ເຈົ້າໜ້າທີ່ພະແນກກະສິກຳ ແລະ ປ່າໄມ້ແຂວງບໍລິຄຳໄຊ ບອກວ່າ: ການສົ່ງເສີມກະສິກອນຜະລິດເປັນສິນຄ້າທັງລະດູແລ້ງ ແລະ ລະດູຝົນປີຜ່ານມາ ຊຶ່ງເບື້ອງຕົ້ນຈະປູກພືດໃນເນື້ອທີ່ 20 ພັນກວ່າເຮັກຕາເຊັ່ນ: ອ້ອຍ, ສາລີອາຫານສັດ, ມັນຕົ້ນ, ໝາກຫຸ່ງ, ພືດຕ່າງໆ, ໝາກກ້ວຍ, ໝາກນັດ ແລະ ພາຍຫລັງປູກຕົວຈິງ ໄດ້ກວ່າ 99% ຂອງແຜນການ ໂດຍເປັນຜົນມາຈາກເນື້ອທີ່ 300 ກວ່າເຮັກຕາເສຍຫາຍຈາກໄພທຳມະຊາດໂດຍສະເພາະການປູກຢາສູບໄດ້ພຽງແຕ່ 300 ກວ່າເຮັກຕາຄືບັນລຸ56% ແລະ ພາຍຫລັງການເກັບກູ້ກໍ່ໄດ້ຮັບຜົນຜະລິດ 500 ກວ່າໂຕນ ມູນຄ່າກວ່າ 10 ຕື້ກີບ. ໃນຄວາມເປັນຈິງນັ້ນເຖິງວ່າບໍ່ໄດ້ຕາມເປົ້າໝາຍທີ່ວາງໄວ້, ແຕ່ກໍ່ສ້າງລາຍຮັບໃຫ້ແກ່ຊາວສວນຢາສູບຫລາຍສົມຄວນ ທັງສາມາດເຮັດໃຫ້ຄວາມທຸກຍາກຂອງປະຊາຊົນຄ່ອຍໆຫລຸດໜ້ອຍຖອຍລົງ. ຂະນະທີ່ປີນີ້, ຈະສູ້ຊົນປູກໃຫ້ໄດ້ກວ່າ 560 ເຮັກຕາ.

ທ່ານ ຄຳແພງ ປະຊາຊົນບ້ານສີສົມໄຊ ເມືອງທ່າພະບາດ ແຂວງບໍລິຄຳໄຊ ໃຫ້ສຳພາດວ່າ:  ຫລາຍປີມານີ້ມີບໍລິສັດໜຶ່ງສະໜອງແນວພັນຢາສູບໃຫ້ປູກລ້າທັງເກັບຊື້ຜົນຜະລິດຄືນບວກໃສ່ການເອົາ ໃຈໃສ່ຈາກພາກສ່ວນກ່ຽວຂ້ອງ ໂດຍສະເພາະເຈົ້າໜ້າທີ່ກະສິກຳ ແລະ ປ່າໄມ້ເມືອງ, ແຂວງ ຈຶ່ງເຮັດໃຫ້ຄອບຄົວພັດທະນາດີຂຶ້ນຕ່າງຈາກເມື່ອກ່ອນ. ທັງນີ້ພາຍຫລັງສຳເລັດການເກັບກ່ຽວເຂົ້ານາປີສກໍ່ໄດ້ສືບຕໍ່ຜະລິດພືດລະດູແລ້ງ ຊຶ່ງຄອບຄົວຂ້ອຍເນັ້ນປູກຢາສູບເປັນຕົ້ນຕໍ. ພົ້ນເດັ່ນປີຜ່ານມາ, ສາມາດເກັບກູ້ຜົນຜະລິດຢາສູບຂາຍເປັນສິນຄ້າສ້າງລາຍຮັບເຂົ້າຄອບຄົວໄດ້ເຖິງ 60 ລ້ານກີບ. ຈາກການຜະ ລິດເປັນສິນຄ້າດັ່ງກ່າວເຮັດໃຫ້ປັດຈຸບັນມີເງິນກໍ່ສ້າງເຮືອນຖາວອນ, ຊື້ລົດເມແລ່ນໂດຍສານ 1 ຄັນ, ລົດຮຸນໄດບັນທຸກ 1 ຄັນ ທັງມີເງິນສົ່ງເສີມລູກ 5 ຄົນຮຽນໜັງສືນັບແຕ່ປະຖົມຮອດມະຫາວິທະຍາໄລທຸກຄົນ, ຕັ້ງຮ້ານຂາຍເຄື່ອງກໍ່ສ້າງ ແລະ ທັງໝົດຍ້ອນການປະກອບອາຊີບຜະລິດຢາສູບຂາຍເປັນສິນ ຄ້າ.ສຳລັບປີນີ້, ໄດ້ລົງທຶນເຊົ່າດິນ ແລະ ນຳໃຊ້ດິນນາຂອງຕົນປູກຢາສູບເນື້ອທີ່ 10 ໄລ່ ແລະ ຄາດວ່າພາຍຫລັງເກັບກູ້ຂາຍອອກໝົດຈະສ້າງລາຍຮັບຫລາຍກວ່າ 60 ລ້ານກີບຄືປີຜ່ານມາ.

Medialaos MM (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)