ໃນວັນທີ 8 ກຸມພາ 2021 ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະ ຊວງປ້ອງກັນປະເທດ, ຄະນະປະຈຳກໍາມະການເລືອກຕັ້ງລະດັບຊາດ, ພ້ອມຄະນະ ໄດ້ລົງເຄື່ອນໄຫວຕິດ ຕາມຊຸກຍູ້ວຽກງານ ການກະກຽມ ໃຫ້ແກ່ບັ້ນເລືອກຕັ້ງ ສະມາຊິກ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ແລະ ພົບປະໂອ້ລົມຜູ້ມີສິດເລືອກຕັ້ງ ຢູ່ບ້ານໄຊສີ ເມືອງໄຊເສດຖາ ແຂວງອັດຕະປື ໂດຍມີ ທ່ານ ບຸນເສີດ ເສດທິລາດ ຮອງເຈົ້າແຂວງອັດ​ຕະປື, ທ່ານ ອຸດສະຫະ ກົມມະເມືອງ ຮອງເລຂາພັກເມືອງ, ພ້ອມດ້ວຍນາຍບ້ານ ແລະ ພໍ່ແມ່ປະຊາຊົນບ້ານດັ່ງກ່າວ ເຂົ້າຮ່ວມຕ້ອນຮັບ.

ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ກໍໄດ້ມີ​ຄຳ​ເຫັນໂອ້ລົມ ​ແລະ ຮຽກຮ້ອງໃຫ້ພໍ່ແມ່ປະຊາຊົນ ຜູ້ມີສິດປ່ອນບັດເລືອກຕັ້ງອອກມາໃຊ້ສິດໜ້າທີ່ຂອງຕົນ ແລະ ເປັນເຈົ້າການຊ່ວຍກັນຮັກສາ ຄວາມສະຫງົບປອດໄພ ໃຫ້ຮັບປະກັນ 300% ຄື: ຮັບປະກັນຜູ້ມີສິດປ່ອນບັດ ຕື່ນຕົວສະໝັກໃຈໄປໃຊ້ສິດເລືອກຕັ້ງໃຫ້ໄດ້ 100%, ຮັບປະກັນບໍ່ໃຫ້ມີບັດຕາຍ 100% ແລະ ແຕ່ລະໜ່ວຍປ່ອນບັດ ແລະ ເຂດເລືອກຕັ້ງຕ້ອງຮັບປະກັນໃຫ້ມີຄວາມສະຫງົບປອດໄພ 100%, ພ້ອມ​ນີ້ ກໍ​ໃຫ້ເປັນເຈົ້າການ ​ແລະ ມີສະຕິຕ້ານຕໍ່ກົນອຸບາຍຂອງກຸ່ມຄົນບໍ່ຫວັງດີ ທີ່ຫວັງສ້າງຄວາມບໍ່ສະຫງົບ ໃນບ້ານເມືອງຂອງພວກເຮົາ, ຢ່າຫລົງເຊື່ອການບິດເບືອນໃສ່ຮ້າຍປ້າຍສີ ທີ່ບໍ່ມີມູນຄວາມຈິງ ໂດຍສະເພາະການສ້າງກະແສບໍ່ດີໄປທາງລົບຕໍ່ພັກ-ລັດເຮົາ ໃນສື່ສັງຄົມອອນລາຍ; ເຊື່ອມຊຶມຮຽນຮູ້ປະຫວັດສາດ ໂດຍສະເພາະປະຫວັດສາດການຕໍ່ສູ້ກູ້ຊາດຕ້ານພວກຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່, ຮຽນຮູ້ແບບຢ່າງທີ່ດີ ແລະ ຄວາມກ້າຫານເສຍສະຫລະເລືອດເນື້ອ, ເຫື່ອແຮງ ແລະ ສະຕິປັນຍາ ເພື່ອຊາດເພື່ອປະຊາຊົນ ຂອງຜູ້ນຳລາວເຮົາ; ພໍ່ແມ່ປະຊາຊົນພວກເຮົາ ໃຫ້ສືບຕໍ່ສ້າງຄວາມສາມັກຄີຮັກແພງກັນໃຫ້ໜັກແໜ້ນ, ສືບຕໍ່ຮັກສາສະຖຽນລະພາບທາງດ້ານການເມືອງ,  ພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຂຶ້ນເປັນກ້າວໆ.

ການລົງເຄື່ອນໄຫວຄັ້ງນີ້, ທ່ານ  ພົນເອກ ຈັນສະໝອນ ຈັນຍາລາດ ກໍໄດ້ຮັບຟັງການລາຍງານຄວາມພ້ອມຮອບດ້ານ ໃຫ້ແກ່ບັ້ນດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະ ພາປະຊາຊົນແຂວງ ຊຸດທີ II ຢູ່ໜ່ວຍປ່ອນບັດເລືອກຕັ້ງດັ່ງກ່າວ ຈາກນາຍບ້ານໄຊສີ ເຊິ່ງໂດຍລວມເຫັນວ່າຄວາມພ້ອມ ແລະ ບັນດາໜ້າວຽກຕ່າງໆແມ່ນມີຜົນສຳເລັດ, ພໍ່ແມ່ປະຊາຊົນ ກໍຄື ຜູ້ມີສິດປ່ອນບັດເລືອກຕັ້ງໄດ້ຮັບການເຊື່ອມຊຶມໃນການໃຊ້ສິດ ແລະ ໜ້າທີ່ຂອງຕົນ ເພື່ອຄັດເລືອກເອົາຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ເຂົ້າໃນກົງຈັກຂອງສະພາແຫ່ງຊາດ ແລະ ສະພາປະຊາ ຊົນແຂວງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)