ດ້ວຍຄວາມເປັນຫ່ວງເປັນໄຍຂອງຄະນະພັນລະຍາການນຳຂັ້ນແຂວງທີ່ມີຕໍ່ອົງການປົກຄອງເມືອງກໍ່ຄືພໍ່ແມ່ປະຊາຊົນບັນດາເຜົ່າທີ່ຢູ່ເຂດຫ່າງໄກຊອກຫລີກນັ້ນ. ວັນທີ 8 ກຸມພາ 2021 ຢູ່ທີ່ສະໂມສອນໃຫຍ່ຂອງ #ເມືອງສຳພັນ ທ່ານ ນາງ ສົມສຸກໄຊພະຈັນ ກຳມະການພັກແຂວງ, ປະທານສະຫະພັນແມ່ຍີງແຂວງ, ທ່ານ ນາງ ຄອນສີ ວັນນະສານ ຄອບຄົວຂອງທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີ ໄດ້ຕ່າງໜ້າໃຫ້ແກ່ຄອບຄົວການນຳຂັ້ນແຂວງ ລົງມອບເຄືອງໃຫ້ອົງການປົກຄອງເມືອງສຳພັນ ເຊີ່ງເຄື່ອງປະກອບມີ ສັງກະສີ 500 ແຜນ ແລະ ເຄື່ອງນຸ່ງຫົ່ມຈຳນວນ 41 ຖົງລວມມູນຄ່າ 25 ລ້ານກ່ວາກີບ.

ສຳລັບເຄື່ອງດັ່ງກ່າວແມ່ນເພື່ອໃຫ້ອົງການປົກຄອງເມືອງໄປມອບຕໍ່ໃຫ້ກັບ #ບ້ານກົກມ່ວງ ທີ່ໄດ້ຍົກຍ້າຍມາຕັ້ງຖີ່ນຖານໃໝ່ ຈຳນວນ 20 ຫຼັງຄາ, ລວມມີສັງກະສີ 500 ແຜນ, ສຳລັບເຄື່ອງນຸ່ງຫົ່ມ 41 ຖົງ ແມ່ນມອບໃຫ້ກັບ #ບ້ານສະນຳຮະ ເຊິ່ງເປັນ #ບ້ານວິລະຊົນແຫ່ງຊາດ ຈຳນວນ 41 ຫຼັງຄາ. ໂດຍການກ່າວມອບຂອງທ່ານ ນາງ ສົມສຸກໄຊພະຈັນ ກຳມະການພັກແຂວງ, ປະທານສະຫະພັນແມ່ຍີງແຂວງ ແລະ ກ່າວຮັບ ໂດຍແມ່ນ ທ່ານ ທອງຕື້ ເກຍສະບົງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆສຳພັນ. ພ້ອມນັ້ນທ່ານ ກໍ່ໄດ້ກ່າວສະແດງຄວາມຂອບໃຈມາຍັງຄອບຄົວການນຳແຂວງທີ່ໄດ້ນຳເອົາດັ່ງກ່າວມາມອບໃນຄັ້ງນີ້, ເຊີ່ງມັນໄດ້ປະກອບສ່ວນອັນສຳຄັນໃນການພັດທະນາເສດຖະກິດ – ສັງຄົມຂອງເມືອງ ໂດຍສະເພາະແມ່ນການແກ້ໄຂຊີວິດການເປັນຢູ່ຂອງປະຊາຊົນທີຢູ່ເຂດຫ່າງໄກຊອກຫຼີກ ແລະ ທ່ານຍັງໄດ້ໃຫ້ຄຳໜັ້ນສັນຍາວ່າຈະນຳເອົາເຄື່ອງຈຳນວນດັ່ງກ່າວໄປມອບໃຫ້ປະຊາຊົນໂດຍໄວ.