ວັນທີ 9 ເດືອນກຸມພາ ປີ 2021 ນີ້ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ເຂດເລືອກຕັ້ງເມືອງໄຊສະຖານ ແຂວງໄຊຍະບູລີ ໄດ້ລົງພົບປະ ສະເໜີໂຕຕໍ່ຜູ້ມີສິດເລືອກຕັ້ງ ຢູ່ພາຍໃນເມືອງ ເຂົ້າຮ່ວມມີ ທ່ານນາຍບ້ານ, ຂະແໜງການຂອງບ້ານ, ກຸ່ມ ປກສ ບໍລິການປະຊາຊົນ, ຄູອາຈານ ພ້ອມດ້ວຍພໍ່ແມ່ປະຊາຊົນ ຜູ້ມີສິດເລືອກຕັ້ງເຂົ້າຮ່ວມ ຈໍານວນ 16 ບ້ານ. ການລົງພົບປະໂຄສະນາຫາສຽງໃນຄັ້ງນີ້ແມ່ນໄດ້ມີການສະເໜີຈຸດປະສົງຄາດໝາຍ, ໂຄງປະກອບຂອງຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II, ສະເໜີລາຍຊື່ພ້ອມທັງຜ່ານປະຫວັດຂອງຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX, ຈາກນັ້ນບັນດາຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງ ຊຸດທີ II ແຕ່ລະທ່ານ ກໍ່ໄດ້ ຂື້ນສະເໜີຕົວ ແລະ ປະຫວັດຫຍໍ້ກ່ຽວກັບວຽກງານການເຄື່ອນໄຫວຂອງຕົນໃນໄລຍະຜ່ານມາ.

ທັງນີ້ກໍ່ເພື່ອເປັນການສຶກສາອົບຮົມໃຫ້ຜູ້ມີສິດເລືອກຕັ້ງ ຮັບຮູ້ ແລະ ເຂົ້າໃຈແຈ້ງຕື່ມກ່ຽວກັບທາດແທ້ຂອງລະບອບການເມືອງຂອງພວກເຮົາ ຊຶ່ງແມ່ນລະບອບປະຊາທິປະໄຕປະຊາຊົນ, ເຂົ້າໃຈກ່ຽວກັບດ້ານໂຄງປະກອບການຈັດຕັ້ງ ແລະ ບຸກຄະລາກອນຂອງສະພາແຫ່ງຊາດ ຊຸດທີ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ເຫັນໄດ້ສິດ ແລະ ໜ້າທີ່ຂອງພົນລະເມືອງ ໃນການໄປປ່ອນບັດໃຊ້ສິດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ຢ່າງຄົບຖ້ວນ, ເຮັດໃຫ້ຜູ້ມີສິດເລືອກຕັ້ງ ໄດ້ເຫັນຜູ້ສະໝັກຮັບເລືອກຕັ້ງຕົວຈິງ ເພື່ອເປັນບ່ອນອີງໃນການເລືອກຕັ້ງເອົາຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II, ເພື່ອເຮັດໃຫ້ຜູ້ສະໝັກຮັບເລືອກຕັ້ງໄດ້ຮັບຮູ້ກ່ຽວກັບຄວາມມຸ່ງມາດປາຖະໜາ ແລະ ສະພາບການພັດທະນາ, ການດໍາລົງຊີວິດຂອງປະຊາຊົນໃນເຂດເລືອກຕັ້ງຂອງຕົນ ພ້ອມທັງສ້າງສາຍພົວພັນສະນິດແໜ້ນກັບປະຊາຊົນຢູ່ພາຍໃນເມືອງ. ນອກຈາກນີ້ການລົງສະເໜີໂຕຕໍ່ຜູ້ມີສິດເລືອກຕັ້ງໃນຄັ້ງນີ້ແມ່ນຈະໄດ້ມີການລົງຮອດວັນທີ 12 ເດືອນ ກຸມພາ ປີ 2021