ໃນຕອນເຊົ້າຂອງວັນທີ 10 ເດືອນກັນຍາ 2019 ຜ່ານມາ. ທ່ານ ພົນໂທ ແສງນວນ ໄຊຍະລາດ ເລຂາທິການສູນກາງພັກ ຮອງປະທານສະພາແຫ່ງຊາດ, ທັງເປັນສະມາຊິກສະພາແຫ່ງຊາດ (ສພຊ) ປະຈໍາເຂດເລືອກຕັ້ງທີ 13 ແຂວງສະຫວັນນເຂດ ພ້ອມດ້ວຍຄະນະສະມາຊິກສະພາປະຊາຊົນແຂວງ (ສພຂ) ປະຈຳເມືອງ ໄດ້ລົງເຄື່ອນໄຫວພົບປະຢ້ຽມຢາມ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ແລະ ຂອງສະພາປະຊາຊົນແຂວງ ຊຸດທີ I ຢູ່ທີ່ສະໂມສອນຂອງເມືອງອຸທຸມພອນ.

ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ແມ່ນໄດ້ຮັບຟັງບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ 4 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນການໃນ 6 ເດືອນທ້າຍປີ 2019, ຮັບຟັງບົດລາຍງານຂອງລັດຖະບານ ກ່ຽວກັບຜົນການຈັດຕັ້ງປະຕິບັດມະຕິກອງປະຊຸມ ສະພາແຫ່ງຊາດ ສະບັບເລກທີ 081/ສພຊ ລົງວັນທີ 17 ພະຈິກ 2017 ວ່າດ້ວຍວຽກງານທ່ອງທ່ຽວຕິດ ພັນກັບການຈັດຕັ້ງປະຕິບັດປີທ່ອງທ່ຽວ ລາວ-ຈີນ ປີ 2019, ຮັບຟັງບົດລາຍງານກ່ຽວກັບການພັດທະນາ ຊັບພະກອນມະນຸດ ທີ່ຕິດພັນກັບການພັດທະນາເສດຖະກິດ-ສັງຄົມໃນແຕ່ລະໄລຍະ ໂດຍສະເພາະການສ້າງຊັບພະ ຍາກອນມະນຸດໃຫ້ໄປຕາມບຸລິມະສິດເປັນຕົ້ນວິຊາສະເພາະດ້ານ ໃນສາຂາວິຊາກະສິກໍາ, ຄູ ແລະ ພະຍາບານ ເພື່ອສາມາດຕອບສະໜອງໃຫ້ແກ່ການພັດທະນາປະເທດຊາດ ແລະ ແກ້ໄຂຄວາມທຸກຍາກ, ຮັບຟັງກ່ຽວກັບ ຜົນການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ສະບັບເລກທີ 080/ສພຊ ລົງວັນທີ 17 ພະຈິກ 2017 ວ່າດ້ວຍການຈັດຕັ້ງປະຕິບັດຄໍາຕັດສິນຂອງສານ, ກອງປະຊຸມຍັງໄດ້ພິຈາລະນາເນື້ອໃນທັງໝົດ 10 ເນື້ອໃນ ແລະ ໄດ້ຮັບຮອງເປັນມະຕິຂອງກອງປະຊຸມສາໄໝສາມັນ ເທື່ອທີ 7 ລວມມີ 8 ເນືອໃນເຊັ່ນ:

