ຄະນະກໍາມະການເລືອກຕັ້ງລະດັບຊາດ ເຊິ່ງນໍາໂດຍທ່ານ ສາສະດາຈານ ປອ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ,ລັດຖະມົນຕີກະຊວງ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ພ້ອມດ້ວຍທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ທັງເປັນປະທານການເລືອກຕັ້ງຂັ້ນແຂວງໄດ້ລົງຕິດຕາມເບິ່ງຄວາມພ້ອມໃນການເລືອກຕັ້ງ ສສຊ ຊຸດທີ 09 ແລະ ສສຂ ຊຸດທີ 02 ຂອງເມືອງອຸທຸມພອນ ໃນວັນທີ 08 ກຸມພາ 2021,ທີ່ຫ້ອງປະຊຸມຊັ້ນສອງ ຫ້ອງວ່າການເມືອງ,ໂດຍການເຂົ້າຮ່ວມຂອງທ່ານ ປະສົງສິນ ຈະເລີນສຸກ ຄະນະປະຈໍາພັກແຂວງ ເລຂາພັກເມືອງ ເຈົ້າເມືອງ,ທັງເປັນປະທານຄະນະກໍາມະການເລືອກຕັ້ງຂັ້ນເມືອງ,ພ້ອມຄະນະ.

ທ່ານ ປະສົງສິນ ຈະເລີນສຸກ ກໍ່ໄດ້ເປັນກຽດກ່າວລາຍງານໃນການກະກຽມການເລືອກຕັ້ງວ່າ: ປະຊາຊົນຜູ້ທີ່ມີອາຍຸແຕ່ 18 ປີຂື້ນມີ 63.995 ຄົນ,ຍິງ 32.734 ຄົນ,ມີໜ້າຕົວຈິງຢູ່ໃນບ້ານ 48.291 ຄົນ,ຍິງ 25.053 ຄົນ,ບໍ່ມີໜ້າຢູ່ໃນບ້ານ 15.704 ຄົນ,ຍິງ 7.681 ຄົນ,ເຊິ່ງໄປດໍາລົງຊີວິດຢູ່ທ້ອງຖິ່ນອື່ນ ເຊັ່ນວ່າ: ໄປອອກແຮງງານ,ໄປສຶກສາ,ໄປປ່ອນບັດຢູ່ເມືອງອື່ນ ແລະ ອື່ນໆ ປະຈຸບັນສະຖິຕິຍັງເໜັງຕີງຢູ່ ໂດຍສະເພາະ ແມ່ນກໍາມະກອນຢູ່ ບໍລິສັດ ນິຄອນ,ນັກສຶກສາທີ່ໄປຮຽນຢູ່ພາຍໃນແຂວງ,ຄົນລາວທີ່ໄປທໍາງານຢູ່ຕ່າງປະເທດ ແລະ ການຍົກຍ້າຍເຂົ້າ-ອອກ, ສ່ວນທາງດ້ານທ່ານ ພັນໂທ ບຸນເດັດ ແສນລາດ ຫົວໜ້າ ກອງບັນຊາການ ປກສ ເມືອງມີຄໍາເຫັນວ່າ: ບັນຫາທີ່ຍັງພົ້ນເດັ່ນພາຍໃນເມືອງ ກໍ່ແມ່ນບັນຫາຢາເສບຕິດ,ເກມພະນັນທາງອອນລາຍ,ຍັງມີຄົນຈໍານວນໜື່ງເຄື່ອນໄຫວລົງເຟັສໃສ່ຮ້າຍປ້າຍສີຕໍ່ເຈົ້າໜ້າທີ່.

ໂດຍທົ່ວເມືອງມີຜູ້ລົງສະໝັກ ສສຂ ທັງໝົດ 05 ທ່ານ,ມາຈາກແຂວງ 01 ທ່ານ,ເຊິ່ງການລົງໂຄສະນາຫາສຽງ ລົງພົບປະແນະນໍາຕົວຂອງ ສສຊ ແມ່ນກໍານົດເອົາ 02 ຈຸດຄື: ສະໂມສອນຂອງເມືອງ,ກອງພົນທະຫານຮາບທີ 04,ສ່ວນວ່າການລົງໂຄສະນາຫາສຽງ ລົງພົບປະແນະນໍາຕົວຂອງ ສສຂ ແມ່ນກໍານົດເອົາ 14 ຈຸດ,ມີໜ່ວຍປ່ອນບັດທັງໝົດ 88 ໜ່ວຍ,ໃນນີ້ ແບ່ງເປັນໜ່ວຍເລືອກຕັ້ງຂອງເມືອງ 75 ໜ່ວຍ ແລະ ຂອງກອງທັບ 13 ໜ່ວຍເລືອກຕັ້ງ

ໂອກາດດັ່ງກ່າວ ທ່ານ ສາສະດາຈານ ປອ ກິແກ້ວ ໄຂຄໍາພິທູນ ຄະນະກໍາມະການເລືອກຕັ້ງລະດັບຊາດ ກໍ່ເນັ້ນວ່າ: ການເລືອກຕັ້ງຄັ້ງນີ້ມີຄວາມສໍາຄັນຫຼາຍ,ການເລືອກຕັ້ງແຕ່ລະຂັ້ນ ແມ່ນເຫດການ ການເມືອງ,ແມ່ນພົວພັນເຖິງອໍານາດການປົກຄອງ,ອໍາອາດອະທິປະໄຕ,ການເລືອກຕັ້ງຄັ້ງນີ້ສືບຕໍ່ສ້າງບູລະນະ ປະຊາທິປະໄຕ ປະຊາຊົນ ແມ່ນການປະຕິບັດສິດເປັນເຈົ້າຂອງປະຊາຊົນ,ເປັນການປັບປຸງກົງຈັກການຈັດຕັ້ງໃຫ້ມີປະສິດທິພາບຈາກນັ້ນບັນດາທ່ານຄະນະດັ່ງກ່າວ ຍັງໄດ້ລົງໄປພົບປະຜູ້ມີສິດເລືອກຕັ້ງຢູ່ຫ້ອງການບ້ານໄຊອຸດົມ ຕື່ມອີກ