ວັນທີ 11 ກຸມພາ 2021 ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ຄະນະກຳມະການເລືອກຕັ້ງລະດັບຊາດ, ປະທານອະນຸກຳມະການໂຄສະນາ ແລະ ປຸກລະດົມຂະບວນການ ພ້ອມຄະນະ ໄດ້ລົງຕິດຕາມ ການໂຄສະນາ, ປຸກລະດົມຂະບວນການ ໃນບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ເມືອງວັງວຽງແຂວງວຽງຈັນ. ໂດຍມີ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ,ເຈົ້າແຂວງ,ປະທານຄະນະກຳມະການເລືອກຕັ້ງແຂວງວຽງຈັນ, ທ່ານ ບຸນຈັນ ມາລາວົງ ກຳມະການພັກແຂວງ, ເລຂາພັກເມືອງ,ປະທານຄະນະກຳມະການເລືອກຕັ້ງເມືອງວັງວຽງ,ພ້ອມດ້ວຍບັນດາທ່ານໃນອະນຸກຳມະການ ແລະ ຄະນະຮັບຜິດຊອບບັ້ນເລືອກຕັ້ງຂອງແຂວງ,ຂອງເມືອງວັງວຽງເຂົ້າຮ່ວມ.

ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ,ເຈົ້າແຂວງ,ປະທານຄະນະກຳມະການເລືອກຕັ້ງແຂວງວຽງຈັນ ໄດ້ລາຍງານສະພາບການກະກຽມໃຫ້ແກ່ບັ້ນເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II. ເຊິ່ງພາຍຫລັງທີ່ໄດ້ຮັບຄຳແນະນຳຂອງຄະນະກຳມະການເລືອກຕັ້ງລະດັບຊາດ ກໍ່ໄດ້ຄົ້ນຄວ້າປະກອບບຸກຄະລາກອນ ພ້ອມທັງອອກຂໍ້ຕົກລົງແຕ່ງຕັ້ງອະນຸກຳມະການຕ່າງໆ ແລະ ອອກແຜນດຳເນີນງານຂອງຄະນະກຳມະການເລືອກຕັ້ງຂັ້ນແຂວງ ເພື່ອດຳເນີນການເລືອກຕັ້ງ. ຜ່ານການດຳເນີນງານເຫັນວ່າຄະນະກຳມະການ ແລະ ບັນດາອະນຸກຳມະການຊ່ວຍວຽກກຳມະການເລືອກຕັ້ງຂັ້ນແຂວງ, ຂັ້ນເມືອງກໍ່ໄດ້ຫ້າງກາກະກຽມແຕ່ຫົວທີ ແລະ ພ້ອມພາກັນຂຸ້ນຂ້ຽວປະຕິບັດແຜນງານ ແລະ ພາລະບົດບາດຂອງຕົນເຂົ້າໃນການກະກຽມຮັບໃຊ້ໃນບັ້ນເລືອກຕັ້ງຄັ້ງນີ້ ພ້ອມນັ້ນກໍ່ໄດ້ເກັບກຳສະຖິຕິຈຳນວນຜູ້ມີສິດປ່ອນບັດ ເຊິ່ງໃນທົ່ວແຂວງ ມີຈຳນວນຜູ້ມີສິດປ່ອນບັດເລືອກຕັ້ງທັງໝົດ 261.761 ຄົນ, ຍິງ 126.726 ຄົນ ແລະ ໄດ້ກຳນົດໜ່ວຍປ່ອນບັດເລືອກຕັ້ງທັງໝົດ 494 ໜ່ວຍ, ມີຫີບປ່ອນບັດທັງໝົດ 988 ຫີບ.

ສຳລັບແຂວງວຽງຈັນມີຜູ້ລົງສະໝັກຮັບເລືອກຕັ້ງເປັນ ສສຊ ຈຳນວນ 13 ທ່ານ, ຍິງ 2 ທ່ານ. ໃນນັ້ນມາຈາກສູນກາງຈຳນວນ 04 ທ່ານ ແລະ ທ້ອງຖິ່ນ 09 ທ່ານ, ເລືອກເອົາ 10 ທ່ານ ເພື່ອເປັນຕົວແທນຂອງປະຊາຊົນພາຍໃນແຂວງ ໄປເຮັດໜ້າທີ່ຢູ່ສະພາແຫ່ງຊາດ, ສ່ວນຜູ້ຮັບສະໝັກເລືອກຕັ້ງເປັນ ສສຂ ທົ່ວແຂວງມີຈຳນວນທັງໝົດ 53 ທ່ານ, ເລືອກເອົາ 31 ທ່ານ. ທ່ານເຈົ້າເມືອງວັງວຽງກໍ່ໄດ້ລາຍງານສະພາບການກະກຽມໃຫ້ແກ່ບັ້ນເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຢູ່ເມືອງວັງວຽງ ທົ່ວເມືອງມີໜ່ວຍປ່ອນບັດເລືອກຕັ້ງທັງໝົດ 65 ໜ່ວຍ, ໜ່ວຍເຄື່ອນທີ່ມີ 10 ໜ່ວຍ, ຜູ້ມີສິດປ່ອນບັດເລືອກຕັ້ງທັງໝົດມີ 31.812 ຄົນ, ຍິງ 16.442 ຄົນ. ໃນນີ້ຜູ້ສະໝັກຮັບເລືອກຕັ້ງເປັນ ສສຂ ປະຈຳເມືອງວັງວຽງມີ 5 ທ່ານ, ຍິງ 1 ທ່ານ.

