ໃນຕອນເຊົ້າຂອງວັນທີ 4 ກຸມພາ 2021 ຢູ່ທີ່ສະໂມສອນຫ້ອງວ່າການປົກຄອງ ເມືອງໄຊບູລີ ໄດ້ຈັດພິທີປະຖະກະຖາຫວນຄືນວັນສ້າງຕັ້ງກອງທັບປະຊາຊົນປະຕິວັດລາວຄົບຮອບ 72 ປີ ( 20 ມັງກອນ 1949-20 ມັງກອນ 2021) , ຫວນຄືນມູນເຊື້ອການກໍາເນີດ ແລະ ການເຕີບໃຫ່ຍຂະຫຍາຍຕົວຂອງອົງການຈັດຕັ້ງກໍາມະບານລາວຄົບຮອບ 65 ປີ(1 ກຸມພາ 1956 -1ກຸມພາ 2021) ໂດຍການໃຫ້ກຽດເຂົ້າຮ່ວມຂອງທ່ານ ອ່ອນລໍາພັນ ບົວສີແກ້ວ ກໍາມະການພັກແຂວງ ເລຂາພັກເມືອງ ເຈົ້າເມືອງໄຊບູລີ, ທ່ານນາງ ສົມລານ ອິນທິສານ ກໍາມະການປະຈໍາພັກເມືອງ ປະທານ ແນວລາວສ້າງຊາດເມືອງ, ທ່ານ ພັນໂທ ແຫຼວຄໍາ ໄຊຍະສົມບັດ ຄະນະຫ້ອງການເມືອງ ກອງບັນຊາການທະຫານແຂວງສະຫັວນນະເຂດ . ມີບັນດາ ການນໍາຂັ້ນເມືອງ, ພະນັກງານ, ທະຫານ, ຕໍາຫຼວດ ແລະ ອົງ ການຈັດຕັ້ງ ຕ່າງໆເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວຜູ້ທີ່ເຂົ້າຮ່ວມກອງປະຊຸມໃນຄັ້ງນີ້ກໍ່ໄດ້ຮັບຟັງທ່ານ ພັນໂທ ແຫຼວຄໍາ ໄຊຍະສົມບັດ ໃຫ້ກຽດເລົ່າຄືນມູນເຊື້ອອັນອົງອາກກ້າຫານຂອງກອງທັບປະຊາຊົນປະຕິວັດລາວ ພ້ອມທັງ ເຜີຍແຜ່ເອກະສານການເສີມຂະຫຍາຍມູນເຊື້ອກອງທັບປະຊາຊົນປະຕິວັດລາວຄົບຮອບ 72 ປີ ເຊິ່ງໃນນັ້ນປະກອບມີປະຫັວດສາດແຫ່ງການເຕີບໃຫ່ຍຂະຫຍາຍຕົວຂອງກອງທັບປະຊາຊົນປະຕິວັດລາວ, ທາດແທ້ ແລະ ມູນເຊື້ອອັນສະຫງ່າອົງອາດ ກ້າຫານ ຂອງກອງທັບປະຊາຊົນລາວໃນໄລຍະຕໍ່ສູ້ຕ້ານຈັກກະພັດຝຣັ່ງໃນປີ 1945-1954, ໄລຍະການຕໍ່ສູ້ຕ້ານຈັກກະພັດອາເມລິກາໃນປີ 1955-1975 ແລະ ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ.

ຈາກນັ້ນ ທ່ານ ນາງສົມລານ ອິນທິສານ ກໍາມະການປະຈໍາພັກເມືອງ ປະທານແນວລາວສ້າງຊາດເມືອງ ກໍ່ຍັງໄດ້ໃຫ້ກຽດເຜີຍແຜ່ເອກະສານມູນເຊື້້ອການກໍາເນີດ ແລະ ການເຕີບໃຫ່ຍຂະຫຍາຍຕົວຂອງອົງການຈັດຕັ້ງກໍາມະບານລາວ ຄົບຮອບ 65 ປີ ເຊິ່ງ ໃນນັ້ນທ່ານໄດ້ຍົກໃຫ້ເຫັນສະພາບແວດລ້ອມທີ່ພາໃຫ້ມີການກໍາເນີດ ແລະ ໄລຍະການເຕີບໃຫ່ຍຂະຫຍາ່ຍຕົວຂອງອົງການຈັດຕັ້ງກໍາມະບານລາວ ລວມທັງ ຜົນງານທີ່ພົ້ນເດັ່ນ ໃນໄລຍະ 65 ປີ ຂອງການຈັດຕັ້ງ ແລະ ເຄື່ອນໄຫວວຽກງານກໍາມະບານໃນການປະກອບ ສ່ວນພາລະກິດປະຕິວັດ, ເສີມຂະຫຍາຍທາດແທ້, ລັກສະນະດີເລີດຂອງຊົນຊັ້ນກໍາມະກອນ ແລະ ມູນເຊື້ອອັນດີງານ 65 ປີ ຂອງອົງການຈັດຕັ້ງກໍາມະບານລາວ ພ້ອມດຽວກັນນີ້ຜູ້ທີເຂົ້າຮ່ວມກອງປະຊຸມກໍ່ຍັງໄດ້ຮັບຟັງການໂອ້ລົມຈາກທ່ານເຈົ້າເມືອງໄຊບູລີໃນການຊີ້ທິດເຍືອງທາງທີ່ເປັນບ່ອນອີງໃຫ້ແກ່ການຈັດຕັ້ງປະຕິບັດໜ້າທີ່ວຽກງານຂອງການຈັດຕັ້ງຕ່າງໆໃຫ້ປະສົບຄວາມສໍາເລັດຕາມລະດັບຄາດຫມາຍໂດຍສະເພາະວຽກງານປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມເຂັ້ມແຂງ, ສະຫງົບ, ປອດໄຟ ແລະ ມີຄວາມສີວິໄລຂື້ນໄປເລື້ອຍໆ.