ມາຮອດປັດຈຸບັນ, ຄອບຄົວທຸກຍາກຢູ່ແຂວງໄຊສົມບູນ ເມື່ອປະເມີນຕາມດໍາລັດເລກທີ 309/ນຍ ວ່າດ້ວຍມາດຕະຖານຄວາມທຸກຍາກ ແລະ ມາດຕະຖານການພັດທະນາແລ້ວ ຍັງເຫລືອ 1.800 ກວ່າຄອບຄົວ, ແຕ່ຖ້າປະເມີນຕາມດຳລັດ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດ ທະນາ ຍັງເຫລືອເຖິງ 4.391 ຄອບຄົວ, 30% ຂອງຄອບຄົວທັງໝົດ, ຂະນະທີ່ບ້ານທຸກຍາກຍັງເຫລືອ 10 ກວ່າບ້ານໃນ 89 ບ້ານທົ່ວແຂວງ.

ທ່ານ ຄໍາລຽງ ອຸທະໄກສອນ ເຈົ້າແຂວງໆໄຊສົມບູນ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວວ່າ: ເພື່ອແກ້ໄຂຄອບຄົວທຸກຍາກທີ່ຍັງເຫລືອນັ້ນ, ຄະນະພັກ-ອົງການປົກຄອງແຂວງ ໄດ້ແຕ່ງຕັ້ງຄະນະສະເພາະກິດຂັ້ນແຂວງຂຶ້ນ ເພື່ອແກ້ໄຂບັນຫານີ້ເພາະຖືເປັນບັນຫາສໍາຄັນທີ່ສຸດ ຊຶ່ງປັດຈຸບັນສຳເລັດການລົງເກັບກຳຂໍ້ມູນຄືນໃໝ່ເພື່ອໃຫ້ໄດ້ຂໍ້ມູນທີ່ລະອຽດຈະແຈ້ງເຖິງສາເຫດທີ່ເຮັດໃຫ້ຄອບຄົວຍັງທຸກຍາກ. ພ້ອມນີ້ ໄດ້ກໍານົດເອົາແກ້ໄຂຄວາມທຸກຍາກຂອງປະຊາຊົນເຂົ້າໃນມະຕິກອງປະ ຊຸມໃຫຍ່ອົງຄະນະພັກແຂວງຄັ້ງທີ I ໂດຍໄດ້ວາງຄາດໝາຍໄວ້ວ່າ: ຮອດປີ 2025 ຄອບຄົວທຸກຍາກຕ້ອງຫລຸດລົງໃຫ້ເຫລືອບໍ່ເກີນ 185 ຄອບຄົວ ຫລື 1,97% ຂອງຄອບຄົວທີ່ມີພາຍໃນແຂວງ.

ເຈົ້າແຂວງໆໄຊສົມບູນ ກ່າວຕື່ມວ່າ: ສໍາລັບມາດຕະການ ຫລື ວິທີແກ້ໄຂຄວາມທຸກຂອງປະຊາ ຊົນນັ້ນ, ຄະນະພັກ-ອົງການປົກຄອງແຂວງ ໄດ້ວາງແຜນການໄວ້ລະອຽດແລ້ວລວມເຖິງໄດ້ກຽມທຶນ ຮອນ ແລະ ເນື້ອທີ່ດິນໃຫ້ແຕ່ລະຄອບຄົວທີ່ຍັງທຸກຍາກນໍາໃຊ້ຜະລິດ ຫລື ປະກອບອາຊີບຕາມຄວາມສາມາດຕົວຈິງເພື່ອເຮັດໃຫ້ມີອາຊີບ ແລະ ມີລາຍຮັບຄົງກ້າວໄປເຖິງການຫລຸດພົ້ນອອກຈາກຄວາມທຸກຍາກແບບຍືນຍົງ ໝາຍຄວາມວ່າ: ເມື່ອພົ້ນຈາກຄວາມທຸກຍາກແລ້ວ ບໍ່ກັບຄືນມາທຸກຍາກອີກ. ເຊັ່ນດຽວກັບບ້ານທຸກຍາກທີ່ຍັງເຫລືອ 10 ກວ່າບ້ານນັ້ນ ໄດ້ວາງແຜນການ ແລະ ມາດຕະການແກ້ໄຂແຕ່ລະປີຢ່າງລະອຽດແລ້ວ ຊຶ່ງຂໍຢືນຢັນວ່າ ຖ້າຢາກແກ້ໄຂບ້ານທຸກຍາກໄດ້ ກ່ອນອື່ນໝົດຕ້ອງສຸມໃສ່ແກ້ໄຂຄອບຄົວທຸກຍາກທີ່ຍັງເຫລືອໃຫ້ໄດ້ກ່ອນ ຈຶ່ງຈະກ້າວໄປເຖິງການແກ້ໄຂບ້ານທຸກຍາກທີ່ຍັງເຫລືອໃຫ້ໝົດໄປ ຊຶ່ງຄະນະພັກ-ອົງການປົກຄອງແຂວງເຊື່ອໝັ້ນວ່າ ຈາກທ່າແຮງການພັດທະນາທີ່ມີຈະເຮັດໃຫ້ການແກ້ໄຂຄອບຄົວ ແລະ ບ້ານທຸກຍາກທີ່ຍັງເຫລືອບັນລຸຜົນເປັນຈິງຕາມຄາດໝາຍວາງໄວ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)