ໃນວັນທີ 3-9 ກຸມພາ 2021 ທີ່ຜ່ານມາ, ສະຫະພັນກຳມະບານແຂວງສະຫວັນນະເຂດ ໄດ້ມີການສຶບຕໍ່ລົງເຄື່ອນໄຫວປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ຂຶ້ນຢ່າງເປັນທາງການທີ່ຫ້ອງປະຊຸມຂອງກຳມະບານຮາກຖານພະແນກກະສິກຳ ແລະ ປ່າໄມ້ແຂວງ, ກຳມະບານຮາກຖານບໍລິສັດນ້ຳປະປາສະຫວັນ DKLS, ກຳມະບານຮາກຖານ ສາຂາລັດວິສາຫະກິດໄຟຟ້າລາວ ແຂວງສະຫວັນນະເຂດ, ກຳມະບານຮາກຖານບໍລິສັດ ຄູນໄຊພັດທະນາຫີນກາວ ແລະ ກຳມະບານຮາກຖານ ທະນາຄານພັດທະນາລາວ ສາຂາສະຫວັນນະເຂດ ໂດຍການໃຫ້ກຽດເຂົ້າຮ່ວມ ແລະ ຂຶ້ນປາຖະກະຖາໂດຍທ່ານ ຄຳຕັນ ສີໂພໄຊ ຮອງປະທານຄະນະບໍລິຫານງານສະຫະພັນກຳມະບານແຂວງສະຫວັນນະເຂດ, ຊຶ່ງມີຄະນະພັກ, ຄະນະພະແນກ, ຄະນະອຳນວຍການບໍລິສັດ, ຄະນະກຳມະບານຮາກຖານ ຕະຫຼອດເຖິງສະມາຊິກກຳມະບານພາຍໃນຂອງຕົນເຂົ້າຮ່ວມ ຈຳນວນ 208 ທ່ານ, ຍິງ 85 ທ່ານ.

ໂອກາດດັ່ງກ່າວ ທ່ານ ຄຳຕັນ ສີໂພໄຊ ກໍ່ໄດ້ຍົກໃຫ້ເຫັນເຖິງຕົ້ນກຳເນີດ ຂອງການເຕີບໃຫຍ່ຂະຫຍາຍຕົວ ແລະ ຜົນງານອັນພົ້ນເດັ່ນຂອງການເຄື່ອນໄຫວວຽກງານກຳມະບານໃນການປະກອບສ່ວນພາລະກິດປະຕິວັດ ຕະຫຼອດໄລຍະ 65 ປີທີ່ຜ່ານມາຈົນເຖິງປະຈຸບັນ ໃນການສຶບຕໍ່ເຄື່ອນໄຫວວຽກງານຕາມພາລະບົດບາດຂອງຕົນ ເຂົ້າໃນການສຶກສາອົບຮົມທາງດ້ານການເມືອງ-ແນວຄິດ ແລະ ການປົກປ້ອງສິດຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານທັງໃນ ແລະ ນອກລະບົບ ແຕ່ຂັ້ນສູນກາງລົງຮອດທ້ອງຖິ່ນຮາກຖານ ຕາມແຜນພັດທະນາວຽກງານກຳມະບານລາວ 5 ປີ ຄັ້ງທີ IV (2021-2025) ໃຫ້ປະກົດຜົນເປັນຈິງໃນເທື່ອລະກ້າວ