ເພື່ອເປັນການສະແດງເຖິງຄວາມກະຕັນຍູຮູ້ບຸນຕໍ່ອະດີດພະນັກງານການນຳຂັ້ນສູງ ຂອງສະຫະພັນກຳມະບານແຂວງສະຫວັນນະເຂດ ໃນໄລຍະຫລາຍທົດສະວັດທີ່ຜ່ານມາແລະເພື່ອຂໍທິດຊີ້ນຳກ່ຽວກັບການປະຕິບັດວຽກງານອົງການກຳມະບານໃຫ້ມີຄວາມເຕີບໃຫຍ່ຂະຫຍາຍຕົວໄປເລື້ອຍໆ .ດັ່ງນັ້ນ ມາໃນລະຫວ່າງວັນທີ 5 ແລະ ວັນທີ 9 ກຸມພາ 2021 ຜ່ານມາ ທ່ານ ສົມໃຈ ສີສົມພອນ ຄະນະບໍລິຫານງານສູນກາງກຳມະບານລາວ ປະທານສະຫະພັນກຳມະບານແຂວງສະຫວັນນະເຂດ ,ທ່ານ ມູນທາ ໄຊຍະລິດ ຮອງປະທານຄະນະບໍລິຫານງານສະຫະພັນກຳມະບານແຂວງ ພ້ອມດ້ວຍຫົວໜ້າຫ້ອງການແລະວິຊາການໄດ້ນຳເອົາກະຕ່າຂອງຂວັນເຂົ້າຂຳນັບອວຍພອນ ອະດີດປະທານແລະຮອງປະທານສະຫະພັນກຳມະບານແຂວງ (ຜູ້ທີ່ສຳເລັດລາດຊະການໃນແຕ່ລະສະໄໝ)

ເນື່ອງໃນວາລະໂອກາດວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ໃນນີ້ຄະນະສະຫະພັນກຳມະບານແຂວງ ໄດ້ເຂົ້າຂຳນັບອວຍພອນ ທ່ານ ຍາລຸງ ຄຳໄຂ ຂົງຄຳ ອະດີດກຳມະການພັກແຂວງ,ປະທານສະຫະພັນກຳມະບານແຂວງສະຫວັນນະເຂດ ຜູ້ທຳອິດ ສະໄໝປີ ( 1976-1983) ,ທ່ານ ນາງ ວິລະວັນ ລຽບວິໄຊນະວັງ ອະດີດຄະນະປະຈຳພັກແຂວງ ປະທານສະຫະພັນກຳມະບານແຂວງສະຫວັນນະເຂດ (2005-2010),ທ່ານ ເພັດອຳນວຍ ມະນີວົງ ອະດີດຮອງເລຂາພັກເມືອງຄັນທະບູລີ (ສະໄໝກ່ອນ)ທັງເປັນອະດີດຮອງປະທານສະຫະພັນກຳມະບານແຂວງສະຫວັນນະເຂດ (ສະໄໝທີVI)ແລະທ່ານ ບຸນລ້ຽງ ຈັນວັນເພັງ ອະດີດກຳມະການພັກແຂວງ ,ອະດີດເຈົ້າເມືອງອາດສະພອນ,ເມືອງສອງຄອນ ແລະປະທານສະຫະພັນກຳມະບານແຂວງສະຫວັນນະເຂດ ສະໄໝທີ VII( 2019-2020) .ແຕ່ລະທ່ານກໍ່ໄດ້ສະແດງຄວາມຂອບໃຈແລະພ້ອມທັງກ່າວອວຍພອນເຊິ່ງກັນແລະກັນ ຂໍຈົ່ງໃຫ້ກຳມະບານລາວ ເວົ້າສະເພາະສະຫະພັນກຳມະບານແຂວງສະຫວັນນະເຂດ ຈົ່ງພ້ອມກັນກ້າວໜ້າບຸກບືນໃນທຸກຂົງເຂດວຽກງານໃຫ້ປະສົບຜົນສຳເລັດຕາມພາລະກິດປ່ຽນແປງໃໝ່ຂອງພັກປະຊາຊົນປະຕິວັດລາວຢ່າງເຂັ້ມແຂງຮອບດ້ານ.
ສະເໜີຂ່າວໂດຍ : ວຽງສະໄໝ ຊົມຊອບ