ແຫລ່ງຂ່າວຈາກແຂວງຄຳມ່ວນ ໃຫ້ຮູ້ວ່າ: ໃນລະຫວ່າງວັນທີ 8-9 ກຸມພາ 2021 ນີ້, ບັນດາຜູ້ລົງສະໝັກຮັບເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 12 ແຂວງຄຳມ່ວນ ນຳໂດຍ ທ່ານ ຄຳໃບ ດຳລັດ ຮອງປະທານສູນກາງແນວລາວສ້າງຊາດ, ຜູ້ລົງສະໝັກຮັບເລືອກຕັ້ງນໍ້າເບີ 1 ໄດ້ເຄື່ອນໄຫວພົບປະຫາສຽງ ໂດຍມີບັນດານາຍ ແລະ ພົນຕຳຫລວດຂອງກອງບັນຊາການ ປກສ ແຂວງ, ນາຍ ແລະ ພົນທະຫານກອງບັນຊາການ ປກຊ ແຂວງ, ບັນດາພະນັກງານລັດຖະກອນຂອງແຂວງ ເຂົ້າຮ່ວມ.

ໃນໂອກາດດັ່ງກ່າວ, ບັນດາຜູ້ລົງສະໝັກໄດ້ຜັດປ່ຽນກັນຂຶ້ນສະເໜີຊື່ ແລະ ນໍ້າເບີ, ແນະນຳ ແລະ ສະເໝີຜົນງານການເຄື່ອນໄຫວຂອງຕົນ ຕໍ່ຜູ້ມີສິດປ່ອນບັດພ້ອມທັງຍົກໃຫ້ເຫັນບົດບາດຄວາມໝາຍຄວາມສຳຄັນຂອງວຽກງານສະພາ ໃນການພິຈາລະນາເອົາບັນຫາສຳຄັນ ແລະ ບັນຫາຕ່າງໆ ທີ່ຕິດພັນກັບການເລືອກຕັ້ງ ແລະ ຕາມແຜນໃນວັນທີ 10 ກຸມພາ ຈະໄດ້ເຄື່ອນໄຫວພົບປະພະນັກງານ- ລັດຖະກອນ ແລະ ປະຊາຊົນເມືອງຫີນບູນ.

ສຳລັບແຂວງຄຳມ່ວນ ມີຜູ້ລົງສະໝັກຮັບເລືອກຕັ້ງເປັນ ສສຊ ໃນຊຸດນີ້ຈຳນວນ 12 ທ່ານ, ໃນນີ້ຜູ້ລົງສະໝັກຮັບເລືອກຕັ້ງຈາກສູນກາງມີ 4 ທ່ານ ແລະ ຜູ້ລົງສະໝັກຮັບເລືອກຕັ້ງຈາກທ້ອງຖິ່ນຈຳນວນ 8 ທ່ານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)