ທ່ານ ແດງ ປະທຸມທອງ ຮອງເລຂາພັກແຂວງໄຊສົມບູນ ພ້ອມດ້ວຍຄະນະ ໄດ້ເຂົ້າອວຍພອນບໍລິສັດໂກເອໂກ ເນື່ອງໃນໂອກາດເທດສະການສະເຫຼີມສະຫຼອງປີໃໝ່ ຂອງ ສສ ຫວຽດນາມ ໃນຕອນເຊົ້າຂອງວັນທີ 8 ກຸມພາ 2020 ນີ້ ຢູ່ທີ່ບໍລິສັດໂກເອໂກ ສຳນັກງານຕັ້ງຢູ່ບ້ານພູຫົວຊ້າງ ເມືອງອະນຸວົງ ໂດຍການຕ້ອນຮັບຂອງທ່ານ ຫງວຽນ ແອງ ແທ່ງ ຜູ້ອໍານວຍການບໍລິສັດແຮ່ທາດ ແລະ ຫລອມໂລຫະວຽງຈັນ ຈໍາກັດຜູ່ດຽວ ຕາງໜ້າໃຫ້ບໍລິສັດໂກເອໂກ, ມີຄະນະທັງສອງຝ່າຍ ເຂົ້າຮ່ວມ.

ເນື່ອງໃນໂອກາດເທດສະການສະເຫຼີມສະຫຼອງປີໃໝ່ ຂອງ ສສ ຫວຽດນາມ ປີນີ້ ທ່ານ ແດງ ປະທຸມທອງ ໄດ້ຕາງໜ້າໃຫ້ຄະນະບໍລິຫານງານພັກແຂວງ ແລະ ປະຊາຊົນບັນດາເຜົ່າພາຍໃນແຂວງ ມອບກະຕ່າຂອງຂວັນ ພ້ອມທັງອວຍພອນໃຫ້ບັນດາສະຫາຍໃນຄະນະພັກ-ຄະນະບໍລິສັດແຮ່ທາດ ແລະ ຫລອມໂລຫະວຽງຈັນ ຈໍາກັດຜູ້ດຽວ ກຸ່ມບໍລິສັດໂກເອໂກ ແລະ ພະນັກງານທະຫານ, ຕໍາຫຼວດ ຕະຫຼອດຮອດປະຊາຊົນຊາວຫວຽດນາມ ທຸກຖ້ວນໜ້າ ຈົ່ງມີສຸຂະພາບພະລານາໄມເຂັ້ມແຂງ ມີຄວາມສຸກໃນຊີວິດສ່ວນຕົວ ແລະ ຄອບຄົວ ແລະ ຈົ່ງປະສົບຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນໜ້າທີ່ອັນສູງສົ່ງ ແລະ ມີກຽດສະຫງ່າຂອງຕົນ ຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກລັດ ແລະ ປະຊາຊົນຫວຽດນາມອ້າຍນ້ອງ ກໍ່ຄືບໍລິສັດໂກເອໂກ ທີ່ໄດ້ປະກອບສ່ວນໃນການສ້າງສາ ແລະ ພັດທະນາ ແຂວງໄຊສົມບູນ ຂອງພວກເຮົາ ຊຶ່ງມັນໄດ້ສະແດງໃຫ້ເຫັນເຖິງສາຍພົວພັນທີ່ບໍລິສຸດຜຸດຜ່ອງ ຄຽງບ່າຄຽງໄລ່ ຊ່ວຍເຫລືອເຊິ່ງກັນ ແລະ ກັນ ໃນພາລະກິດສ້າງສາພັດທະນາປະເທດຊາດ ເພີ່ມພູນຄູນສ້າງສາຍພົວພັນແບບພິເສດຫວຽດນາມ ພວກຂ້າພະເຈົ້າຂໍຢືນຢັນຈະສືບຕໍ່ຮັດແໜ້ນສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດລາວ-ຫວຽດນາມ, ຫວຽດນາມ-ລາວ ໃຫ້ຈະເລີນງອກງາມ ແລະ ໝັ້ນຄົງທະນົງແກ່ນຕະຫລອດໄປ.