ໂອກາດດຽວກັນ ທ່ານ ປອ ບຸນທອງ ຈິດມະນີ ກໍ່ໄດ້ມີຄຳເຫັນ ແລະ ຍົກໃຫ້ເຫັນເຖິງຄວາມໝາຍ, ຄວາມສຳຄັນແລະ ຮູບແບບ ຂອງການດຳເນີນການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ເພື່ອເຮັດໃຫ້ການປະຕິບັດໜ້າທີ່ຂອງການເລືອກຕັ້ງຄັ້ງນີ້ໄດ້ຮັບຜົນສຳເລັດຕາມຄາດໝາຍ, ຕ້ອງຮູ້ເຖິງເງື່ອນໄຂທີ່ອຳນວຍຄວາມສະດວກ ກໍ່ຄືມີແນວທາງການເມືອງທີ່ຖືກຕ້ອງ, ມີນິຕິກຳ, ລະບຽບຫລັກການ, ມີການນຳພາ-ຄຸ້ມຄອງ ແລະ ມີຈຸດໝາຍໃນການເລືອກຕັ້ງ ລວມເຖິງປະສົບການທີ່ເປັນພື້ນຖານອຳນວຍຄວາມສະດວກໃຫ້ແກ່ການເລືອກຕັ້ງຄັ້ງນີ້ ແຕ່ຄຽງຄູ່ກັບຂໍ້ສະດວກນັ້ນ ກໍ່ຍັງມີດ້ານອຸປະສັກ ແລະ ສິ່ງທ້າທາຍ ຫລາຍດ້ານທີ່ຈະຕ້ອງໄດ້ພ້ອມພາກັນເອົາໃຈໃສ່ຢ່າງເປັນເຈົ້າການ ເປັນຕົ້ນແມ່ນ ການປະຕິບັດຕໍ່ມາດຕະການແຜ່ລະບາດຂອງພະຍາດໂຄວິດ-19 ລວມເຖິງບັນຫາປະກົດການຫຍໍ້ທໍ້ໃນສັງຄົມ ແລະ ກຸ່ມຄົນທີ່ບໍ່ດີ ທີ່ມີກົນອຸບາຍຫວັງມ້າງເພລຳລາຍ ພ້ອມນັ້ນກໍ່ຕ້ອງກຳແໜ້ນຕໍ່ທິດຊີ້ນຳຂອງພັກກ່ຽວກັບການເລືອກຕັ້ງ ແລະ ເອົາໃຈໃສ່ໂຄສະນາ, ຊີ້ແຈງໃຫ້ປະຊາຊົນໄດ້ເຂົ້າໃຈຕໍ່ເຫດການສຳຄັນດັ່ງກ່າວ ພ້ອມທັງປຸກລະດົມໃຫ້ປະຊາຊົນໄດ້ເປັນເຈົ້າການເຂົ້າຮ່ວມໃນຂະບວນການເລືອກຕັ້ງ ເພື່ອຮັບປະກັນຕາມ 3 ຄາດໝາຍໃຫຍ່ຄື: ຮັບປະກັນໃຫ້ຜູ້ມີສິດ ໄດ້ຕື່ນຕົວ ແລະ ສະໝັກໃຈໄປປ່ອນບັດເລືອກຕັ້ງຢ່າງຄົບຖ້ວນ 100%, ຮັບປະກັນບໍ່ໃຫ້ມີບັດເສຍ ຫລື ບັດຂີດບໍ່ຖືກຕ້ອງ 100% ແລະ ຮັບປະກັນດ້ານຄວາມສະຫງົບ ຄວາມປອດໄພ ໃນບັ້ນເລືອກຕັ້ງ 100%