ວັນທີ 8 ກຸມພາ 2021, ທີ່ກະຊວງສາທາລະນະສຸກ ໄດ້ມີພິທີມອບ-ຮັບ ວັກຊີນ ປ້ອງກັນພະຍາດ ໂຄວິດ-19 ໂດຍໄດ້ຮັບການຊ່ວຍເຫຼືອຈາກ ສປ ຈີນ. ພິທີມອບ-ຮັບດັ່ງກ່າວ ໄດ້ຮັບກຽດ ຈາກທ່ານ ສະຫາຍ ພັນຄຳ ວິພາວັນ, ຮອງປະທານປະເທດ ແຫ່ງ ສປປ ລາວ ເປັນຜູ້ຮັບ ແລະ ສະຫາຍ ຈ່ຽງ ຈາຍຕຸ່ງ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປຈີນ ປະຈຳ ສປປ ລາວ ເປັນຜູ້ມອບ.

ຢາວັກຊິນປ້ອງກັນພະຍາດໂຄວິດ-19 ທີ່ລັດຖະບານຈີນ ໄດ້ນຳມາມອບໃຫ້ ລັດຖະບານລາວ ມີຈຳນວນ 300,000 ໂດສ, ເຊີແລງຈຳນວນ 300,800
ອັນ ພ້ອມທັງຊ່ວຍດ້ານການຂົນສົ່ງ, ເພື່ອນຳໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດ ໂຄວິດ-19 ຢູ່ ສປປ ລາວ.

ສະຫາຍ ຈ່ຽງ ຈາຍຕຸ່ງ, ເອກອັກຄະລັດຖະທູດ ສປ ຈີນ ປະຈຳ ສປປ ລາວ ກໍໄດ້ສະແດງຄວາມເປັນຫ່ວງເປັນໃຍ ແລະ ໃຫ້ການຊ່ວຍເຫຼືອອັນລ້ຳຄ່າ ແກ່ລັດຖະບານ ກໍຄື ປະຊາຊົນລາວ. ພ້ອມທັງ ໄດ້ຕີລາຄາສູງ ຕໍ່ການຊ່ວຍເຫຼືອອັນສະເໝີຕົ້ນສະເໝີປາຍ ແລະ ທັນການ ບໍ່ວ່າຈະເປັນ ທາງດ້ານອຸປະກອນການເເພດ, ໜ້າກາກອານະໄມ, ນ້ຳຢາກວດເຊື້ອພະຍາດ ລວມທັງ ຢາວັກຊິນ ເພື່ອປ້ອງກັນພະຍາດໂຄວິດ-19 ໃນໄລຍະຜ່ານມາ ກໍຄື ການຊ່ວຍເຫຼືອເພີ່ມໃໝ່ໃນ
ຄັ້ງນີ້.

ການຊ່ວຍເຫຼືອດັ່ງກ່າວ, ເປັນການສະແດງເຖິງນ້ຳໃຈເອື້ອເຝື້ອເພື່ອແຜ່ຂອງລັດຖະບານ ແລະ ປະຊາຊົນຈີນ ເຊິ່ງເປັນການສະແດງເຖິງ ການເປັນເພື່ອນມິດສະຫາຍ ອ້າຍນ້ອງ ທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍ ແລະ ເຂົ້າສູ່ລວງເລິກຢ່າງບໍ່ຢຸດຢັ້ງ.

ຕາງໜ້າໃຫ້ຄະນະສະເພາະກິດ, ລັດຖະບານ ສປປ ລາວ ລວມໄປເຖີງ ແພດໝໍທຸກຄົນ ແລະ ປະຊາຊົນລາວ ຂໍສະແດງຄວາມ ຂອບອົກຂອບໃຈອັນລົ້ນເຫຼືອ ແລະ ຮູ້ບຸນຄຸນມາຍັງ ລັດຖະບານຈີນ ກໍ່ຄື ປະຊາຊົນຈີນ ທີ່ຍາມໃດກໍ່ເປັນຫວ່ງເປັນໃຍ ແລະ ໃຫ້ການຊ່ວຍເຫລືອມາຍັງເພື່ອນມິດ ພ້ອມທັງຢືນຄຽງຂ້າງ ສປປ ລາວ ມາໂດຍຕະຫລອດ. ພວກເຮົາທັງສອງຊາດເປັນເພື່ອນມິດຍຸດທະສາດຈະສືບຕໍ່ ແລະ ຫັດແໜ້ນຄວາມສາມັກຄີສອງປະເທດໃຫ້ໝັ້ນຍືນເລື້ອຍໆ ແລະ ຮ່ວມແຮງຮ່ວມໃຈ ພ້ອມກັນຜ່ານຜ່າ ການລະບາດພະຍາດໂຄວິດ -19 ໄປດ້ວຍກັນ.

Medialaos MMD