ພິທີມອບ – ຮັບ ເຄື່ອງຊ່ວຍເຫຼືອປະຊາຊົນຜູ້ທຸກຍາກ ແລະ ດ້ອຍໂອກາດທີ່ປະສົບ ໄພໜາວ ແຂວງຫຼວງພະບາງ ແລະ ໄຊຍະບູລີ ໄດ້ຈັດຂຶ້ນເມື່ອບໍ່ດົນມານີ້ ທີ່ສາງມ້ຽນ ເຄື່ອງ ຂອງພະແນກແຮງງານ ແລະ ສະຫວັດດີການສັງຄົມ ແຂວງຫຼວງພະບາງ ໃຫ້ກຽດມອບໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີ ການສັງຄົມ, ກ່າວຮັບໂດຍທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງຫຼວງພະບາງ ແລະ ພາກສ່ວນທີ່ກ່ຽວຂ້ອງຂອງທັງສອງແຂວງເຂົ້າຮ່ວມ.

ເຄື່ອງຈຳນວນດັ່ງກ່າວແມ່ນໄດ້ຮັບມາຈາກກະຊວງແຮງງານ ແລະ ສະຫວັດດີການ ສັງຄົມ ຈຳນວນ 190 ແກັດ ມູນຄ່າ 285 ລ້ານກີບ, ໃນນັ້ນມອບໃຫ້ແຂວງໄຊຍະບູລີ 70 ແກັດ ມູນຄ່າ 105 ລ້ານກີບ, ເຄື່ອງດັ່ງກ່າວປະກອບມີ ເສື້ອກັນໜາວ, ໂສ້ງ, ເກີບ ແລະ ອື່ນໆຈຳນວນໜຶ່ງ. ຜ່ານມາແຂວງຫຼວງພະບາງກໍໄດ້ຮັບເຄື່ອງຈາກກະຊວງ ຮສສ ເປັນຕົ້ນແມ່ນເກືອ 25 ກິໂລ, ຜ້າຫົ່ມນ້ອຍ 51 ຜືນ, ເສື່ອປູນອນຜືນນ້ອຍ 51 ຜືນ, ມຸ້ງ 51 ດາງ, ໝອນນ້ອຍ 97 ໜ່ວຍ, ເຫຼັກຕະປູ 170 ກິໂລ, ຖັງນໍ້າ 97 ໜ່ວຍ, ເຕັ້ນຣັດເຊຍ 5 ດາງ, ເຕັ້ນຈີນ 15 ດາງ ແລະ ເຕັ້ນຍີ່ປຸ່ນ 2 ດາງ.

ເຄື່ອງທີ່ໄດ້ມາແມ່ນໄດ້ນຳໄປຊ່ວຍເຫຼືອ ປະຊາຊົນທີ່ໄດ້ຮັບຜົນກະທົບຈາກໄພພິບັດທາງທຳມະຊາດເຊັ່ນ: ໄພແຫ້ງແລ້ງ, ນໍ້າຖ້ວມ, ຕັກແຕນທຳລາຍຜົນລະປູກ, ດິນເຊາະເຈື່ອນ, ນໍ້າໄຫຼສຸ, ລົມພາຍຸພັດ, ໄຟໄໝ້ ແລະ ອື່ນໆ. ເປັນຕົ້ນແມ່ນໄດ້ຊ່ວຍເຫຼືອ ຄົນບ້າເສຍຈິດ, ເຖົ້າແກ່ອານາປ່ຽວພອຍ, ຄົນເປັນພະຍາດຫຼວງ, ເດັກນ້ອຍຝາແຝດ, ເດັກກຳພ້າ ຈຳນວນ 7 ເມືອງ 19 ບ້ານ, ຊ່ວຍເຫຼືອຄອບຄົວທີ່ຖືກ ພາຍຸພັດ, ໄຟໄໝ້ ຢູ່ 3 ເມືອງ 1 ນະຄອນ, ຊ່ວຍເຫຼືອເຂົ້າກິນໃຫ້ຄອບຄົວທີ່ຖືກຜົນກະທົບ ຈາກໄພແຫ້ງແລ້ງ, ສັດຕູພຶດທຳລາຍຜົນລະປູກ, ນໍ້າຖ້ວມ 11 ເມືອງ 1 ນະຄອນ ຈຳນວນ 238 ໂຕນ, ພ້ອມນັ້ນກໍໄດ້ແຈກຢາຍເຄື່ອງນຸ່ງຕື່ມອີກ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)