ເຈົ້າໜ້າທີ່ ຕໍາຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ #ແຂວງບໍລິຄໍາໄຊ ໄດ້ໃຫ້ຮູ້ວ່າ: ໃນຄັ້ງວັນທີ 31 ທັນວາ 2020 ຜ່ານມາ ໄດ້ຮັບແຈ້ງຄວາມຈາກພົນລະເມືອງດີ ວ່າ: ມີກຸ່ມຄ້າ-ຂາຍຢາເສບຕິດລາຍໃຫຍ່ຈໍານວນໜື່ງ ຈະເຄື່ອນຍ້າຍຢາເສບຕິດເຂົ້າມາເມືອງຄໍາເກີດ ແຂວງບໍລິຄໍາໄຊ ເພື່ອຈະນໍາສົ່ງໄປປະເທດໃກ້ຄຽງ, ເຈົ້າໜ້າທີ່ວິຊາສະເພາະ ຈື່ງໄດ້ສົມທົບກັບ ປກສ ເມືອງ ລົງຕິດຕາມກວດກາແຫຼ່ງຂ່າວ ເຫັນວ່າມີມູນຄວາມຈິງ, ຕົກມາຮອດ ວັນທີ 07 ກຸມພາ 2021 ຈື່ງສາມາດມ້າງລາຍຄະດີດັ່ງກ່າວໄດ້ສໍາເລັດ ແລະ ສາມາດກັກຕົວຜູ້ຖືກຫາໄດ້ 04 ຄົນ, ພ້ອມຂອງກາງ ປະເພດ ເຮໂລອິນ 600 ແທ່ງ ນໍ້າໜັກ 231 ກິໂລກຼາມ ແລະ ຢາບ້າ 4.000 ເມັດ, ມາສືບສວນ-ສອບສວນ ຕາມລະບຽບກົດໝາຍ.

ຜ່ານການສືບສວນ-ສອບສວນເບື້ອງຕົນຂອງເຈົ້າໜ້າທີ່ໃຫ້ຮູ້ວ່າ: ຜູ້ຖືກຫາທັງ 4 ຄື: ທ້າວ ເບຼຍເຢ້ຊົ່ງ ອາຍຸ 57 ປີ, ທ້າວ ເຢ້ຊົ່ງ ອາຍຸ 34 ປີ, ທ້າວ ເນັ່ງຊົ່ງ ອາຍຸ 27 ປີ ແລະ ທ້າວ ເຊຊົ່ງ ອາຍຸ 21 ປີ, ຜູ້ຖືກຫາ ທັງ 04 ຄົນ ເປັນປະຊາຊົນ ຢູ່ບ້ານ ໂພນເມືອງນ້ອຍ ເມືອງຄໍາເກີດ ແຂວງບໍລິຄໍາໄຊ. ເຈົ້າໜ້າທີ່ໄດ້ໃຫ້ຮູ້ຕື່ມອີກວ່າ: ພາຍຫຼັງໄດ້ຮັບແຈ້ງຄວາມຈາກພົນລະເມືອງດີ ກໍ່ໄດ້ແຕ່ງຕັ້ງພະນັກງານວິຊາສະເພາະລົງຕິດຕາມກວດກາຢ່າງເຂັ້ມງວດ, ຕົກມາຮອດ ວັນທີ 05 ກຸມພາ 2021 ຈື່ງໄດ້ຮູ້ວ່າ ຈະມີການເຄື່ອນຍ້າຍຢາເສບຕິດ ປະເພດ ເຮໂລອິນ ແລະ ຢາບ້າ ເຂົ້າມາເມືອງຄໍາເກີດ ແຂວງບໍລິຄໍາໄຊ, ກ່ອນຈະຂົນສົ່ງເຄື່ອນຍ້າຍໄປຍັງປະເທດໃກ້ຄຽງ, ມາຮອດເວລາປະມານ 14 ໂມງ 40 ນາທີ ຂອງວັນທີ 07 ກຸມພາ 2021 ເຈົ້າໜ້າທີ່ຈື່ງໄດ້ວາງແຜນຈັດຕັ້ງກໍາລັງເຂົ້າຈັບກຸມ.

ຜ່ານການຈັດຕັ້ງປະຕິບັດ ສາມາດກັກຕົວຜູ້ຖືກຫາທັງ 4 ເຊີ່ງໄດ້ໃຫ້ການຮັບສາລະພາບວ່າ: ຢາເສບຕິດ ຈໍານວນດັ່ງກ່າວ ແມ່ນຮັບມາຈາກກຸ່ມຮ່ວມຂະບວນການນໍາກັນ ເພື່ອຈະຂົນສົ່ງໄປຍັງປະເທດໃກ້ຄຽງ ແຕ່ຖືກເຈົ້າໜ້າທີ່ວິຊາສະເພາະກັກຕົວມາດໍາເນີນການສືບສວນ-ສອບສວນ ຕາມລະບຽບກົດໝາຍ. ປະຈຸບັນ ຄະດີດັ່ງກ່າວ ຍັງຢູ່ໃນຂັ້ນຕອນການສືບສວນ-ສອບສວນຂະຫຍາຍຜົນຫາກຸ່ມແກ້ງພວກຮ່ວມຂະບວນການນໍາກັນ ມາດໍາເນີນຄະດີຕາມລະບຽບກົດໝາຍຢ່າງເຂັ້ມງວດໃນຂັ້ນຕໍ່ໄປ.