ໃນວັນທີ 09 ກຸມພາ 2021 ທ່ານ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ, ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກຳມະການຄະນະກຳມະການເລືອກຕັ້ງລະດັບຊາດ, ກຳມະການອະນຸກຳມະການໂຄສະນາ ແລະ ປຸກລະດົມຂະບວນການ ພ້ອມຄະນະ ໄດ້ລົງຕິດຕາມການໂຄສະນາ, ປຸກລະດົມຂະບວນການ ໃນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ແຂວງຄຳມ່ວນ.

ໂດຍມີທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ, ທ່ານ ສົມໃຈ ເພັດສີນວນ ປະທານສະພາປະຊາຊົນແຂວງ, ພ້ອມດ້ວຍບັນດາທ່ານໃນອະນຸກໍາມະການໂຄສະນາ, ປຸກລະດົມຂະບວນການ ກຳມະການເລືອກຕັ້ງຂອງແຂວງ ເຂົ້າຮ່ວມ.ທ່ານ ວົງເພັດ ຈິດປັນຍາ ຮອງເລຂາພັກແຂວງ ໄດ້ລາຍງານສະພາບໂດຍລວມຂອງແຂວງຄຳມ່ວນ ໃຫ້ແກ່ຄະນະຂອງທ່ານລັດຖະມົນຕີ ກະຊວງ ຖວທ ໄດ້ຮັບຊາບ.

ຈາກນັ້ນ, ທ່ານ ສົມໃຈ ເພັດສີນວນ ປະທານສະພາປະຊາຊົນແຂວງ ກໍ່ໄດ້ລາຍງານສະພາບການກະກຽມໃຫ້ແກ່ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II, ເຊິ່ງພາຍຫລັງທີ່ໄດ້ຮັບຄຳແນະນຳ ຂອງຄະນະກຳມະການເລືອກຕັ້ງລະດັບຊາດ ກໍ່ໄດ້ຄົ້ນຄວ້າປະກອບບຸກຄະລາກອນ ພ້ອມທັງອອກຂໍ້ຕົກລົງແຕ່ງຕັ້ງອະນຸກຳມະການຕ່າງໆ ແລະ ອອກແຜນດຳເນີນງານຂອງຄະນະກຳມະການເລືອກຕັ້ງຂັ້ນແຂວງ ເພື່ອດຳເນີນການເລືອກຕັ້ງ.

ຜ່ານການດຳເນີນງານເຫັນວ່າຄະນະກຳມະການ ແລະ ບັນດາອະນຸກຳມະການຊ່ວຍວຽກກຳມະການເລືອກຕັ້ງຂັ້ນແຂວງ, ຂັ້ນເມືອງ ກໍ່ໄດ້ຫ້າງກາກະກຽມແຕ່ຫົວທີ ແລະ ພ້ອມພາກັນຂຸ້ນຂ້ຽວປະຕິບັດແຜນງານ ແລະ ພາລະບົດບາດຂອງຕົນ ເຂົ້າໃນການກະກຽມຮັບໃຊ້ໃນບັ້ນເລືອກຕັ້ງຄັ້ງນີ້. ພ້ອມນັ້ນ, ກໍ່ໄດ້ເກັບກຳສະຖິຕິຈຳນວນຜູ້ມີສິດປ່ອນບັດ ເຊິ່ງໃນທົ່ວແຂວງ ມີຈຳນວນຜູ້ມີສິດປ່ອນບັດເລືອກຕັ້ງທັງໝົດ 230.311 ຄົນ, ຍິງ 119.746 ຄົນ ແລະ ໄດ້ກໍານົດຈຸດປ່ອນບັດເລືອກຕັ້ງທັງໝົດ 369 ຈຸດ. ທາງດ້ານວຽກງານໂຄສະນາ ແລະ ປຸກລະດົມຂະບວນການ ແມ່ນໄດ້ເອົາໃຈໃສ່ປະສານສົມທົບກັບອະນຸກຳມະການເລຂານຸ ການ ດຳເນີນການຝຶກອົບຮົມ, ເຊື່ອມຊຶມ, ເຜີຍແຜ່ ບັນດາເອກະສານທີ່ຕິດພັນກັບການເລືອກຕັ້ງ ໃຫ້ແກ່ພະນັກງານ, ທະຫານ, ຕຳຫລວດ ຕະຫລອດຮອດພໍ່ແມ່ປະຊາຊົນ ຜູ້ມີສິດປ່ອນບັດເລືອກຕັ້ງໃນແຕ່ລະໜ່ວຍປ່ອນບັດ ພ້ອມທັງໄດ້ອອກນິຕິກຳ ແລະ ມີການເຄື່ອນໄຫວຕິດຕາມ, ຊຸກຍູ້ແຕ່ລະພາກສ່ວນ ຈັດຕັ້ງປຸກລະດົມມວນຊົນສ້າງຂະບວນການຕ່າງໆ ເປັນຕົ້ນ: ຂະບວນການວຽກງານປ້ອງກັນຊາດ-ປ້ອງກັນຄວາມສະຫງົບ, ການສ້າງເສດຖະກິດ-ຜະລິດເປັນສິນຄ້າ, ຂະບວນການອະນາໄມ ແລະ ປະດັບປະດາ, ຕິດທຸງພັກ, ທຸງຊາດ, ທຸງທິວ, ປ້າຍຄຳຂວັນ, ໂຄສະນາປຸກລະດົມຜ່ານສື່ມວນຊົນ, ສ້າງຂະບວນການຂອງອົງການຈັດຕັ້ງມະຫາຊົນ ຢ່າງເປັນຂະບວນການຟົດຟື້ນ.

