ໃນວັນທີ 8 ກຸມພາ 2021 ນີ້, ທ່ານ ສຈ.ປອ ກິແກ້ວ ໄຂຄຳພິທູນ, ກຳມະການກົມການເມືອງສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກຳມະການຄະນະກຳມະການເລືອກຕັ້ງລະດັບຊາດ, ກຳມະການອະນຸກຳມະການໂຄສະນາປຸກລະດົມຂະບວນການ ພ້ອມດ້ວຍຄະນະ ໄດ້ລົງຕິດຕາມການຝຶກອົບຮົມ ແລະ ປຸກລະດົມຂະບວນການໃນບັ້ນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນຂັ້ນໍແຂວງຊຸດທີ II ທີ່ຫ້ອງວ່າການປົກຄອງແຂວງສະຫວັນນະເຂດ ໂດຍມີ ທ່ານ ສັນຕິພາບ ພົມວິຫານ, ເລຂາພັກແຂວງ, ເຈົ້າແຂວງສະຫວັນນະເຂດ ພ້ອມດ້ວຍຄະນະນຳຈາກຂະແໜງການຕ່າງໆພາຍໃນແຂວງເຂົ້າຮ່ວມ.

ພາຍໃນງານແມ່ນໄດ້ຮັບຟັງການລາຍງານ ຈາກທ່ານ ຄຳຜັນ ຄູນສະຫວັນ ຄະນະປະຈຳພັກແຂວງ, ຮອງປະທານສະພາປະຊາຊົນຂັ້ນແຂວງສະຫວັນນະເຂດ ກ່ຽວກັບຜົນສຳເລັດໃນການເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກ່ຽວກັບການໂຄສະນາ, ປຸກລະດົມຂົນຂວາຍ ແລະ ຍ້ອງຍໍຢູ່ເຂດເລືອກຕັ້ງ 14 ເມືອງ ແລະ 1 ນະຄອນຫຼວງ. ພາຍຫຼັງໄດ້ຮັບຄຳແນະນຳຂອງຄະນະກຳມະການເລືອກຕັ້ງຂັ້ນແຂວງກ່ຽວກັບການຝຶກອົບຮົມໃຫ້ຄະນະກຳມະການຂັ້ນເມືອງ ແລະ ບັນດາອະນຸກຳມະການທີ່ເປັນກົງຈັກຊ່ວຍວຽກ, ການໂຄສະນາ ແລະ ປຸກລະດົມຂະບວນການ, ການໂຄສະນາຫາງສຽງ ໃຫ້ຜູ້ສະໝັກຮັບເລືອກຕັ້ງເພື່ອກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງຊຸດທີ II.

ຄະນະກຳມະການຂັ້ນເມືອງກໍ່ໄດ້ຈັດຕັ້ງກອງປະຊຸມຝຶກອົບຮົມໃຫ້ແກ່ຄະນະກຳມະການໃນຂັ້ນຂອງຕົນ, ບັນດາອະນຸກຳມະການທີ່ເປັນກົງຈັກຊ່ວຍວຽກ ຫົວໜ້າ ແລະ ຮອງຫົວໜ້າຫ້ອງການ, ອົງການລັດທຽບເທົ່າຂັ້ນເມືອງ ແລະ ເປົ້າໝາຍອື່ນໆທີ່ຈຳເປັນ ແມ່ນໄດ້ປະຕິບັດສຳເລັດທຸກເມືອງແລ້ວ, ການເກັບກຳສະຖິຕິຈຳນວນຜູ້ມີສິດເລືອກຕັ້ງແມ່ນສຳເລັດເປັນສ່ວນຫຼາຍ ແລະ ໄດ້ສືບຕໍ່ເກັບກຳສະຖິຕິຈຳນວນຜູ້ມີສິດເລືອກຕັ້ງໃຫ້ສຳເລັດຕາມແຜນ ພ້ອມທັງກຳນົດຈຳນວນໜ່ວຍປ່ອນບັດໃນເມືອງຂອງຕົນ ເຊິ່ງໃນທົ່ວແຂວງມີຈຳນວນໜ່ວຍປ່ອນບັດທັງໝົດ 863 ໜ່ວຍ ມີຜູ້ເຂົ້າຮ່ວມທັງໝົດ 509 ທ່ານ, ຍິງ 243 ທ່ານ. ເຊິ່ງຍັງພົບບັນຫາ ແລະ ການສະເໜີຂອງເມືອງຕ່າງໆ ເປັນຕົ້ນແມ່ນ ງົບປະມານໃນການຮັບໃຊ້ວຽກງານເຫັນວ່າຍັງມີໜ້ອຍ ບໍ່ທັນພຽງພໍກັບຄວາມຕ້ອງການຕົວຈິງຂອງໜ້າທີ່ວຽກງານ, ອຸປະກອນຮັບໃຊ້ໃນການຈັດພິມເອກະສານ ຍັງຂາດແຄນ, ພາຫະນະໃນການຮັບໃຊ້ຍັງບໍ່ພຽງພໍ ເພາະວ່າເສັ້ນທາງໃນການລົງເຮັດວຽກແມ່ນໄກຫຼາຍ, ເຄື່ອງສຽງ ແລະ ອຸປະກອນຕ່າງໆ ເພື່ອຊ່ວຍບໍລິຫານຮັບໃຊ້ບັ້ນເລືອກຕັ້ງໃນຄັ້ງນີ້.

