ຜູ້ສະໝັກເລືອກຕັ້ງສະມາຊິກສະພາປະຊາຊົນແຂວງ ຊຸດທີ II ເມືອງໂຂງ ລົງເຄື່ອນໄຫວສະເໜີຕົວຢູ່ ກອງບັນຊາການ ປກຊ ເມືອງ ແລະ ກອງຮ້ອຍທະຫານຊາຍແດນ 527ໃນວັນທີ 9 ກຸມພາ 2021 ນີ້ການລົງເຄື່ອນໄຫວຂອງຜູ້ແທນສະໝັກເລືອກຕັ້ງສະມາຊິກສະພາປະຊາຊົນແຂວງຈຳປາສັກ ຊຸດທີ II ປະຈຳເມືອງໂຂງ ນຳໂດຍທ່ານ ດຣ ວຽງສີ ຊາພັກດີ ກຳມະການພັກແຂວງ

ຫົວໜ້າພະແນກສາທາລະນະສຸກແຂວງຈຳປາສັກ ຢູ່ກອງບັນຊາການທະຫານເມືອງໂຂງ ແລະ ກອງຮ້ອຍທະຫານຊາຍແດນ 527 ຄັ້ງນີ້ກໍເພື່ອພົບປະແນະນໍາຕົວຕໍ່ພະນັກງານ-ນັກຮົບ, ໄດ້ຮັບຮູ້ປະຫວັດການເຄື່ອນໄຫວຂອງຕົນໃນແຕ່ລະໄລຍະຜ່ານມາຈົນເຖິງປັດຈຸບັນ, ໃຫ້ເຂົ້າໃຈເຖິງພາລະບົດບາດ ເພື່ອນຳໄປພິຈາລະນາໃນການໃຊ້ສິດຂອງຕົນເຂົ້າໃນການເລືອກຕັ້ງຜູ້ແທນຂອງຕົນເຂົ້າໃນສະພາ ເພາະການເລືອກຕັ້ງໃນຄັ້ງນີ້ແມ່ນເຫດການ, ການເມືອງທີ່ສຳຄັນຂອງຊາດ, ເປັນການເລືອກຕັ້ງເອົາຕົວແທນແຫ່ງສິດ ແລະ ຜົນປະໂຫຍດອັນຊອບທໍາຂອງປະຊາຊົນບັນດາເຜົ່າຢ່າງແທ້ຈິງ.

ສະເພາະຢູ່ເຂດເລືອກຕັ້ງທີ 15 ແຂວງຈຳປາສັກ ມີຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ມີທັງໝົດ 20 ທ່ານ, ເລືອກເອົາ 15 ທ່ານ ແລະ ມີຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນຂັ້ນແຂວງຊຸດທີ II ປະຈຳເມືອງໂຂງ ທັງໝົດ 6 ທ່ານ, ເລືອກເອົາ 4 ທ່ານ.