ໃນໂອກາດທີ່ ຜູ້ລົງສະໝັກຮັບເລືອກຕັ້ງ ສສຊ ຊຸດທີIX ປະຈໍາເຂດເລືອກຕັ້ງທີ 16 ແຂວງເຊກອງ ຈໍານວນ 9 ທ່ານ, ຍິງ 3 ທ່ານ ລົງເຄື່ອນໄຫວຂໍສຽງສະໜັບສະໜູນຈາກຜູ້ມີສິດປ່ອນບັດເລືອກຕັ້ງຢູ່ໜ່ວຍທີ 1 ແລະ ໜ່ວຍທີ 2 ເທດສະບານເມືອງກະລຶມ ໃນວັນທີ 11 ກຸມພານີ້; ທ່ານ ພັນເອກ ທອງສີ ກຸນສະນະ ກຳມະການປະຈໍາພັກແຂວງ, ຫົວໜ້າການທະຫານ ກອງບັນຊາທະຫານແຂວງເຊກອງ, ຫົວໜ້າຄະນະນໍາພາຂະບວນຜູ້ລົງສະໝັກຮັບເລືອກຕັ້ງ ສສຊ ແຂວງເຊກອງ ໄດ້ຮຽກຮ້ອງໃຫ້ຜູ້ມີສິດປ່ອນບັດ ນັບແຕ່ອາຍຸ 18 ປີຂຶ້ນໄປ ຈົ່ງພ້ອມກັນເຮັດໜ້າທີ່ປ່ອນບັດເລືອກເອົາຕົວແທນແຫ່ງສິດ ແລະ ການປົກປ້ອງສິດຜົນປະໂຫຍດອັນຊອບທໍາຂອງປະຊາຊົນ ເພື່ອປະຊາຊົນ ໃຫ້ໄດ້ 100%

ພ້ອມນີ້, ທ່ານ ພັນເອກ ທອງສີ ກຸນສະນະ ຍັງໄດ້ຮຽກຮ້ອງມາຍັງປະຊມຊົນບັນດາເຜົ່າທົ່ວປະເທດ ເວົ້າລວມ, ເວົ້າສະເພາະ ກໍຄືພະນັກງານ, ທະຫານ-ຕໍາຫຼວດ ຕະຫຼອດຮອດປະຊາຊົນຊາວເມືອງກະລຶມ ຜູ້ມີສິດປ່ອນບັດທັງໝົດ 8.913 ຄົນ, ຍິງ 4.327 ຄົນ ໃນທົ່ວເມືອງ ຈົ່ງເຂົ້າຮ່ວມການໃຊ້ສິດປ່ອນບັດເລືອກຕັ້ງໃຫ້ເປັນຂະບວນຟົດຟື້ນ ເດໃຫ້ການການເລືອກຕັ້ງບັນລຸຜົນສໍາເລັດ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ແນໃສ່ສ້າງການຫັນປ່ຽນ ທີ່ແຂງແຮງເລິກເຊິ່ງຮອບດ້ານໃນການປະຕິບັດພາລະບົດບາດຂອງສະພາແຫ່ງຊາດ ໃນຊຸມປີຕໍ່ໜ້າ.

ຈາກນັ້ນ, ຜູ້ລົງສະໝັກຮັບເລືອກຕັ້ງ ສສຊ ຊຸດທີ 9 ກໍໄດ້ຜັດປ່ຽນກັນຂຶ້ນສະເໜີຊື່ ແລະ ລາຍງານປະຫວັດການເຄື່ອນໄຫວ ໃຫ້ຜູ້ມີສິດປ່ອນບັດໃນໜ່ວຍເລືອກຕັ້ງທີ 1 ມີບ້ານແກ້ງກຸຍ, ບ້ານວັກ ແລະໜ່ວຍເລືອກຕັ້ງທີ 2 ມີບ້ານແກ້ງກຽນ ແລະ ບ້ານຈຼອກ ໄດ້ຮັບຮູ້ເຖິງຜົນງານການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ ເພື່ອຂໍສຽງສະໜັບສະໜູນຈາກຜູ້ມີສິດປ່ອນບັດເລືອກຕັ້ງທັງໝົດທົ່ວເມືອງກະລຶມ ໃນຈໍານວນ 8.913 ຄົນ, ຍິງ 4.327 ຄົນໃຫ້ຮັບປະກັນໄດ້ໃນການມາໃຊ້ສິດ 100%.