ກອງປະຊຸມຄົບຄະນະບໍລິຫານງານສະຫະພັນແມ່ຍິງ #ແຂວງເຊກອງ ( ສຍຂ ), ໄດ້ໄຂຂື້ນຕອນເຊົ້າວັນທີ 11 ກຸມພາ 2021 ນີ້; ຢູ່ທີ່ຫ້ອງປະຊຸມຊັ້ນ III ຂອງຫ້ອງວ່າການແຂວງເຊກອງ, ໂດຍການເປັນປະທານຂອງທ່ານ ນາງ ຈັນຫອມ ມະຫາໄຊ ຮອງເລຂາພັກແຂວງເຊກອງ ຊີ້ນຳວຽກງານການເມືອງແນວຄິດ, ມີທ່ານ ນາງ ວິໄລວັນ ດາລາສີນ ກຳມະການພັກແຂວງ ປະທານຄະນະບໍລິຫານງານສະຫະພັນແມ່ຍິງແຂວງ, ມີຮອງປະທານ, ປະທານສະຫະພັນແມ່ຍິງ 4 ເມືອງ, ພ້ອມດ້ວຍໜ່ວຍຮາກຖານສະຫະພັນແມ່ຍິງອ້ອມຂ້າງແຂວງເຂົ້າຮ່ວມຢ່າງພ້ອມພຽງ.

ທ່ານ ນາງ ມະນີວອນ ສາຍນໍ້າລີນ ຮອງປະທານສະຫະພັນແມ່ຍິງແຂວງ, ໄດ້ກ່າວສະຫຼຸບການເຄື່ອນໄຫວຈັດຕັ້ງປະຕິບັດວຽກງານປະຈຳ 7 ເດືອນທ້າຍປີ 2020 ແລະຜ່ານທິດທາງແຜນການປະຈໍາປີ 2021 ຂອງຄະນະບໍລິຫານງານສະຫະພັນແມ່ຍິງແຂວງເຊກອງ, ເຊີ່ງທ່ານໃຫ້ຮູ້ວ່າ: ຕະຫຼອດໄລະຜ່ານມາຄະນະບໍລິຫານງານສະຫະພັນແມ່ຍິງແຂວງ ກໍ່ຄືສະຫະພັນແມ່ຍິງແຕ່ລະຂັ້ນ ຍາມໃດກໍ່ໄດ້ມີຄວາມເອົາໃຈໃສ່ວຽກງານສຶກສາອົບຮົມການເມືອງ – ແນວຄິດໃຫ້ແກ່ຖັນແຖວສາມະຊິກແມ່ຍິງ ບັນດາເຜົ່າ, ຊັ້ນຄົນຕ່າງໆໃນສັງຄົມຢ່າງຕໍ່ເນື່ອງ, ເຮັດໃຫ້ເອື້ອຍນ້ອງແມ່ຍິງຈຳນວນຫຼວງຫຼາຍໄດ້ຮັບຮູ້ເຂົ້າໃຈເລີກເຊີ່ງຕໍ່ການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດໄດ້ເປັນຢ່າງດີ, ມີສະຕິລະວັງຕົວສູງ, ປະກອບສ່ວນຢ່າງຕັ້ງໜ້າຕໍ່ການຕ້ານ ແລະສະກັດກັ້ນປະກົດການຫຍໍ້ທໍ້ຕ່າງໆທີ່ເກີດຂື້ນໃນສັງຄົມ, ໂດຍຕິດພັນກັບວຽກງານສ້າງຂະບວນການຂໍ້ແຂ່ງຂັນ 3 ດີ ແລະການເສີມຂະຫຍາຍສະມາຊິກສະຫະພັນແມ່ຍິງໃຫ້ກວ້າງຂວາງ, ເຊີ່ງສະແດງອອກໃຫ້ເຫັນວ່າມາປະຈຸບັນທົ່ວແຂວງມີແມ່ຍິງທັງໝົດ 62.945 ຄົນ, ເປັນສະຫະພັນແມ່ຍິງ 25.877 ຄົນ, ຂະຫຍາຍໃໝ່ 481 ຄົນ, ມີສະມາຊິກແມ່ຍິງທີເປັນພະນັກງານ-ລັດຖະກອນ 1.937 ຄົນ, ເປັນສະມາຊິກພັກປະຊາຊົນປະຕິວັດລາວ 12.105 ຄົນ.

ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມ ຈາກທ່ານ ຮອງເລຂາພັກແຂວງເຊກອງເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນ, ຜົນງານທີ່ ສາມະຊິກສາຫະພັນແມ່ຍິງຍາດມາໄດ້ໃນໄລຍະຜ່ານມາ ແລະທ່ານຮຽກຮ້ອງມາຍັງສະມະຊິກສະຫະພັນແມ່ຍິງທຸກຖ້ວນໜ້າກໍ່ຄືຄະນະບໍລິຫານສະຫະພັນແມ່ຍິງແຂວງຕ້ອງໄດ້ເປັນເຈົ້າການໃນການຈັດຕັ້ງປະຕິມະຕິ, ຄໍາສັ່ງ, ຂໍ້ກໍານົດ, ກົດໝາຍຕ່າງໆຢ່າງເຂັ້ມງວດເພື່ອເປັນແບບຢ່າງນໍາໜ້າໃຫ້ແກ່ສະມະຊິກແມ່ໃນທົ່ວແຂວງ ເປັນຕົ້ນຕ້ອງເປັນເຈົ້າການປົກປັກຮັກສາວັດທະນະທໍາຮິດຄອງປະເພນີອັນດີງາມຂອງຊາດ, ຂອງເຜົ່າໃຫ້ຢູ່ຄູ່ຄົນລາວຕະຫຼອດໄປ.