ຕອນເຊົ້າວັນທີ 10 ກຸມພາ 2021 ນີ້ ບັນດາທ່ານຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດ IX ປະຈຳເຂດເລືອກຕັ້ງທີ 8 ແຂວງຫົວພັນ ຈຳນວນ 4 ທ່ານ ໄດ້ລົງສະເໜີຕົວ ແລະ ພົບປະຜູ້ມີສິດປ່ອນບັດເລືອກຕັ້ງຢູ່ເທດສະບານເມືອງກວັນ, ເຊິ່ງພິທີໄດ້ຈັດຢູ່ທີ່ສະໂມສອນຂອງເມືອງ ເຂົ້າຮ່ວມມີ ທ່ານ ດາວເພັດ ພົມສຸວັນ ກຳມະການພັກແຂວງ, ເລຂາພັກເມືອງ ເຈົ້າເມືອງໆກວັນ, ພ້ອມດ້ວຍພະນັກງານ-ລັດຖະກອນ ທະຫານ-ຕຳຫຼວດ ແລະ ປະຊາຊົນເທດສະບານເມືອງກວັນເຂົ້າຮ່ວມ 300 ກວ່າຄົນ.

ການລົງສະເໜີຕົວ ແລະ ພົບປະຜູ້ມີສິດປ່ອນບັດເລືອກຕັ້ງຄັ້ງນີ້ ກໍ່ເພື່ອເຮັດໃຫ້ຜູ້ມີສິດປ່ອນບັດເລືອກຕັ້ງ ໄດ້ຄວາມຮັບຮູ້, ຄວາມເຂົ້າໃຈ ຕໍ່ຄວາມໝາຍ, ຄວາມສຳຄັນ ແລະ ຈຸດປະສົງຂອງການເລືອກຕັ້ງ, ໂຄງປະກອບບຸກຄະລະກອນ ສະໝັກສະມາຊິກສະພາແຫ່ງຊາດ ຊຸດ IX ໃນຂອບເຂດທົ່ວປະເທດ ສະເພາະເຂດເລືອກຕັ້ງທີ 8 ແຂວງຫົວພັນ ເພຶ່ອເຮັດໃຫ້ຜູ້ມີສິດປ່ອນບັດເລືອກຕັ້ງໄດ້ມີໂອກາດພົບໜ້າພໍ້ຕາ ໄດ້ຍິນຊື່ສຽງຕົວຈີງຂອງຜູ້ສະມັກເລືອກຕັ້ງ ໃນຈຳນວນ 4 ທ່ານ ຄື: ທ່ານ ນ. ອຳໄພວອນ ລ້ອມບຸນແພງ ກຳມະການສຳຮອງສູນການພັກ ຮອງເລຂາພັກແຂວງ ຮອງປະທານສະພາປະຊາຊົນແຂວງ ຜູ້ສະໝັກໝາຍເລກ 1, ທ່ານ ແກ້ວຈະເລີນ ເຊ່ຍຍີ້ງຢ່າງ ກຳມະການຄະນະບໍລິຫານງານພັກ ຄະນະປະຈຳສູນກາງແນວລາວສ້າງຊາດ ຜູ້ສະໝັກໝາຍເລກ 4, ທ່ານ ພັທ ເພັດນ້ອຍ ລໍລອນສີ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງຫົວພັນ ຜູ້ສະໝັກໝາຍເລກ 8 ແລະ ທ່ານ ອົ້ມ ອິນທະລາ ວ່າການຫົວໜ້າໂຮງຮຽນການເມືອງ-ການປົກຄອງແຂວງ ຜູ້ສະໝັກໝາຍເລກ 10 ທີ່ໄດ້ຕາງໜ້າໃຫ້ຜູ້ສະໝັກເລືອກຕັ້ງ ທັງ 10 ທ່ານ ທີ່ສະໝັກເປັນ ສສຊ ປະຈຳເຂດເລືອກຕັ້ງທີ 8 ແຂວງຫົວພັນ ແລະ ຜູ້ທີ່ສະໝັກເປັນ ສສຂ 5 ທ່ານ ເຂດເລືອກຕັ້ງເມືອງກວັນ

ເຊິ່ງໄດ້ຟັງຄໍາສະເໜີຄວາມມຸ່ງມາດປາດຖະໜາຂອງຜູ້ມີສິດປ່ອນບັດເລືອກຕັ້ງ ແລະ ປະຊາຊົນບັນດາເຜົ່າ; ໄດ້ນຳໄປຄົ້ນຄ້ວາ ແລະ ສະເໜີຕໍ່ພາກສ່ວນກ່ຽວຂ້ອງ, ອົງການປົກຄອງທ້ອງຖິ່ນ ແລະ ລັດຖະບານພິຈາລະນາແກ້ໄຂ ໃນກອງປະຊຸມສະພາແຫ່ງຊາດ ກໍຄື ສະພາປະຊາຊົນແຂວງ ໃນສະໄໝຕໍ່ໄປ ຕາມເງື່ອນໄຂ ແລະ ສະພາບການຕົວຈິງໃນແຕ່ລະໄລຍະ