບີກບານມ່ວນຊື່ນມີ ປະຊາທິປະໄຕ, ຖືກຕ້ອງຕາມກົດໝາຍປະຢັດມັດທະຍັດ ແລະ ສູ້ຊົນໃຫ້ບັນລຸຕາມຄາດໝາຍທີ່ວາງໄວ້.

Medialaos MMD (ແຫຼ່ງຂໍ້ມູນຈາກ: ນັກຂ່າວອາວຸໂສ)