ວັນທີ 9 ກຸມພາ 2021 ແຂວງຫຼວງນໍ້າທາຈັດພິທີສະເໜີຕົວຂອງຜູ້ຮັບສະໝັກເລືອກຕັ້ງເປັນສະມາຊິກສະພາແຫ່ງຊາດຊູດທີ 9 ປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ, ເຊີ່ງໄດ້ຈັດຂຶ້ນຢູ່ທີ່ຫໍວັດທະນະທຳແຂວງ, ໂດຍການເປັນປະທານຂອງທ່ານ ຄໍາໄຫຼ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນໍ້າທາ ທັງເປັນປະທານຄະນະເລືອກຕັ້ງຂັ້ນແຂວງ. ມີກຳມະການປະຈຳພັກແຂວງ, ກຳມະການພັກແຂວງ, ຫົວໜ້າພະແນກ – ຮອງຫົວໜ້າພະແນກການອ້ອມຂ້າງແຂວງ, 2 ກອງບັນຊາການ, ລັດວິສາຫະກິດ, ໂຮງຮຽນ, ໂຮງໝໍເຂົ້າຮ່ວມ.

ທ່ານ ພົມມະສຸກ ວີໄລກຸນ ກຳມະການປະຈຳພັກແຂວງ,ຫົວໜ້າຄະນະຈັດຕັ້ງແຂວງໃຫ້ຮູ້ໃນການເປີດຕົວຂອງຜູ້ຮັບສະໝັກເລືອກຕັ້ງເປັນສະມາຊິກສະພາແຫ່ງ
ຊາດຊູດທີ 9 ປະຈໍາເຂດເລືອກຕັ້ງທີ 3 ແຂວງຫຼວງນໍ້າທານີ້ວ່າ: ໃນທ່າມກາງບັນຍາກາດທີທົ່ວພັກ, ທົ່ວກອງທັບ ແລະ ທົ່ວປ່ວງຊົນລາວທັງຊາດ,ເວົ້າສະເພາະກໍ່ຄືພະນັກ
ງານລັດຖະກອນ,ທະຫານ-ຕໍາຫຼວດ ແລະ ປະຊາຊົນບັນດາເຜົ່າພາຍໃນແຂວງຫຼວງນໍ້າທາ,ພວມເບີກບານມ່ວນຊື່ນໃນການກະກຽມປ່ອນບັດເລືອກຕັ້ງເອົາສະມາຊິກສະພາແຫ່ງຊາດຊູດທີ 9 ແລະ ສະມາຊີກສະພາປະຊາຊົນແຂວງຊູດທີ 2 ຢ່າງເປັນຂະບວນການຟົດຟື້ນ, ໃນນັ້ນມີຜູ້ເຂົ້າສະໝັກເລືອກຕັ້ງເປັນ ສສຊ ຊູດທີ 9 ປະຈຳເຂດເລືອກຕັ້ງທີ 3 ແຂວງຫຼວງນໍ້າທາ , 9 ທ່ານ, ຍີງ 2 ທ່ານ, ເລືອກເອົາ 6 ທ່ານ, ຕົວແທນຈາກສູນກາງ 2 ທ່ານ ແລະ ຕົວແທນຈາກແຂວງ 7 ທ່ານ, ຍີງ 2 ທ່ານ.


ໂອກາດນີ້ ທ່ານ ຄຳໄຫຼ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນໍ້າທາ ທັງເປັນປະທານຄະນະເລືອກຕັ້ງຂັ້ນແຂວງ ໄດ້ເນັ້ນໜັກກ່ຽວກັບການປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ແມ່ນມີຄວາມໝາຍສໍາຄັນຫຼາຍ, ເພາະວ່າວຽກນີ້ ເປັນວຽກງານຂອງພັກຊີ້ນຳ-ນຳພາໂດຍກົງ, ບັນດາອົງການຈັດຕັ້ງພັກ-ລັດ, ກຳລັງປະກອບອາວຸດ ແລະ ປະຊົນລາວບັນດາເຜົ່າ ມີພັນທະ, ໜ້າທີ່ປະກອບສ່ວນ ຢ່າງເປັນເຈົ້າການ ເຮັດໃຫ້ການເລືອກຕັ້ງຄັ້ງນີ້ ເປັນປາງບຸນໃຫຍ່ຂອງຊາດ ກໍ່ຄືແຂວງຫຼວງນ້ຳທາຂອງພວກເຮົາ, ຮັບປະກັນໃຫ້ໄດ້ 3 ຮ້ອຍສ່ວນຮ້ອຍຕາມທີ່ຂັ້ນເທີງ ວາງອອກ. ການເລືອກຕັ້ງແຕ່ລະຄັ້ງ ເປັນການບູລະນະລັດ ປະຊາທິປະໄຕ ປະຊາຊົນ ໃຫ້ມີຄວາມໜັກແໜ້ນເຂັ້ມແຂງ, ເປັນການເສີມຂະຫຍາຍ ສິດປະຊາທິປະໄຕ,ສິດເປັນເຈົ້າ ຂອງປະຊາຊົນລາວບັນດາເຜົ່າເຂົ້າໃນການເລືອກເອົາຕົວແທນແຫ່ງສິດ ແລະ ຜົນປະໂຫຍດຂອງຕົນ ເຂົ້າໃນອົງການອໍານາດລັດຂັ້ນສູນກາງ ກໍຄື ທ້ອງຖິ່ນ ສະແດງໃຫ້ເຫັນເຖິງທາດແທ້ຂອງລັດທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຜົນປະ
ໂຫຍດຂອງປະຊາຊົນ ຢ່າງແທ້ຈິງ.