ອາທິດກວ່າໆ ມານີ້ສັງເກດເຫັນວ່າ: ອ້າຍນ້ອງກຳມະກອນແມ່ທັບນ້ອຍທີ 11 ຫວຽດນາມ ທີ່ໄດ້ຮັບມອບໝາຍໃຫ້ມາສ້າງຫໍສະພາແຫ່ງຊາດ ໃຫ້ລາວທີ່ນະຄອນຫລວງວຽງຈັນ ໄດ້ຂຸ້ນຂ້ຽວເຮັດວຽກຢ່າງຫ້າວຫັນຕາມມູນເຊື້ອດຸໝັ່ນຂະຫຍັນພຽນຂອງຊາວຫວຽດນາມ ທີ່ມີມາແຕ່ບູຮານນະການ ສະນັ້ນມາຮອດຕອນເຊົ້າມື້ນີ້ ວັນທີ 11 ກຸມພາ 2021 ແຕ່ເຊົ້າມືດໄດ້ຍິນສຽງຮ້ອງແຊວປານນົກອີ່ອ້ຽງກິນໝາກໂພໄຮປະສານກັບສຽງເຫຼັກກະທົບກັນດັງສະນັ່ນຝັ່ນເຟືອນທົ່ວທ້ອງສະໜາມຫລວງ.
ພໍ່ຕາເວັນຂຶ້ນລັບຫລ່ຽມຫໍສະພາ ທີ່ກຳລັງກໍ່ສ້າງຢູ່ນັ້ນກໍ່ຫລຽວເຫັນປ້າຍສີຄຳທີ່ບັນຈົງໄວ້ໃນໜ້າຫໍສະພາວ່າ: ສະພາແຫ່ງຊາດ ຢ່າງສວຍສົດງາມສະດຸດຕາ ຫລາຍຄົນເວົ້າວ່າ: ພວກເຂົາເຈົ້າຂຸ້ນຂ້ຽວວຽກງານກໍ່ເພື່ອໃຫ້ທັນກັບການຈະເປີດກອງປະຊຸມໃຫຍ່ຊຸດທີ IX ຂອງສະພາແຫ່ງຊາດ ທີ່ຈະມາເຖິງຫລັງຈາກການເລືອກຕັ້ງທີ່ຈະສຳເລັດລົງໃນວັນອາທິດທີ 21 ກຸມພາທີ່ຈະມາເຖິງນີ້.


ອີກດ້ານໜຶ່ງການທີ່ພວກເພີ່ນເຮັດວຽກຢ່າງເລັ່ງດ່ວນແນວນີ້ກໍ່ເພື່ອໃຫ້ທັນກັບບຸນປີໃໝ່ຂອງຫວຽດນາມ ເພື່ອຈະໄດ້ກັບເມືອເຮັດບຸນໄຫວ້ບັນພະບຸຣຸດຂອງຕົນ ແລະ ອວຍພອນໄຊໃຫ້ພອນກັບຄອບຄົວເພື່ອນມິດສະຫາຍຍາດຕິພີ່ນ້ອງຕາມປະເພນີຮີດຄອງທີ່ເຄີຍປະຕິບັດກັນມາແຕ່ດຶກດຳບັນ ອວຍພອນໃຫ້ພີ່ນ້ອງຫວຽດນາມຢູ່ດີມີສຸກ ຊື້ໄດ້ຂາຍໝານ ແລະ ປະສົບຜົນສຳເລັດໃນຊີວິດ ແລະ ການງານທຸກປະການຕະຫລອດປີໃໝ່ນີ້ດ້ວຍ.

ພາບ-ຂ່າວ: ສີພາ ນົງລາດ