ສະໂມສອນນະຄອນ ໄກສອນ ພົມວິຫານ ແຂ​ວງ​ສະຫວັນນະເຂດ ໄດ້ຈັດຊຸດຝຶກອົບຮົມໃຫ້ແກ່ພະນັກງານຫຼັກແຫຼ່ງຂັ້ນກອງບັນຊາການ ປກສ ນະຄອນ ໄກສອນ ພົມວິຫານ ໃນຕອນເຊົ້າຂອງວັນທີ 8 ກຸມພາ 2021 ເພື່ອກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ່ IX ແລະ ສະມາຊິກສະພາປະຊາຊົນແຂວງຊຸດທີ່ II.ໃຫ້ກຽດເຂົ້າຮ່ວມເປັນປະທານຂອງສະຫາຍ ພັທ ຄຳສີ ທູນທະວົງສັກ ຄະນະປະຈຳພັກນະຄອນ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ນະຄອນ ໄກສອນ ພົມວິຫານ,ມີ ຮອງເລຂາຄະນະພັກຮາກຖານກອງບັນຊາການ ປກສ ນະຄອນ ແລະ ພ້ອມດ້ວຍສະມາຊິກພັກ-ພະນັກງານເຂົ້າຮ່ວມຢ່າງພ້ອມພຽງ.

ໂອກາດນີ້ ສະຫາຍ ພັທ ຄຳສີ ທູນທະວົງສັກ ໄດ້ຍົກໃຫ້ເຫັນວ່າ: ການກະກຽມເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ໄດ້ໄຂຂຶ້ນໃນທ່າມກາງບັນຍາກາດ ທີ່ຊາວແຂວງສະ​ຫວັນ​ນ​ະເຂດກໍ່ຄືຊາວນະຄອນ ໄກສອນ ພົມວິຫານໄດ້ສຸມໃສ່ສ້າງຂະບວນການຮອບດ້ານ ເພື່ອຂໍ່ານັບຮັບຕ້ອນວັນເລືອກຕັ້ງ ສະມາຊິກສະແຫ່ງຊາດ ຊຸດທີlX ແລະ ສະມາຊິກສະພາປະຊາຊົນຂັ້ນແຂວງ ຊຸດ ທີ ll ຢ່າງເປັນຂະບວນການຟົດຟື້ນ. ສະນັ້ນ ເພື່ອເຮັດໃຫ້ການກະກຽມເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ເປັນບັ້ນສຶກສາອົບຮົມການເມືອງ-ແນວຄິດ ແລະ ເຊື່ອມຊຶມກໍາແໜ້ນແນວທາງນະໂຍບາຍຂອງພັກ ໃນການສ້າງລັດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ, ເສີມຂະຫຍາຍ ແລະ ປະຕິບັດສິດປະຊາທິປະໄຕຂອງພົນລະເມືອງ ຢ່າງຖືກຕ້ອງ, ຕັ້ງໜ້າແກ້ໄຂປະກົດການຫຍໍ້ທໍ້, ເອົາໃຈໃສ່ເຊີດຊູໃນການເຄົາລົບ, ປະຕິບັດກົດໝາຍໃນທົ່ວສັງຄົມ.

ທີ່ປະຊຸມຍັງໄດ້ຮັບຟັງການເຜີຍແຜ່ເຊື່ອມຊຶມ ມະຕິຂອງກົມການເມືອງສູນກາງພັກ ສະບັບເລກທີ 118/ກມສພ ວ່າດ້ວຍການເພີ່ມທະວີ ການຊີ້ນໍາ-ນໍາພາ ຂອງຄະນະພັກ ຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II, ເອກະສານ ເສີມຂະຫຍາຍສິດເປັນເຈົ້າຂອງປະຊາຊົນເຂົ້າໃນການເລືອກຕັ້ງ, ເອກະສານຖາມ-ຕອບ ສະພາແຫ່ງຊາດ ແລະ ສະພາປະຊາຊົນແຂວງ, ຮັບຟັງຄໍາແນະນໍາ ຂອງຄະນະກໍາມະການເລືອກຕັ້ງຂັ້ນແຂວງ ສະບັບເລກທີ 22/ຄລຂ,ສ​ຂ ກ່ຽວກັບການປ່ອນບັດ, ການນັບຄະແນນສຽງ ແລະ ການປະກາດຜົນຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II.ພ້ອມທັງໄດ້ຜ່ານແຜ່ນປ້ອງກັນການເລືອກຕັ້ງ ສະມາຊິກສະພາແຫ່ງຊາດ ຊຸດທີlX ແລະ ສະມາຊິກສະພາປະຊາຊົນຂັ້ນແຂວງ ຊຸດທີll ແລະ ປ້ອງກັນງານບຸນປີໃໝ່ຊາວຫວຽດນາມແລະຊາວຈີນຕື່ມອີກດ້ວຍ.
ພາບ-ຂ່າວ: ນະຄອນ ໄກສອນ ພົມວິຫານ.