ໃນວັນທີ 8 ກຸມພາ 2021ນີ໊. ຜູ້ແທນສະໝັກເລືອກຕັ້ງສະມາຊິກສະພາແຫ່ງຊາດ ຊຸດທີ IX ເຂດເລືອກຕັ້ງທີ່ 7 ແຂວງໄຊຍະບູລີ ແລະ ສະມາຊິກສະພາປະຊາຊົນແຂວງໄຊຍະບູລີ ຊຸດທີ II ປະຈໍາເຂດເລືອກຕັ້ງເມືອງໄຊຍະບູລີ ໄດ້ລົງເຄື່ອນໄຫວສະເໜີຕົວຢູ່ ກ2 ໂດຍການໃຫ້ກຽດຕ້ອນຮັບຂອງສະຫາຍ ພັນເອກ ວຽງແກ້ວ ສີສຸລາດ ເລຂາຄະນະພັກ ຫົວໜ້າການເມືອງ ກ2 ພ້ອມດ້ວຍຄະນະ , ມີບັນດາສະຫາຍພະນັກງານ-ນັກຮົບ , ຄູ-ອາຈານ ແລະ ພໍ່ແມ່ປະຊາຊົນບ້ານໃຫຍ່ໂພນໄຊ ເຂົ້າຮ່ວມ.

ການລົງເຄື່ອນໄຫວຂອງຜູ້ແທນສະໝັກເລືອກຕັ້ງສະມາຊິກສະພາແຫ່ງຊາດ ຊຸດທີ IX ເຂດເລືອກຕັ້ງທີ 7ແລະ ສະມາຊິກສະພາປະຊາຊົນແຂວງໄຊຍະບູລີ ຊຸດທີ II ໃນຄັ້ງນີ້ກໍ່ເພື່ອພົບປະແນະນໍາຕົວຕໍ່ພະນັກງານ-ນັກຮົບ, ພໍ່ແມ່ປະຊາຊົນບ້ານໃຫຍ່ໂພນໄຊໄດ້ຮັບຮູ້ປະຫວັດການເຄື່ອນໄຫວຂອງຕົນໃນແຕ່ລະໄລຍະຜ່ານມາຈົນເຖິງປັດຈຸບັນ , ເພື່ອໃຫ້ພະນັກງານນັກຮົບ ແລະ ພໍ່ແມ່ປະຊາຊົນ ເຂົ້າໃຈເຖິງພາລາບົດບາດ ເພື່ອນຳໄປພິຈາລະນາໃນການໃຊ້ສິດຂອງຕົນເຂົ້າໃນການເລືອກຕັ້ງຜູ້ແທນຂອງຕົນເຂົ້າໄປນັ່ງໃນສະພາເພາະການເລືອກຕັ້ງໃນຄັ້ງນີ້ແມ່ນເຫດການເມືອງທີ່ສຳຄັນຂອງຊາດ,ເປັນການເລືອກຕັ້ງເອົາຕົວແທນແຫ່ງສິດ ແລະ ຜົນປະໂຫຍດອັນຊອບທໍາຂອງປະຊາຊົນບັນດາເຜົ່າຢ່າງແທ້ຈີງ. ສະເພາະຢູ່ເຂດເລືອກຕັ້ງທີ່ 7 ແຂວງໄຊຍະບູລີມີຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ມີທັງໝົດ 12 ທ່ານ ເລືອກເອົາ 9 ທ່ານ.