ວັນທີ 9 ກຸມພາ 2021 ນີ້ພະແນກຖະແຫຼງຂ່າວ,ວັດທະນະ​ທຳ ແລະ ທ່ອງທ່ຽວ ແຂວງອັດຕະປື ຮ່ວມກັບ ກົມຄຸ້ມ​ຄອງ​ການທ່ອງທ່ຽວ ກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ,ໄດ້ເຜີຍແຜ່ດຳລັດນາຍົກລັດຖະມົນຕີ ວ່າດ້ວຍການບັນເທິງ ໃຫ້ແກ່ຜູ້ປະກອບການຮ້ານອາຫານ- ຮ້ານບັນເທິງ, ເຮືອນພັກ ແລະ ໂຮງແຮມ ພາຍໃນແຂວງອັດຕະປື ຂື້ນທີ່ຫ້ອງວ່າການເມືອງສາມັກຄີໄຊ, ໂດຍເປັນກຽດເຂົ້າຮ່ວມຂອງທ່ານ ກົງຈັກ ສີສະຫວາດ ຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ແຂວງອັດຕະປື, ມີທ່ານນາງ ດາລານີ ພົມມະວົງສາ ຫົວໜ້າກົມຄຸ້ມຄອງການທ່ອງທ່ຽວ ກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ,ມີຫ້ອງການຖະແຫຼງຂ່າວວັດທະນະທຳ ແລະ ທ່ອງທ່ຽວ 5 ເມືອງ,ພ້ອມດ້ວຍຜູ້ປະກອບການຮ້ານອາຫານ-ຮ້ານກິນດື່ມ ແລະ ໂຮງແຮມ ເຂົ້າຮ່ວມ.

ໃນວາລະກອງປະຊຸມຜູ້ເຂົ້າຮ່ວມໄດ້ຮັບຟັງການເຜີຍແຜ່ດຳລັດຂອງນາຍົກລັດຖະມົນຕີ ເລກທີ 135/ລບ ວ່າດ້ວຍການບັນເທີງ ເຊີ່ງປະປອບມີ 10 ໝວດ, 50 ມາດຕາ,ເຊີ່ງແຕ່ລະໝວດ ໄດ້ກຳນົດວ່າດ້ວຍ ບົດບັນຍັດທົ່ວໄປ,ປະເພດ ແລະ ມາດຕະຖານການບໍລິການບັນເທີງ,ການດຳເນີນທຸລະກິດບັນເທີງ,ສິດ ແລະ ພັນທະ,ຂໍ້ຫ້າມ,ການແກ້ໄຂຂໍ້ຂັດແຍ່ງ,ການປະຕິບັດຄ່າທຳນຽມການບໍລິການ,ການຄຸ້ມຄອງ ແລະ ກວດກາ,ນະໂຍບາຍຕໍ່ຜູ້ມີຜົນງານ ແລະ ມາດຕາການຕໍ່ກັບຜູ້ລະເມີດ ແລະ ບົດບັນຍັດສຸດທ້າຍ ໃນການປະຕິບັດ,ເຊິງໄລຍະຜ່ານມາພະແນກ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງອັດຕະປື ໄດ້ໃຊ້ມາດຕາການປັບໃໝຕໍ່ຜູ້ລະເມີດ,ມີເມືອງສາມັກຄີໄຊ 5 ຮ້ານ,ໄຊເສດຖາ ຢຶດອຸບປະກອນ ແລະ ປັບໃໝ 11 ຮ້ານ,ຊານໄຊ 2 ຮ້ານ,ເມືອງພູວົງ ປິດຮ້ານກີນດື່ມ 1 ຮ້ານ.
ທັງນີ້ກໍ່ເພື່ອກຳນົດຫຼັກການ,ລະບຽບການ ແລະ ມາດຕາການກ່ຽວກັບການຄຸ້ມຄອງ ຕິດຕາມກວດກາ ທຸລະກິດບໍລິການບັນເທິງ ໃຫ້ມີຄວາມເປັນລະບຽບຮຽບຮ້ອຍ,ສະຫງົບປອດໄພ ໄດ້ມາດຕາຖານ ແລະ ເປັນເອກະພາບໃນທົ່ວປະເທດ ເພື່ອອະນຸລັກປົກປັກຮັກສາ ໂຄສະນາສົ່ງເສີມສິນລະປະ ວັດທະນະທຳ ຮີດຄອງປະເພນີຂອງຊາດ ໃຫ້ມີຄວາມຍືນຍົງ ແລະ ຂະຫຍາຍຕົວເຂົ້າສູ່ສາກົນ .