ໃນວັນທີ 21 ກຸມພາທີ່ຈະມາເຖິງນີ້ ແມ່ນວັນກໍານົດ #ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ #ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ຢ່າງເປັນເອກະພາບກັນໃນທົ່ວປະເທດ, ປະຊາຊົນບັນດາເຜົ່າ ແລະຊັ້ນຄົນຕ່າງໆຜູ້ທີ່ມີອາຍຸ 18 ປີຂຶ້ນໄປ ຈະໄດ້ໄປໃຊ້ສິດເລືອກຕັ້ງເອົາສະມາຊິກສະພາແຫ່ງຊາດ ແລະສະມາຊິກສະພາປະຊາຊົນຂັ້ນແຂວງ ເພື່ອເປັນຕົວແທນຂອງທຸກຄົນເຂົ້າປະຕິບັດໜ້າທີ່ໃນສະພາ ເຊິ່ງການເລືອກຕັ້ງຄັ້ງນີ້ #ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ #ແຂວງເຊກອງ ໄດ້ມີການກະກຽມບຸກຄະລາກອນສື່ມວນຊົນ ເພື່ອຮັບໃຊ້ບັ້ນເລືອກຕັ້ງໃຫ້ມີຜົນສໍາເລັດຕາມລະດັບຄາດໝາຍ ແລະຮັບປະກັນໃຫ້ໄດ້ຮ້ອຍສວ່ນຮ້ອຍ.
ທ່ານ ຈັນໄທ ຄໍາມະນີວົງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງເຊກອງໃຫ້ສໍາພາດຕໍ່ນັກຂ່າວວ່າ: ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ໃນນາມຂະແໜງການສື່ມວນຊົນທີ່ເຮັດໜ້າທີ່ໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍ ແລະແຜນພັດທະນາເສດຖະກິດ-ສັງຄົມຂອງລັດ ກໍໄດ້ມີການກະກຽມພະນັກງານສື່ມວນຊົນຂັ້ນແຂວງ ແລະເມືອງ ເພື່ອເຄື່ອນໄຫວຮັບໃຊ້ບັ້ນເລືອກຕັ້ງຄັ້ງນີ້ໃຫ້ພຽງພໍ, ທັງຮັບປະ ກັນໃຫ້ມີຜົນສໍາເລັດຕາມລະດັບຄາດໝາຍ ແລະຮັບປະກັນໄດ້ຮ້ອຍສ່ວນຮ້ອຍ, ແຕ່ແນວໃດກໍດີ ສະເພາະພະນັກງານສື່ມວນຊົນທີ່ເຮັດວຽກງານວິຊາສະເພາະ ກໍຕ້ອງໄດ້ຕັດສິນໃຈທຸ້ມເຫື່ອເທແຮງເຂົ້າໃສ່ໃນວຽກງານທີ່ຕົນຮັບຜິດຊອບດ້ວຍຄວາມຮັບຜິດຊອບສູງ, ເພື່ອຮັບປະກັນທາງດ້ານເນື້ອໃນໃຫ້ໄດ້ຮ້ອຍສ່ວນຮ້ອຍ ແລະວ່ອງໄວທັນກັບເຫດການທີ່ເກີດຂຶ້ນ.
ທ່ານຮອງຫົວໜ້າພະແນກ ຖວທ ແຂວງເຊກອງ ຍັງໄດ້ເຊີນຊວນມາຍັງປະຊາຊົນລາວບັນດາເຜົ່າເວົ້າລວມ ໂດຍສະເພາະປະຊາຊົນຊາວແຂວງເຊກອງຜູ້ທີ່ມີອາຍຸ 18 ປີຂຶ້ນໄປຈົ່ງພ້ອມກັນໄປໃຊ້ສິດ ປະຊາທິປະໄຕຂອງຕົນ ເລືອກເອົາສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງ ເພື່ອເປັນຕົວແທນໃຫ້ແກ່ປະຊ.ນເຂົ້າໄປເຮັດໜ້າທີ່ໃນສະພາໃນການພິຈາລະນາແກ້ໄຂບັນຫາສໍາຄັນຕ່າງໆຂອງປະເທດຊາດບ້ານເມືອງ ແລະສິ່ງສໍາຄັນແມ່ນເພື່ອປົກປ້ອງສິດຜົນປະໂຫຍດຂອງປະຊາຊົນຢ່າງແທ້ຈິງ