ວັນທີ 21 ກຸມພາ ແມ່ນວັນເລືອກຕັ້ງ 1 ສິດ 1 ສຽງຂອງທ່ານມີຄວາມໝາຍໃນການປະຕິບັດສິດ, ພັນທະ, ໜ້າທີ່ຂອງພົນລະເມືອງລາວ ນີ້ແມ່ນປະຊາທິປະໄຕໃນການໃຊ້ສິດປ່ອນບັດເພື່ອເລືອກເອົາຜູ້ແທນຂອງປະຊາຊົນເຂົ້າໄປປະຕິບັດໜ້າທີ່ບໍລິຫານງານໃນສະພາ, ທ່ານນາງ ວອນພັດ ວົງຈັນດີ ພະນັກງານບໍານານ ໜັງສືພິມປະຊາຊົນ ປັດຈຸບັນຢູ່ບ້ານໂນນສະຫວ່າງ ເມືອງຈັນທະບູລີ ນະຄອນຫຼວງວຽງຈັນ ໄດ້ກ່າວສະແດງ ຄວາມຮູ້ສຶກຜ່ານສື່ມວນຊົນຕໍ່ບັ້ນເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກ ສະພາປະຊາຊົນແຂວງ (ສສຂ), ນະຄອນຫຼວງວຽງຈັນ ຊຸດທີ II ໃນວັນທີ 21 ກຸມພາທີ່ຈະມາເຖິງນີ້ວ່າ: ໃນນາມພົນລະເມືອງລາວຜູ້ໜຶ່ງມີຄວາມຮູ້ສຶກດີໃຈຕໍ່ບັ້ນເລືອກຕັ້ງດັ່ງກ່າວເພາະຈະໄດ້ອອກໄປໃຊ້ສິດເລືອກຕັ້ງ ເອົາຜູ້ແທນ, ເພື່ອເລືອກເອົາຄົນມີຄວາມຮູ້, ມີຄຸນສົມບັດ, ມີຄວາມສາມາດນໍາພາບ້ານເມືອງໃຫ້ຈະເລີນກ້າວ ໜ້າ.

ສຳລັບບ້ານໂນນສະຫວ່າງໄດ້ກຳນົດໃຫ້ມີ 3 ຈຸດເລືອກຕັ້ງ, ຂ້າພະເຈົ້າຖືກເລືອກຕັ້ງຢູ່ຈຸດເຮືອນຮັບແຂກ ຂອງກະຊວງແຮງງານ, ສະຫວັດດີການ – ສັງຄົມ ຊຶ່ງເປັນໜຶ່ງໃນ 3 ຈຸດເລືອກຕັ້ງຂອງບ້ານ, ຂ້າພະເຈົ້າມີ ຄວາມຮັບຮູ້ເຂົ້າໃຈແຈ້ງຕໍ່ລະບຽບຂອງການເລືອກຕັ້ງທີ່ທາງຂັ້ນເທິງວາງອອກ, ຢູ່ເຂດເລືອກຕັ້ງນະຄອນຫຼວງ ວຽງຈັນ ມີຜູ້ສະໝັກຮັບເລືອກຕັ້ງ 23 ທ່ານເລືອກເອົາ 18 ທ່ານ.

ໃນໂອກາດດຽວກັນທ່ານນາງ ສີອຳພອນ ວຽງວິໄລ ປະຊາຊົນບ້ານດົງໂດກ ເມືອງໄຊທານີ ອາຊີບ ຄ້າຂາຍ ຢູ່ຕະຫຼາດໂນນສະຫວ່າງ ກ່າວສະແດງຄວາມຮູ້ສຶກດີໃຈ ແລະ ພາກພູມໃຈຕໍ່ບັ້ນເລືອກຕັ້ງ ທີ່ຈະມາເຖິງນີ້ ທີ່ຈະໄດ້ໄປເລືອກຕັ້ງເອົາຜູ້ແທນເພື່ອມາບໍລິຫານປະເທດເຮົາໃຫ້ມີຄວາມຈະເລີນ ແລະ ພັດທະ ນາທຽບເທົ່າກັບສາກົນ, ຂ້າພະເຈົ້າມີຄວາມຕື່ນເຕັ້ນຄອງຄອຍ ແລະ ດີອົກດີໃຈທີ່ຈະໄດ້ອອກໄປໃຊ້ສິດຂອງຕົນ ເພື່ອເລືອກເອົາຄົນດີມາພັດທະນາປະເທດໃຫ້ຈະເລີນຮຸ່ງເຮືອງ ຄິດວ່າໃນມື້ເລືອກຕັ້ງຕົນເອງຈະຕື່ນແຕ່ເຊົ້າ ເພື່ອໄປໃຊ້ສິດຂອງຕົນເລືອກເອົາຜູ້ແທນຂອງປະຊາຊົນ.

ທ່ານນາງ ບົວໄລ ແດງສີໄຮ ປະຊາຊົນບ້ານບໍ່ນາງົວ ເມືອງຈັນທະບູລີ ອາຊີບພະນັກງານຂາຍເຄື່ອງຢູ່ ຕະຫຼາດໂນນສະຫວ່າງ ກ່າວວ່າ: ວັນທີ 21 ກຸມພານີ້ເປັນວັນເລືອກຕັ້ງ ຕົນເອງຈະໄປໃຊ້ສິດ ແລະ ປະຕິບັດພັນທະຂອງພົນລະເມືອງໃນການເລືອກເອົາຜູ້ແທນເຂົ້າໄປເຮັດວຽກໃນສະພາເພື່ອແກ້ໄຂບັນຫາຕ່າງໆຊ່ວຍປະ ຊາຊົນ ແລະ ຈະເລືອກເອົາຜູ້ມີຄວາມຮູ້-ຄວາມສາມາດເຂົ້າໄປບໍລິຫານງານໃນສະພາ, ຂໍເຊີນຊວນປະຊາຊົນ ລາວບັນດາເຜົ່າແມ່ຄ້າຊາວຂາຍໃນຂອບເຂດທົ່ວປະເທດ ໂດຍສະເພາະແມ່ນໄວໜຸ່ມຜູ້ທີ່ມີອາຍຸ 18 ປີຂຶ້ນໄປ ເພື່ອເຂົ້າຮ່ວມບັ້ນເລືອກຕັ້ງໃຫ້ມີບັນຍາກາດຟົດຟື້ນ ແລະ ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.

Medialaos MMd (ແຫຼ່ງຂໍ້ມູນຈາກ: ໜັງສືພິມປະຊາຊົນ)