ຜ່ານການລົງຕິດຕາມກວດກາສາມາດຕີລາຄາໄດ້ດັ່ງນີ້:

  1. ຂອດປະສານງານລະຫວ່າງຄະນະກຳມະການເລືອກຕັ້ງຂັ້ນເມືອງ ໂດຍສະເພາະອະນຸກຳມະການໂຄສະນາ, ປຸກລະດົມຂົນຂວາຍ ແລະ ຍ້ອງຍໍຂັ້ນເມືອງ ກັບບັນດາຄະນະພັກຜູ້ຊີ້ນຳກຸ່ມບ້ານຍັງເຮັດບໍ່ໄດ້ດີເທົ່າທີ່ຄວນ ແລະ ຍັງບໍ່ທັນເຂົ້າໃຈວ່າຈະນຳເອົາບັນດາເອກະສານໃດແດ່ເພື່ອໂຄສະນາໃຫ້ປະຊາຊົນພາຍໃນເຂດກໍ່ຄືໃນບັນດາບ້ານໄດ້ເຂົ້າໃຈກ່ຽວກັບກຳນົດວັນເລືອກຕັ້ງ ແລະ ສິດ-ໜ້າທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ.
  2. ການເກັບກຳສະຖິຕິຜູ້ມີສິດປ່ອນບັດເລືອກຕັ້ງທີ່ມີອາຍຸ 18 ປີຂຶ້ນໄປແມ່ນຍັງພົບຄວາມຫຍຸ້ງຍາກໂດຍສະເພາະຜູ້ທີ່ຍົກຍ້າຍມາຈາກບ້ານອື່ນ ເມືອງອື່ນ ແລະ ແຂວງອື່ນ ຈຶ່ງເຮັດໃຫ້ວຽກງານເກັບກຳສະຖິຕິບໍ່ເປັນໄປຕາມແຜນ.
  3. ບັນດາໂຮງຈັກໂຮງງານ ໂດຍສະເພາະແມ່ນເມືອງອາດສະພັງທອງ ທາງຄະນະຮັບຜິດຊອບຍັງບໍ່ທັນໄດ້ລົງໄປເກັບກຳຕົວຈິງເທື່ອ ແລະ ອີກບັນຫາໜຶ່ງກໍ່ແມ່ນພົນລະເມືອງຂອງປະເທດຈີນໄດ້ອົບພະຍົບມາຢູ່ໃນບ້ານຫຼຽນໄຊ ເມືອງອາດສະພັງທອງ ເປັນເວລາ 23 ປີ ແລ້ວ ແຕ່ຍັງບໍ່ທັນມີສຳມະໂນຄົວ ແລະ ຍັງບໍ່ທັນໄດ້ຕັດສັນຊາດເທື່ອ.
  4. ສ່ວນຫຼາຍແມ່ນຍັງລໍຖ້າຄຳສັ່ງ ແລະ ຄຳແນະນຳຈາກຂັ້ນເທິງກ່ອນຈຶ່ງພາກັນລົງມືປະຕິບັດ ແລະ ການໂຄສະນາປຸກລະດົມກ່ຽວກັບການກະກຽມເລືອກຕັ້ງຍັງບໍ່ທັນເປັນຂະບວນການຟົດຟື້ນ.

