ທ່ານ ນາງ ແກ້ວໄລວຽງ ຍືນມະນີ ຮອງນາຍບ້ານ #ບ້ານດາກວາງ #ເມືອງດາກຈຶງ #ແຂວງເຊກອງ ໃຫ້ສຳພາດຕໍ່ສື່ມວນຊົນ ໃນວັນທີ 5 ກຸມພາ ຜ່ານມາວ່າ: ໃນບັ້ນເລືອກຕັ້ງສະມາຊິກສະພາແຫ່ງຊາດ ( ສສຊ) ຊຸດທີ IX ແລະສະພາປະຊາຊົນແຂວງ (ສສຂ) ຊຸດທີ II, ອຳນາດການປົກຄອງບ້ານດາກວາງ ແມ່ນເປັນສ່ວນໜຶ່ງທີ່ໄດ້ປະກອບສ່ວຍຢ່າງຕັ້ງໜ້າສ້າງຂະບວນຮອບດ້ານ ເພື່ອກະກຽມຄວາມພ້ອມໃຫ້ແກ່ບັ້ນເລືອກຕັ້ງ ສສຊ , ສສຂ ເປັນຕົ້ນໄດ້ມີການຈັດກອງປະຊຸມຂັ້ນບ້ານ ແລະລົງເກັບກຳຂໍ້ມູນດ້ານປະຊາກອນ ພາຍໃນບ້ານ, ຊຶ່ງສາມາດສັງລວມໄດ້ມີພົນລະເມືອງໝົດ 448 ຄົນ, ຍິງ 227 ຄົນ, ຜູ້ທີ່ມີອາຍຸ 18 ປີຂຶ້ນໄປມີຈຳນວນ 206 ຄົນ, ຍິງ 122 ຄົນ, ຜູ້ມີໜ້າປ່ອນບັດຕົວຈິງ 206 ຄົນ, ຍິງ 122 ຄົນ.


ພ້ອມນີ້ ຍັງໄດ້ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບພາຍໃນບ້ານ ໂດຍແມ່ນ ປກຊ-ປກສ ບ້ານໄດ້ປະຕິບັດໜ້າທີ່ອອກລາຕະເວນ, ປ້ອງກັນເວນຍາມພາຍໃນບ້ານຢ່າງເຂັ້ມງວດ ເພື່ອຮັກສາຄວາມສະຫງົບ, ຄວາມເປັນລະບຽບຮອບຮ້ອຍພາຍໃນບ້ານ; ພ້ອມນີ້ ກໍໄດ້ປຸກລະດົມໃຫ້ປະຊາຊົນພາຍໃນບ້ານອອກແຮງງານລວມ ຕາມສະຖານທີ່ຕ່າງໆ ເປັນຕົ້ນ ແມ່ນຕາມຖະໜົນຫົນທາງ ແລະຂອບເຂດຄວາມຮັບຜິດຊອບຂອງຕົນ ເພື່ອຮັກສາຄວາມສະອາດ ງາມຕາ ແລະຄວາມເປັນລະບຽບຮຽບຮ້ອຍພາຍໃນບ້ານ ແລະໄດ້ປຸກລະດົມປະຊາຊົນໃຫ້ເກັບກ່ຽວຜົນຜະລິດໃຫ້ສໍາເລັດກ່ອນມື້ເລືອກຕັ້ງ ເພື່ອໃຫ້ຜູ້ມີສິດປ່ອນບັດໄດ້ມາໃຊ້ສິດຂອງຕົນເອົາເລືອກຜູ້ແທນສະພາຄັ້ງນີ້ໃຫ້ຄົບຖ້ວນ.


ນອກນີ້ ຍັງຈະໄດ້ຮຽກເຊີນປະຊາຊົນບັນດາເຜົ່າຜູ້ມີສິດປ່ອນບັດ ເຕົ້າໂຮມເພື່ອແຈ້ງວັນເວລາມື້ປ່ອນບັດ ແລະແນະນໍາວິທີການໃນການປ່ອນບັດ, ທັງນີ້ເພື່ອເຮັດໃຫ້ປະຊາຊົນເຊື່ອມຊຶມ, ເຂົ້າໃຈຢ່າງເລິກເຊິ່ງເຖິງຂັ້ນຕອນ, ວິທີການໃນການປ່ອນບັດ, ພ້ອມທັງປຸກລະດົມຜູ້ທີ່ມີອາຍຸ 18 ຂຶ້ນໄປ ຕ້ອງໄດ້ມາໃຊ້ສິດຂອງຕົນໃນມື້ປ່ອນບັດ ໃຫ້ໄດ້100%, ພ້ອມນີ້ ຈະໄດ້ແຕ່ງຕັ້ງຄະນະຮັບຜິດຊອບໃນການແຈກຢາຍບັດ, ແນະນໍາການຂີດບັດ ແລະການປ່ອນບັດໃຫ້ລະອຽດ ເພື່ອຮັບປະກັນບໍ່ໃຫ້ມີບັດຕາຍ.
ໂອກາດນີ້ ນາຍບ້ານໆດາກວາງ ຍັງໄດ້ຮຽກຮ້ອງມາຍັງປະຊາຊົນບັນດາເຜົ່າ ໃຫ້ມາໃຊ້ສິດໃຊ້ສຽງຂອງຕົນຢ່າງເຕັມສ່ວນ ໃນການເລືອກເອົາຜູ້ແທນປະຊາຊົນຜູ້ທີ່ມີຄວາມຮູ້ຄວາມສາມາດ ມາເປັນຕົວແທນປະຊາຊົນ ແລະເພື່ອປະຊາຊົນຢ່າງແທ້ຈິງ, ທັງນີ້ ເພື່ອເຮັດໃຫ້ບັ້ນເລືອກຕັ້ງໃນຄັ້ງນີ້ສຳເລັດຕາມລະດັບຄາດໝາຍທີ່ວາງໄວ້.