ທ່ານ ແກ້ວອຸດອນ ສາຍນໍ້າແດ ຫົວໜ້າກອງບັນຊາການທະຫານ ເມືອງດາກຈຶງ ແຂວເຊກອງ, ທັງເປັນຫົວໜ້າອານຸ ປກຊ-ປກສ ຂັ້ນເມືອງ ໄດ້ໃຫ້ສໍາພາດຕໍ່ນັກຂ່າວໃນວັນທີ 5 ກຸມພາຜ່ານມາວ່າ: ມາຮອດປະຈຸບັນການກະກຽມຄວາມພ້ອມໃນວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ແກ່ການເລືອກຕັ້ງສະມາຊິກພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນແຂວງ (ສສຂ) ຊຸດທີ II ໃນທົ່ວເມືອງ ເພື່ອຮັບປະກັນໃຫ້ມີຄວາມສະຫງົບ, ປອດໄພໂດຍພື້ນຖານ.
ພ້ອມນີ້; ຄະນະພັກ-ຄະນະບັນຊາ ພວກເຮົາ ໄດ້ຈັດກອງປະຊຸມປຶກສາຫາລືເອກະພາບກັນພາຍໃນ ແລະຜັນຂະຫຍາຍ, ເຊື່ອມຊຶມເອກະສານກ່ຽວກັບການເລືອກຕັ້ງ ໃຫ້ນາຍ ແລະພົນທະຫານທົ່ວກອງບັນຊາການ; ໄດ້ອອກຄຳສັ່ງເພີ່ມເຕີມຂອງກອງບັນຊາການທະຫານເມືອງ ວ່າດ້ວຍການຫັນພາວະກຽມພ້ອມສູ້ຮົບ; ຄະນະພັກ-ຄະນະບັນຊາ 3 ພະແນກການ, ຂະແໜງການ, ໝວດ-ໝູ່ ແລະບັນດາກອງຫຼອນບ້ານທົ່ວເມືອງ ທີ່ຂຶ້ນກັບກອງບັນຊາການທະຫານເມືອງດາກຈຶງຮັບຊາບ, ແນໃສ່ຫັນເອົາກົມກອງ, ພະແນກການ, ຂະແໜງການ, ໝວດ-ໝູ່ ແລະກອງຫຼອນບ້ານທົ່ວເມືອງ ຈາກພາວະປົກກະຕິ ກຽມພ້ອມສູ້ຮົບ, ຂຶ້ນສູ່ພາວະເພີ່ມທະວີ ໃນໄລຍະບັ້ນເລືອກຕັ້ງ ໃຫ້ມີຄວາມປອດໄພ 100%.
ນອກນີ້; ໄດ້ແຕ່ງຕັ້ງບັນຈຸນາຍ ແລະພົນທະຫານແຕ່ລະໜ່ວຍບັດຄົບໃນ 30 ໜ່ວຍປ່ອນບັດ; ໄດ້ອອກຄໍາສັ່ງເພີ່ມເຕີມ ວ່າດ້ວຍການຫັນພາວະກຽມພ້ອມສູ້ຮົບ ໃຫ້ກອງຫຼອນ ອອກເຄື່ອນໄຫວລາຕາເວັນຂອບເຂດບ້ານຂອງຕົນ ຮັບຜິດຊອບແຕ່ລະບ້ານຢ່າງເປັນປົກກະຕິ; ການປະຈຳການຂອງກົມກອງແມ່ນຄົບ 3 ຂັ້ນຄື: ປະຈຳການຂັ້ນກອງບັນຊາການ, ປະຈຳການຂັ້ນກອງຮ້ອຍ ແລະຂັ້ນໝວດ-ໝູ່ ເຂັ້ມງວດຕະຫຼອດ 24 ຊົວໂມງ; ຊຶ່ງທົ່ວເມືອງໄດ້ກຳນົດເຂດມີ 9 ເຂດ, ໃນນີ້ ເຂດທຸລະກັນດານຫ່າງໄກສອກຫຼີກມີ 2 ເຂດຄື: ເຂດດາກປຣາ, ເຂດອາຢູນ ແລະ ໜ່ວຍປ່ອນບັດບ້ານດາກໂດມ; ຊຶ່ງກໍາລັງປ້ອງກັນຊາດ-ປ້ອງກັນຄວາມສະຫງົບ ພວກເຮົາ ເອົານາຍ ແລະພົນທະຫານ, ນາຍ ແລະ ພົນຕຳຫຼວດເບື່ອງລະ 1 ຄົນ ແລະປະສານສົມທົບກັບກອງຫຼອນ-ປກສ ບ້ານປ້ອງກັນເວນຍາມໃນໄລຍະປ່ອນບັດ.
ທ່ານ ແກ້ວອຸດອນ ສາຍນໍ້າແດ ກ່າວຕື່ມວ່າ: ວຽກງານທີ່ຍັງສືບຕໍ່ແມ່ນຈະໄດ້ເອົາໃຈໃສ່ປະຈຳການ 3 ຂັ້ນຕະຫຼອດ 24 ຊົ່ວໂມງ; ຄະນະພັກ-ຄະນະບັນຊາ, ພະແນກການ, ຂະແໜງການ, ໝວດ-ໝູ່ ແລະ ກອງຫຼອນບ້ານຮຽກທຸກຄົນຕ້ອງເຮັດວຽກງານປ້ອງກັນເວນຍາມບໍ່ໃຫ້ຂາດ, ເຄື່ອນໄຫວຂອບເຂດຄວາມຮັບຜິດຊອບຂອງຕົນໃຫ້ເຂັ້ມງວດຂຶ້ນຕື່ມ ແລະຮຽກຮ້ອງໃຫ້ສັງຄົມມີການຮ່ວມໄມ້ຮ່ວມມືຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ໃຫ້ມີຄວາມສໍາເລັດຕາມລະດັບຄາດໝາຍທີ່ວາງໄວ້.

ໂດຍ ພຸດທະສອນ