ເຊິ່ງຍັງມີອີກຫຼາຍບັນຫາທີ່ເປັນສິ່ງທ້າທາຍ ໃຫ້ແກ່ການຈັດຕັ້ງປະຕິບັດໜ້າທີ່ວຽກງານໃນບັ້ນເລືອກຕັ້ງຄັ້ງນີ້ເປັນຕົ້ນແມ່ນ ຜົນຈາກການແຜ່ລະບາດຂອງພະຍາດໂຄວິດ -19.

ນອກຈາກນີ້ ທ່ານ ສຈ.ປອ ກິແກ້ວ ໄຂຄຳພິທູນ, ກຳມະການກົມການເມືອງສູນກາງພັກ, ລັດຖະມົນຕີກະຊວງຖະແຫຼງຂ່າວ. ວັດທະນະທຳ ແລະ ທ່ອງທ່ຽວ, ກຳມະການຄະນະກຳມະການເລືອກຕັ້ງລະດັບຊາດ, ກຳມະການອະນຸກຳມະການໂຄສະນາປຸກລະດົມຂະບວນການ ພ້ອມດ້ວຍຄະນະ ໄດ້ລົງຕິດຕາມ ແລະ ຮັບຟັງການລາຍງານສະພາບການໂດຍລວມຈາກຄະນະກຳມະການເລືອກຕັ້ງຢູ່ ເມືອງອຸທຸມພອນ ແລະ ຢ້ຽມຊົມການກະກຽມສະຖານທີ່ ຂອງໜ່ວຍເລືອກຕັ້ງຕົວຢ່າງ ຢູ່ບ້ານໄຊອຸດົມ ເມືອງອຸທຸມພອນ ແຂວງສະຫວັນນະເຂດອີກດ້ວຍ.

ໃນໂອກາດນີ້ ທ່ານ ສຈ.ປອ ກິແກ້ວ ໄຂຄຳພິທູນ, ກຳມະການກົມການເມືອງສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກຳມະການຄະນະກຳມະການເລືອກຕັ້ງລະດັບຊາດ, ກຳມະການອະນຸກຳມະການໂຄສະນາປຸກລະດົມຂະບວນການ ໄດ້ມີຄຳເຫັນ ຕໍ່ຄະນະກຳມະການເລືອກຕັ້ງຂັ້ນແຂວງ, ຂັ້ນເມືອງ ແລະ ຂັ້ນບ້ານ ໃຫ້ພ້ອມກັນເອົາໃຈໃສ່ໃນການຈັດຕັ້ງປະຕິບັດບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໃນຄັ້ງນີ້, ໃຫ້ມີຄວາມໜັກແໜ້ນ ແລະ ເນັ້ນປະສິດທີຜົນໃຫ້ສູງຂຶ້ນ, ການປັບປຸງກົງຈັກການເຮັດວຽກໃຫ້ມີປະສິດທິຜົນ, ການເພີ່ມຄຸນນະພາບໃຫ້ແກ່ບຸກຄະລາກອນທີ່ປະຕິບັດໜ້າທີ່ໃນບັ້ນເລືອກຕັ້ງໃນຄັ້ງນີ້ຢ່າງມີຄວາມຮັບຜິດຊອບສູງ ພ້ອມທັງມີແບບແຜນໃນການນຳພາທີ່ດີ, ສ່ອງແສງໃຫ້ສັງຄົມໄດ້ເຫັນເຖິງຄວາມສຳຄັນໃນບັ້ນເລືອກຕັ້ງໃນຄັ້ງນີ້ ເຊິ່ງຖືວ່າເປັນເຫດການສຳຄັນລະດັບຊາດ ພ້ອມດຽວກັນນີ້ ກໍ່ຖືເປັນການຮຽກຮ້ອງໃຫ້ປະຊາຊົນມີສ່ວນຮ່ວມໃນບັ້ນເລືອກຕັ້ງໃນຄັ້ງນີ້ຢ່າງຕັ້ງໜ້າ.

Medialaos MMD