ເຈົ້າແຂວງສະຫວັນນະເຂດເນັ້ນໃຫ້ອຳນາດການປົກຄອງເມືອງໄຊພູທອງເຂັ້ມງວດຕໍ່ການປະຕິບັດຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອປະເພດຕ່າງໆຕາມລຳແມ່ນ້ຳຂອງ.

ສະຫວັນນະເຂດ: ໃນຕອນບ່າຍວັນທີ 29 ມັງກອນ 2021ຜ່ານມານີ້ ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດພ້ອມຄະນະພະແນກສາທາລະນະສຸກແຂວງ, ພະແນກກະສິກຳ ແລະ ປ່າໄມ້ແຂວງ, ກອງບັນຊາການປກຊ-ປກສ, ຫ້ອງວ່າການປົກຄອງແຂວງ ໄດ້ໄປພົບປະອຳນາດການປົກຄອງເມືອງໄຊພູທອງ ເພື່ອຕິດຕາມສະພາບການປ້ອງກັນ ຄວບຄຸມ ແລະ ແກ້ໄຂ ຕ້ານການລະບາດຂອງພະຍາດອັກເສບປອດຈາກເຊື້ອຈຸລະໂລກ ສາຍພັນໃໝ່ ຫຼື ໂຄວິດ 19, ແລະການຈັດຕັ້ງປະຕິບັດຜັນຂະຫຍາຍຄຳສັ່ງຂອງທ່ານເຈົ້າແຂວງສະຫວັນະເຂດ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອປະເພດຕ່າງໆຕາມລຳແມ່ນ້ຳຂອງ.

ທ່ານ ຮ່ວນ ຮັງບົວສອນ ຮອງເລຂາພັກເມືອງ ຜູ້ຊີ້ນໍາວຽກງານການເມືອງແນວຄິດເມືອງໄຊພູທອງ ໄດ້ລາຍງານວ່າ: ອຳນາດການປົກຄອງເມືອງໄດ້ພ້ອມກັນຜັນຂະຫຍາຍແຈ້ງການເພີ່ມເຕີມ ຂອງທ່ານເຈົ້າແຂວງສະຫວັນນະເຂດ ວ່າດ້ວຍການປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ 19 ທີ່ຕິດພັນກັບການຂົນສົ່ງສິນຄ້າເຂົ້າ-ອອກຜ່ານດ່ານສາກົນທາງບົກທີ່ແຂວງສະຫວັນນະເຂດ ແລະຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອປະເພດຕ່າງໆຕາມລຳແມ່ນ້ຳຂອງ ໃຫ້ອຳນາດການປົກຄອງບ້ານ ແລະ ປະຊາຊົນໃຫ້ຮັບຮູ້ເຊື່ອມຊຶມ, ກວດກາຕັກເຕືອນປິດຮ້ານກິນດື່ມຄາລາໂອເກະພາຍໃນເມືອງ, ກວດກາການເຂົ້າ-ອອກຂອງເຮືອຕາມລຳແມ່ນ້ຳຂອງ ອອກ 6ໂມງເຊົ້າ ແລະ ເຂົ້າ6ໂມງແລງ, ສົມທົບກັບກອງຮ້ອຍທະຫານຊາຍແດນເພື່ອເຂັ້ມງວດໃນການເຂົ້າມາຂອງແຮງງານລາວ, ຕັ້ງສູນກັກກັນຂອງເມືອງ 1 ແຫ່ງ ເພື່ອກັກກັນແຮງງານທີ່ລັກລອບເຂົ້າມາ, ແຕ່ວັນທີ 23 ທັນວາ 2020 ຫາວັນທີ 28 ມັງກອນ 2021 ມີແຮງງານເຂົ້າມາທັງໝົດ 95 ຄົນ ຍິງ 46 ຄົນ, ເປັນຄົນເມືອງໄຊພູທອງ 66 ຄົນ ຍິງ 32 ຄົນ, ຄົນຕ່າງແຂວງ 1 ຄົນແລະຕ່າງເມືອງ 28 ຄົນ ເຊິ່ງໄດ້ສົ່ງສູນກັກກັນຂອງແຂວງສະຫວັນະເຂດ, ມາຮອດປະຈຸບັນແມ່ນບໍ່ມີຜູ້ຄ້າງສູນກັກກັນແລ້ວ. ສະພາບການລັກລອບເຂົ້າມາຂອງແຮງງານສ່ວນຫຼາຍແມ່ນເຮືອຂອງຄົນໄທເຂົ້າມາສົ່ງໃນຕອນຄ່ຳຫຼືຕອນເຊົ້າ ເຂົ້າມາປະໄວ້ຕາມແຄມບ້ານ. ໃນວັນທີ 13 ມັງກອນ 2021 ມີເຮືອໄທເຂົ້າມາສົ່ງແຮງງານລາວທີ່ພົ້ນໂທດຈາກຄຸມຂັງຄອງໃຜ່ ແຂວງຂອນແກ່ນ ຈຳນວນ 54 ຄົນ ຍິງ 28 ຄົນ ມາສົ່ງທີ່ດ່ານປະເພນີເລົ່າໝາກຫູດ ເມືອງໄຊພູທອງ ເຊິ່ງເຈົ້າໜ້າທີ່ໄດ້ເກັບກຳຂໍ້ມູນລະອຽດ ແລະ ໄດ້ສົ່ງເຂົ້າສູນກກັກກັນຂອງແຂວງ.

ໂອກາດນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນະເຂດ ກໍ່ໄດ້ສະແດງຄວາມຊົມເຊີຍຕໍ່ການເອົາໃຈໃສ່ຂອງອຳນາດການປົກຄອງ ເພື່ອພ້ອມກັນ ປ້ອງກັນ ຄວບຄຸມ ແລະ ຕ້ານການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ 19, ເຊິ່ງເຊື້ອພະຍາດດັ່ງກ່າວມີການລະບາດໄວ ພະຍາດຝັງຕົວເລິກ ບໍ່ສາມາດກວດພົບໄດ້ງ່າຍ, ດັ່ງນັ້ນຈຶ່ງໃຫ້ທຸກຄົນເປັນເຈົ້າການນໍາກັນໃນການເຝົ້າລະວັງ ຖ້າພົບກໍລະນີສົງໃສແມ່ນໃຫ້ແຍກປ່ຽວ ແລະ ສົ່ງຕົວຢ່າງໄປກວດໂດຍໄວ, ໃນປະຈຸບັນແຮງງານລາວທີ່ຕົກຄ້າງກໍ່ກັບມາຫຼາຍ, ອໍານາດການປົກຄອງເມືອງກໍ່ຕ້ອງໂຄສະນາໃຫ້ທົ່ວເຖິງຕໍ່ກັບແຈ້ງການຂອງຈົ້າແຂວງສະຫວັນນະເຂດ ເພື່ອຕິດຕາມກວດກາແຮງງານທີ່ກັບມາ ກໍ່ຕ້ອງໄດ້ກັກກັນກ່ອນຈຶ່ງກັບໄປຫາຍາດພີ່ນ້ອງ, ເຈົ້າໜ້າທີ່,ທີ່ກ່ຽວຂ້ອງກໍ່ຕ້ອງເຂັ້ມງວດໃນການປະຕິບັດໜ້າທີ່ຂອງຕົນໃຫ້ຖືກຕ້ອງ, ການເຕົ້າໂຮມເຮືອໃນແຕ່ລະຈຸດ ແຕ່ລະບ້ານກໍ່ຕ້ອງເຂັ້ມງວດຕາມຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອປະເພດຕ່າງໆຕາມລຳແມ່ນ້ຳຂອງ. ທັງນີ້ກໍ່ເພື່ອໃຫ້ທຸກຄົນມີຄວາມປອດໄພຈາກເຊື້ອພະຍາດໂຄວິດ 19. ຄຽງຄູ່ກັນນັ້ນກໍ່ຕ້ອງໂຄສະນາກະກຽມໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະພາປະຊາຊົນແຂວງສະຫວັນະເຂດ ຊຸດທີ 2.

ໃນເວລາຕໍ່ມາ ທ່ານເຈົ້າເມືອງໄຊພູທອງພ້ອມຄະນະ ກໍ່ໄດ້ນໍາພາທ່ານເຈົ້າແຂວງສະຫວັນນະເຂດ ໄປຢ້ຽມຢາມເບິ່ງການຜະລິດລະດູແລ້ງຂອງປະຊາຊົນ, ໃນປີ 2021 ແຂວງໄດ້ມອບແຜນປັກດຳນາແຊງໃຫ້ທົ່ວເມືອງໄຊພູທອງ 150 ເຮັກຕາເຊິ່ງທາງເມືອງມີແຜນປູກເຂົ້ານາແຊງໃຫ້ໄດ້ 284 ເຮັກຕາ; ມາຮອດປະຈຸບັນປະຊາຊົນສາມາດປູກເຂົ້ານາແຊງໄດ້ 202ເຮັກຕາ ໃນນັ້ນນາດຳ 187ເຮັກຕາ, ນາຢອດ 8ເຮັກຕາກ່ວາ ແລະ ນາຫວ່ານ ເກືອບ 7ເຮັກຕາ ທຽບໃສ່ແຜນທີ່ແຂວງມອບໃຫ້ປະຕິບັດໄດ້ 135ເຮັກຕາ. ສ່ວນການປູກພືດແມ່ນປະຕິບັດໄດ້ 1ພັນ 109 ເຮັກຕາ ສ່ວນຫຼາຍແມ່ນສາລີ, ມັນຕົ້ນ, ຖົ່ວດິນ ແລະ ພືດຜັກຕ່າງໆ.

ລາຍງານໂດຍ: Media LAOS Savannakhet