ຮັບຮອງເອົາ ບາງມາດຖານເພີ່ມເຕີມເພື່ອມອບໃຫ້ລັດຖະບານສືບຕໍ່ຊີ້ນໍາ-ນໍາພາ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນດັດແກ້ງົບປະມານແຫ່ງລັດ 6 ເດືອນທ້າຍປີ 2019, ຮັບຮອງເອົາ ການຄຸ້ມຄອງການອອກໃບຕາດິນຊໍ້າຊ້ອນໃນໄລຍະຜ່ານມາ ແລະ ມາດຕະການຕໍ່ໜ້າ, ຮັບຮອງເອົາ ບົດລາຍງານຂອງລັດຖະບານ ຊີ້ແຈ້ງຕໍ່ການຊັກຖາມກ່ຽວກັບການຟື້ນຟູປ່າໄມ້ ແລະ ປູກໄມ້, ຮັບຮອງເອົາ ບົດລາຍງານຂອງລັດຖະບານ ກ່ຽວກັບການພັດທະນາຊັບພະຍາກອນມະນຸດ ຕາມຂະແໜ່ງການບູລິມະສິດ ສາຂາວິຊາກະສິກໍາ, ຄູ ແລະ ພະຍາບານ, ກອງປະຊຸມໄດ້ເລືອກຕັ້ງເອົາ ທ່ານ ຄໍາພາ ແສງດາລາ ເປັນປະທານສານປະຊາຊົນສູງສຸດ ແລະ ຮັບຮອງແຕ່ງຕັ້ງ ທ່ານ ວິດົງ ໄຊຍະສອນ ເປັນລັດຖະມົນຕີ ປະຈໍາສໍານັກງານນາຍົກລັດຖະມົນຕີ, ກອງປະຊຸມໄດ້ພິຈາລະນາຮັບຮອງເອົາບົດລາຍງານ ຂອງລັດຖະບານ ກ່ຽວກັບການຈັດຕັ້ງປະຕິບັດຄໍາຕັດສິນຂອງສານໃຊ້ຢ່າງເດັດຂາດ ຕາມມະຕິກອງປະຊຸມສະພາແຫ່ງຊາດ ສະບັບເລກທີ 080/ສພຊ. ພິຈາລະນາຮັບຮອງເອົາບົດລາຍງານ ຂອງອົງການໄອຍະການປະຊາ ຊົນສູງສຸດ ກ່ຽວກັບການຕິດຕາມກວດກາປະຕິບັດກົດໝາຍ ແລະ ອົງການສືບສວນ-ສອບສວນ, ພິຈາລະນາ ແລະ ຮັບຮອງເອົາກົດໝາຍສະບັບປັບປຸງ ແລະ ກົດໝາຍສ້າງໃໝ່ຈໍານວນ 10 ສະບັບ ດ້ວຍຄະແນນສຽງສ່ວນຫຼາຍ, ກອງປະຊຸມຍັງໄດ້ຮັບຟັງການລາຍງານ ສະພາບການຊີ້ນໍາ-ນໍາພາ ຂອງຄະນະປະຈໍາສະພາແຫ່ງຊາດ ຕໍ່ ວຽກງານສະພາແຫ່ງຊາດໃນ 6 ເດືອນຕົ້ນປີ ແລະ ກໍານົດແຜນວຽກຈຸດສຸມ 6 ເດືອນທ້າຍປີ 2019.

ຈາກນັ້ນ ທ່ານ ນາງ ຄຳເພັງ ວິໄລທອງ ສະມາຊິກສະພາແຫ່ງຊາດ ທັງເປັນສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງອຸທຸມພອນ ກໍ່ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ I.
ຈຸດປະສົງຂອງການລົງເຜີຍແຜ່ໃນຄັ້ງນີ້; ກໍເພື່ອເຮັດໃຫ້ພະນັກງານ-ລັດຖະກອນ, ທະຫານ-ຕໍາຫລວດ, ອໍານາດການປົກຄອງບ້ານ ຕະຫລອດຮອດພໍ່ແມ່ປະຊາຊົນ ຢູ່ທ້ອງຖິ່ນ ແລະ ຮາກຖານ ໄດ້ມີຄວາມຮັບຮູ້ ແລະ ເຂົ້າໃຈຕໍ່ແນວທາງແຜນນະໂຍບາຍຂອງພັກ ເວົ້າລວມ-ເວົ້າສະເພາະ ກໍ່ຄືວຽກງານຂອງສະພາແຫ່ງຊາດ (ສພຊ) ແລະ ຂອງສະພາປະຊາຊົນແຂວງ (ສພຂ) ທັງເປັນການເກັບກຳສະພາບການ, ການປະກອບຄຳຄິດ-ຄຳເຫັນ, ຄຳສະ ເໜີຕ່າງໆ ຂອງປະຊາຊົນໃນເຂດເລືອກຕັ້ງ ຕໍ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມທັງຮັບຟັງການລາຍງານສະພາບການພັດທະນາເສດຖະກິດ-ສັງຄົມ ຂອງເມືອງ.

ພາບ – ຂ່າວ: ພອນປະເສີດ ແຜນພັກດີ