ໂອກາດດຽວກັນ, ທ່ານ ກິແກ້ວ ໄຂຄໍາພິທູນ ໄດ້ມີຄໍາເຫັນເພື່ອໃຫ້ປະຕິບັດໜ້າທີ່ການເລືອກຕັ້ງຄັ້ງນີ້ ໄດ້ຮັບຜົນສຳເລັດຕາມຄາດໝາຍ ຕ້ອງຮູ້ເຖິງເງື່ອນໄຂທີ່ອຳນວຍຄວາມສະດວກ ກໍຄື ມີແນວທາງການເມືອງທີ່ຖືກຕ້ອງ, ມີນິຕິກຳ, ລະບຽບຫລັກການ, ມີການນຳພາ-ຄຸ້ມຄອງ ແລະ ມີຈຸດໝາຍໃນການເລືອກຕັ້ງ ລວມເຖິງປະສົບການທີ່ເປັນພື້ນຖານອຳນວຍຄວາມສະດວກ ໃຫ້ແກ່ການເລືອກຕັ້ງຄັ້ງນີ້ ແຕ່ຄຽງຄູ່ກັບຂໍ້ສະດວກນັ້ນ ກໍຍັງມີດ້ານອຸປະສັກ ແລະ ສິ່ງທ້າທາຍຫລາຍດ້ານ ທີ່ຈະຕ້ອງໄດ້ພ້ອມພາກັນເອົາໃຈໃສ່ຢ່າງເປັນເຈົ້າການ ເປັນຕົ້ນແມ່ນ ການປະຕິບັດຕໍ່ມາດຕະການແຜ່ລະບາດຂອງພະຍາດໂຄວິດ-19 ລວມເຖິງບັນຫາປະກົດການຫຍໍ້ທໍ້ໃນສັງຄົມ ແລະ ກຸ່ມຄົນທີ່ບໍ່ດີ ທີ່ມີກົນອຸບາຍຫວັງມ້າງເພທຳລາຍ ພ້ອມນັ້ນ ກໍ່ຕ້ອງກຳແໜ້ນຕໍ່ທິດຊີ້ນຳຂອງພັກກ່ຽວກັບການເລືອກຕັ້ງ ແລະ ເອົາໃຈໃສ່ໂຄສະນາ, ຊີ້ແຈງໃຫ້ປະຊາຊົນໄດ້ເຂົ້າໃຈຕໍ່ເຫດການສຳຄັນດັ່ງກ່າວ ພ້ອມທັງປຸກລະດົມໃຫ້ປະຊາຊົນໄດ້ເປັນເຈົ້າການເຂົ້າຮ່ວມໃນຂະບວນການເລືອກຕັ້ງ ເພື່ອຮັບປະກັນຕາມ 3 ຄາດໝາຍໃຫຍ່ ຄື: ຮັບປະກັນໃຫ້ຜູ້ມີສິດໄດ້ຕື່ນຕົວ ແລະ ສະໝັກໃຈໄປປ່ອນບັດເລືອກຕັ້ງຢ່າງຄົບຖ້ວນ 100%, ຮັບປະກັນບໍ່ໃຫ້ມີບັດເສຍ ຫລື ບັດຂີດບໍ່ຖືກຕ້ອງ 100% ແລະ ຮັບປະກັນດ້ານຄວາມສະຫງົບ-ຄວາມປອດໄພ ໃນບັ້ນເລືອກຕັ້ງ 100%.

ໃນໂອກາດນີ້, ທາງຄະນະ ຍັງໄດ້ເດີນທາງໄປເມືອງໜອງບົກ ແຂວງຄໍາມ່ວນ ເພື່ອຕິດຕາມການລາຍງານຄວາມພ້ອມ ໃນການຮັບໃຊ້ບັ້ນເລືອກ ສສຊ ຊຸດທີ IX ແລະ ສສຂ ຊຸດທີ II ຂອງຄະນະກຳມະການເລືອກຕັ້ງໃນຄັ້ງນີ້ ແລະ ລົງພົບປະໂອ້ລົມ ແລະ ປຸກລະດົມໃຫ້ປະຊາຊົນ ບ້ານສອງເໝືອງໃຕ້ ໜ່ວຍປ່ອນບັດເລືອກຕັ້ງທີ 17 ໃຫ້ມີສະຕິຕື່ນຕົວໃນການມາເລືອກຕັ້ງໃນວັນທີ 21 ກຸມພານີ້ ຢ່າງຕັ້ງໜ້າ.

Medialaos MMD