ຮາກຖານພັກ ພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ແຂວງສະຫວັນນະເຂດ, ເລື່ອນສະມາຊິກພັກສໍາຮອງ 11ສະຫາຍ ຈາກ 7 ໜ່ວຍພັກ ຂຶ້ນ ເປັນສະມາຊິກພັກສົມບູນ

ການຂະຫຍາຍສະມາຊິກ ແມ່ນການສ້າງກໍາລັງຂອງພັກ ເພາະວ່າ ສະມາຊິກພັກ ແມ່ນນັກຮົບປະຕິວັດ ໃນກອງນໍາໜ້າ ຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ; ເຊິ່ງມາ ໃນ ວັນທີ 1 ກຸມພາ 2021ນີ້ ທີ່ຫ້ອງປະຊຸມພະແນກ ຖວທ ແຂວງ ຄະນະພັກຮາກຖານພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ສະຫວັນນະເຂດ ໄດ້ຈັດພິທີ ເລື່ອນສະມາຊິກພັກສຳຮອງ11 ສະຫາຍ ຈາກ 7ໜ່ວຍພັກ ທີ່ຂຶ້ນກັບຄະນະພັກຮາກຖານ ຂຶ້ນເປັນສະມາຊິກພັກສົມບູນໃໝ່ ໂດຍການເຂົ້າຮ່ວມ ເປັນປະທານຂອງ ສະຫາຍ ມົງກຸດເພັດ ວົງພະຈັນ ຄະນະພັກຮາກຖານ ຮອງຫົວໜ້າພະແນກ ຖວທ ແຂວງສະຫວັນນະເຂດ,ມີເລຂາ ແລະຄະນະ ໜ່ວຍພັກ ທີ່ຂຶ້ນກັບຮາກຖານດັ່ງກ່າວເຂົ້າຮ່ວມ.

ບັນດາສະຫາຍ ທີ່ໄດ້ຮັບການຕົກລົງ ຈາກຄະນະປະຈໍາພັກແຂວງ ວ່າດ້ວຍການ ເລື່ອນຈາກສໍາຮອງ ຂຶ້ນເປັນສະມາຊິກພັກສົມບູນໃໝ່ ແມ່ນໄດ້ຜ່ານການຕິດຕາມຈາກ ສະມາຊິກພັກສົມບູນ ແລະ ຝຶກຝົນຕົນເອງຢູ່ໃນໄລຍະສຳຮອງ ຕາມລະບຽບຂອງພັກ ເຊິ່ງເຫັນວ່າ ທັງ 11 ສະຫາຍມີຄວາມບຸກບືນ ເປັນແບບຢ່າງນຳໜ້າມະຫາຊົນໃນຂະບວນການຂອງວຽກງານຕົວຈິງ, ຍ້ອນເຫັນໄດ້ຄວາມຫ້າວຫັນ,ເປັນແບບຢ່າງ ຂອງສະມາຊິກພັກ ຄະນະພັກຂັ້ນເທິງ ກໍໄດ້ຕົກລົງ ເລື່ອນຂຶ້ນເປັນສະມາຊິກພັກສົມບູນຢ່າງເປັນທາງການ .

ໂອກາດນີ້ ສະຫາຍ ມົງກຸດເພັດ ວົງພະຈັນ ກໍ່ໄດ້ມີຄໍາເຫັນໂອ້ລົມກ່ອນອື່ນສະຫາຍກໍ່ໄດ້ກ່າວສະແດງຄວາມຊົມເຊີຍຕໍ່ຄະນະໜ່ວຍພັກ ທີ່ເອົາໃຈໃສ່ໃນການກໍ່ສ້າງ ຂະຫຍາຍພັກ,ໃຫ້ຮູ້ເຖິງມາດຖານຂອງສະມາຊິກພັກ,ຂັ້ນຕອນຕ່າງໆ ,ເຊິ່ງຢູ່ໃນ ກົດລະບຽບຂອງພັກປະຊາຊົນປະຕິວັດລາວ ສະໄໝທີ10 ສະບັບ ປີ2016 ປະກອບມີ14ໝວດ,58ມາດຕາ ແຕ່ສິ່ງສໍາຄັນແມ່ນຕ້ອງກໍາໄດ້ເນື້ອໃນ ມາດຕາ3 ໜ້າທີ່ຂອງສະມາຊິກພັກ, ເຊິ່ງສະມາຊິກພັກ ຕ້ອງເປັນເຈົ້າການປະຕິບັດແນວທາງ,ນະໂຍບາຍ,ມະຕິຄໍາສັ່ງ,ກົດລະບຽບພັກ,ລັດຖະທໍາມະນູນ ແລະ ກົດໝາບຂອງລັດ;ປະກອບສ່ວນເຂົ້າໃນການກໍ່ສ້າງ,ບູລະນະແນວທາງ,ແຜນນະໂຍບາຍຂອງພັກ ແລະເຮັດສໍາເລັດໜ້າທີ່ ທີ່ພັກມອບໝາຍໃຫ້,ຕັ້ງໜ້າຝຶກຝົນຫຼໍ່ຫຼອມຕົນເອງ ໃນທຸກດ້ານ

ຈາກນີ້ ຕ້ອງຮໍ່າຮຽນທິດສະດີມາກ-ເລນິນ,ແນວຄິດໄກສອນ ພົມວິຫານ,ແນວທາງ,ແຜນນະໂບບາຍ ແລະການຄົ້ນຄວ້າຮໍ່າຮຽນ;ພ້ອມນີ້ ຍັງໄດ້ຍົກໃຫ້ເຫັນ ສິດຂອງສະມາຊິກພັກ ທີ່ມີສິດ ໄດ້ຮັບຂ່າວສານອັນຈໍາເປັນ,ປະກອບສ່ວນປຶກສາຫາລື ແລກປ່ຽນຄໍາຄິດເຫັນ,ລົງຄະແນນສຽງ ແລະຕົກລົງວຽກງານ ຢູ່ໃນກອງປະຊຸມຂອງພັກ,ມີສິດເລືອກຕັ້ງ,ສະໝັກຮັບເລືອກຕັ້ງ ແລະສະເໜີຜູ້ອອກສະໝັກຮັບເລືອກຕັ້ງເຂົ້າໃນການນໍາຂັ້ນຕ່າງໆຂອງພັກ.

ລາຍງານໂດຍ Media LAOS Savanakhet