ໃນຫວ່າງບໍ່ດົນມານີ້ ກຳມະບານຮາກຖານບໍລິສັດໜູຄຳກໍ່ສ້າງ, ກຳມະບານຮາກຖານພະແນກຊັບພະຍາກອນ ແລະ ສິ່ງແວດລ້ອມ, ກຳມະບານຮາກຖານພະແນກອຸດສະຫະກຳ ແລະ ການຄ້າແຂວງ ໄດ້ມີການຈັດພິທີ ປາຖະກະຖາວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ຂຶ້ນຢ່າງເປັນທາງການທີ່ຫ້ອງປະຊຸມຂອງຕົນ ໂດຍການໃຫ້ກຽດເຂົ້າຮ່ວມ ແລະ ຂຶ້ນປາຖະກະຖາໂດຍ ທ່ານ ສົມໃຈ ສີສົມພອນ ປະທານຄະນະບໍລິຫານງານສະຫະພັນກຳມະບານແຂວງສະຫວັນນະເຂດ, ຊຶ່ງມີຄະນະພັກ, ຄະນະພະແນກ, ຜູ້ອຳນວຍການບໍລິສັດ, ຄະນະກຳມະບານຮາກຖານ ຕະຫຼອດເຖິງສະມາຊິກກຳມະບານພາຍໃນຂອງຕົນເຂົ້າຮ່ວມ ຈຳນວນ 151 ທ່ານ, ຍິງ 72 ທ່ານ

ໂອກາດດັ່ງກ່າວ ທ່ານ ສົມໃຈ ສີສົມພອນ ກໍ່ໄດ້ຫວນຄືນມູນເຊື້ອການເຕີບໃຫຍ່ຂະຫຍາຍຕົວຂອງ ສະຫະພັນກຳມະບານລາວ ແຕ່ອາດີດຈົນເຖິງປະຈຸບັນ ເພື່ອເປັນການໂຄສະນາສຶກສາອົບຮົມການເມືອງ-ແນວຄິດໃຫ້ແກ່ ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ຮັບຮູ້ເຖິງທາດແທ້ມູນເຊື້ອປະຕິວັດອັນດີງາມຂອງຊົນຊັ້ນກຳມະກອນ ກໍ່ຄືກຳມະບານຕະຫຼອດໄລຍະ 65 ປີທີ່ຜ່ານມາ. ໂດຍແນໃສ່ປຸກລະດົມ ແລະ ສ້າງຈິດສໍານຶກໃຫ້ແກ່ສະມາຊິກກຳມະບານລາວ ມີລະບຽບວິໃນໃນການອອກແຮງງານ, ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືວຽກງານກໍາມະບານໃນໄລຍະໃໝ່ ໃຫ້ມີຄວາມໜັກແໜ້ນເຂັ້ມແຂງຂຶ້ນໄປເລື້ອຍໆ ຕາມທິດແຜນພັດທະນາວຽກງານກຳມະບານລາວ 5 ປີ ຄັ້ງທີ IV ( 2021-2025 ) ໃຫ້ປະກົດຜົນເປັນຈິງໃນເທື່ອລະກ້າວ.