ວັນທີ 10-11 ກຸມພາ 2021 ກະຊວງສາທາລະນະສຸກ ໄດ້ຈັດກອງປະຊຸມທົບທວນຄືນການຈັດຕັ້ງປະຕິບັດໄລຍະຂ້າມຜ່ານ ການໂຕ້ຕອບພະຍາດ COVID-19 ໃນບັນດາແຂວງພາກເໜືອ ສປປລາວ, ທີ່ຫ້ອງປະຊຸມ ໂຮງແຮມພູແມນ ແຂວງຫຼວງພະບາງ, ໂດຍການເປັນປະທານຂອງ ທ່ານ ຮສ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ມີຫົວໜ້າກົມຄວບຄຸມພະຍາດຕິດຕໍ່, ຮອງຫົວໜ້າພະແນກສາທາລະນະສຸກແຂວງ, ຕາງໜ້າອົງການໂກຟີ ປະຈໍາ ສປປລາວ, ຕາງໜ້າອົງການຈັດຕັ້ງມະຫາຊົນ, ພ້ອມດ້ວຍວິຊາການ 10 ແຂວງ, ຕະຫຼອດຮອດ ປກສ-ປກຊ ແລະບັນດາຄູ່ຮ່ວມພັດທະນາໂຄງການເຂົ້າຮ່ວມ.

ກອງປະຊຸມຄັ້ງນີ້ ເພື່ອເປັນການຮຽນຮູ້ ແລະແລກປ່ຽນປະສົບການ ເຊິງກັນ ແລະກັນ ກັບຫຼາຍໜ່ວຍງານທີ່ກ່ຽວຂ້ອງ, ເປັນການເຮັດວຽກຮ່ວມກັນກັບຫຼາຍໜ່ວຍງານ, ສາມາດກໍາໄດ້ຈຸດດີ ແລະຂໍ້ຄົງຄ້າງ ເພື່ອເປັນແນວທາງໃນການສ້າງແຜນຮອງຮັບຕໍ່ການໂຕ້ຕອບຕໍ່ການລະບາດ ໃນຕໍ່ໜ້າ. ທ່ານ ຮສ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໄດ້ຍົກໃຫ້ເຫັນເຖິງການລະບາດຂອງພະຍາດ COVID-19, ເຊິ່ງໃນປັດຈຸບັນ ທົ່ວໂລກ ມີຄົນຕິດເຊື້ອຫຼາຍກວ່າ 107.368.603 ຄົນ ແລະ ຫຼາຍກວ່າ 2 ລ້ານຄົນ ເສຍຊີວິດ ແລະ ໃນ ສປປລາວ ກໍມີຜູ້ຕິດເຊື້ອທັງໝົດ 44 ຄົນ, ເຊິ່ງໄດ້ສ້າງກະທົບໃນຫຼາຍໆດ້ານເປັນຕົ້ນແມ່ນ ທາງດ້ານສຸຂະພາບ ເຮັດໃຫ້ມີຄົນຕິດເຊື້ອ ແລະ ເສຍຊີວິດຈໍານວນຫຼວງຫຼາຍ. ພ້ອມນັ້ນທ່ານຍັງໄດ້ເນັ້ນໜັກໃຫ້ພາກສ່ວນທີ່ກ່ຽວຂອງສືບຕໍ່ປະຕິບັດຕາມມາດຕະການ ໃນການເອົາໃຈໃສ່ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດCOVID-19 ຢ່າງເຂັ້ມງວດ ແລະ ກຽມພ້ອມນໍາໃຊ້ມາດຕະການ ຜ່ອນຜັນ ເພື່ອຫຼຸດຜ່ອນ ຜົນກະທົບທາງດ້ານເສດຖະກິດ ແລະ ສັງຄົມ ໃຫ້ກັບຄືນມາເປັນປົກກະຕິເທື່ອລະກ້າວ.

ວາລະກອງປະຊຸມ ທ່ານ ດຣ ນາງ ວຽງສະຫວັນ ສິດທິວົງ ກໍໄດ້ນຳສະເໜີເນື້ອໃນ ແລະ ພາບລວມໃນການທົບທວນຄືນ ການໂຕ້ຕອບຕໍ່ການລະບາດຂອງພະຍາດ(IAR), ບັນດາຫຼັກການຂອງການທົບທວນຄືນ ແລະສິ່ງທີ່ບໍ່ຄວນທົບທວນຄືນ, ພ້ອມທັງນຳສະເໜີພາບລວມຂອງການລະບາດຂອງພະຍາດ COVID-19 ຂັ້ນແຂວງ ໃນ ສປປລາວ ໂດຍມີການກຳນົດຈຸດປະສົງ, ຂົງເຂດ, ຂັ້ນຕອນການທົບທວນຄືນການໂຕ້ຕອບຕໍ່ການລະບາດຂອງພະຍາດ COVID-19 ແລະຍັງໄດ້ສະເໜີ ຄວາມຄາດຫວັງທີ່ຈະໄດ້ຮັບຈາກການທົບທວນ ພ້ອມທັງເຜີຍແຜ່ກົດລະບຽບ ໃນການທົບທວນຄືນການໂຕ້ຕອບຕໍ່ການລະບາດຂອງພະຍາດ ໃຫ້ທຸກທ່ານໄດ້ຮັບຮູ້ ແລະເຂົ້າໃຈໃນການເຮັດກິດຈະກຳທົບທວນຄືນໃນຄັ້ງນີ້ຜ່ານໄປໄດ້ໂດຍດີ ແລະ ມີປະສິດທິພາບຫຼາຍທີ່ສຸດ

ການທົບທວນຄັ້ງນີ້ ແມ່ນກໍານົດເອົາເດືອນມັງກອນ ເຖິງເດືອນທັນວາ 2020, ຜ່ານມາໂດຍອີງໃສ່ແຜນງານແຫ່ງຊາດໃນການກຽມຄວາມພ້ອມ ແລະ ໂຕ້ຕອບຕໍ່ການລະບາດ ເຊິ່ງລາຍລະອຽດຂອງຂົງເຂດວຽກງານມີດັ່ງນີ້: ການອອກຄໍາສັ່ງ, ປະສານງານ ແລະ ການວາງແຜນ ແລະ ມາດຕະການທາງດ້ານສາທາລະນະສຸກ ແລະ ສັງຄົມ, ການເຂົ້າເຖິງ ແລະຊົມໃຊ້ຢາ ແລະຜະລິດຕະພັນການແພດທີ່ມີຄຸນນະພາບ, ວຽກງານເຝົ້າລະວັງ ແລະວິເຄາະ, ວຽກງານສື່ສານເພື່ອຫຼຸດຜ່ອນຄວາມສ່ຽງ, ວຽກງານຄຸ້ມຄອງກໍລະນີ ແລະ ວຽກງານບໍລິການສາທາລະນະສຸກທີ່ຈໍາເປັນ, ວຽກງານການກັນ ແລະ ຄວບຄຸມການຕິດເຊື້ອ ແລະ ນໍ້າສະອາດ, ວຽກງານຈຸດຜ່ານແດນ PoE ເຫຼົ່ານີ້ເປັນຕົ້ນ