ວັນທີ 10 ກຸມພາ 2021 ຜູ້ສະໝັກເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 14 ແຂວງສາລະວັນ ຈໍານວນ 12 ທ່ານ ຍິງ: 2 ທ່ານ, ໄດ້ສີບຕໍ່ເຄື່ອນໄຫວ ໂຄສະນາຫາສຽງ 2 ຈຸດຢູ່ເມືອງຕະໂອ້ຍຄື: ຈຸດທີ 1 ແມ່ນຢູ່ຈຸດເທດສະບານ, ຈຸດທີ່ 2 ບ້ານ ກົກບົກ ນຳພາທີມງານໂດຍທ່ານ ສີເຮັ່ງ ຫອມສົມບັດ ຮອງເລຂາພັກແຂວງ ທັງເປັນຜູ້ສະໝັກເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 14 ແຂວງສາລະວັນ, ໃຫ້ກຽດເຂົ້າຮ່ວມໂດຍທ່ານ ຈັນສະໜອນ ພົມມະແສງ ຫົວໜ້າຄະນະໂຄສະນາອົບຮົມແຂວງ ຮອງຫົວໜ້າອະນຸກຳມະການໂຄສະນາປຸກລະດົມຂະບວນການ, ທ່ານ ພັທ ບຸນເນື້ອ ຫຼອງຄຳໄຕ ກໍາມະການພັກແຂວງ ເລຂາພັກເມືອງ, ເຈົ້າເມືອງໆຕະໂອ້ຍ ພ້ອມດ້ວຍການນໍາຂອງເມືອງ, ພໍ່ແມ່ປະຊາຊົນ ແລະ ນ້ອງນ້ອຍນັກຮຽນເຂົ້າຮ່ວມ.

ທ່ານ ສີເຮັ່ງ ຫອມສົມບັດ ຮອງເລຂາພັກແຂວງ ຜູ້ສະໝັກໝາຍເລກ 1 ກໍ່ໄດ້ກ່າວເຖີງທັດສະນະຊີ້ນຳຂອງກົມການເມືອງສູນກາງພັກ ໂດຍສະເພາະແມ່ນເນື້ອໃນຈິດໃຈ ມະຕິ 118/ກມສພ ວ່າດ້ວຍການເພີ່ມທະວີ, ການຊີ້ນໍາໆພາຂອງຄະນະພັກຕໍ່ບັ້ນເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II, ໃນ 3 ທັດສະນະໃຫຍ່ຄື: 1.ການເລືອກຕັ້ງຊຸດນີ້ ເປັນການສືບຕໍ່ປັບປຸງ, ບູລະນະລະບອບປະຊາທິປະໄຕ ປະຊາຊົນ, ຈາກປະຊາຊົນ ໂດຍປະຊາຊົນ ແລະ ເພື່ອຜົນໂຫຍດຂອງປະຊາຊົນ, 2.ການເລືອກຕັ້ງ ເປັນພາກສ່ວນໜື່ງໃນການປັບປຸງບູລະນະການຈັດຕັ້ງ ແລະ ບຸກຄະລາກອນຂອງລະບົບການເມືອງຢູ່ສູນກາງ ແລະ ທ້ອງຖີ່ນ ເປັນການເລືອກເຟັ້ນ ແລະ ຊັບຊ້ອນພະນັກງານຮັບຜິດຊອບໃນວຽກງານຕ່າງໆ, 3. ການເລືອກຕັ້ງຊຸດນີ້ ເປັນຄວາມຮັບຜິດຊອບຂອງຄະນະພັກທຸກຂັ້ນ ແລະ ຂອງທົ່ວປວງຊົນ.

ທັງເລືອກໄດ້ຜູ້ທີ່ມີມາດຖານ, ເງື່ອນໄຂຄົບຖ້ວນ ທັງສູນກາງ, ທ້ອງຖີ່ນ, ເພດເຜົ່າ, ຜູ້ເກົ່າ ແລະ ຜູ້ໃໝ່. ການໂຄສະນາຫາສຽງຄັ້ງນີ້ ຜູ້ສະໜັກ ສສຊ ຊູດທີ IX ໄດ້ໃຫ້ສະເໜີຊື່ ແລະປະຫວັດການເຄື່ອນໄຫວຂອງຕົນເອງ ພ້ອມທັງສະເໜີຈຸດປະສົງໃນການລົງໂຄສະນາຫາສຽງໃນຄັ້ງນີ້ວ່າ: ແມ່ນເຫດການ ການເມືອງທີ່ສໍາຄັນຂອງຊາດ ແມ່ນເປັນການສຶກສາອົບຮົມໃຫ້ແກ່ຜູ້ມີສິດເຂົ້າໃຈຈະແຈ້ງຕື່ມກ່ຽວກັບທາດແທ້ຂອງລະບອບການເມືອງຂອງພັກເຮົາ, ມີຄວາມຮັບຮູ້ເຂົ້າໃຈກ່ຽວກັບໂຄງປະກອບຂອງຜູ້ສະໝັກຮັບເລືອກຕັ້ງເປັນຜູ້ແທນໃນຊຸດນີ້, ເຫັນໄດ້ສິດ, ໜ້າທີ່ ແລະ ພັນທະຂອງພົນລະເມືອງໃນການໄປໃຊ້ສິດປ່ອນບັດເລືອກຕັ້ງ, ເຮັດໃຫ້ຜູ້ມີສິດເລືອກຕັ້ງໄດ້ຮູ້ ໄດ້ເຫັນຜູ້ສະໝັກຮັບເລືອກຕັ້ງ ແລະກໍາໄດ້ຊີວະປະຫວັດການເຄື່ອນໄຫວວຽກງານຂອງຜູ້ສະໝັກ ເພື່ອເປັນບ່ອນອິງໃນການເລືອກຕັ້ງເອົາສະມາຊິກສະພາແຫ່ງຊາດ ເຂົ້າມານັ່ງໃນສະພາ ແລະ ເປັນຕົວແທນໃຫ້ພໍ່ແມ່ປະຊາຊົນ, ທັງເປັນການເຮັດໃຫ້ຜູ້ສະໝັກຮັບເລືອກຕັ້ງ, ເຫັນໄດ້ຄວາມມຸ້ງມາດປາດຖະໜາສະພາບການພັດທະນາ, ກໍ່ຄືການດໍາລົງຊີວິດຂອງປະຊາຊົນບັນດາເຜົ່າ.

ຈາກນັ້ນຜູ້ສະໜັກຮັບເລືອກຕັ້ງສະມາຊິກສະພາແຫ່ງຊາດ ຍັງໄດ້ຮຽກຮ້ອງໃຫ້ຜູ້ມີສິດເລືອກຕັ້ງ ກໍ່ຄືປະຊາຊົນລາວບັນດາເຜົ່າ ຈົ່ງໄດ້ຮ່ວມຈິດຮ່ວມໃຈເຂົ້າຮ່ວມຂະບວນການເລືອກຕັ້ງໃນຄັງນີ້ ໃຫ້ກາຍເປັນປາງບຸນໃຫຍ່ຂອງຊາດ, ເລືອກໄດ້ຜູ້ສະໝັກທີ່ມີມາດຖານເງື່ອນໄຂ, ມີຄວາມຮູ້ຄວາມສາມາດ, ມີວິໃສທັດທີ່ກ້ວາງໄກ ເພື່ອມາເປັນຕົວແທນໃຫ້ປະຊາຊົນ ແລະ ນໍາພາປະຊາຊົນຫລຸດພົ້ນອອກຈາກຄວາມທຸກຍາກໄດ້ເທື່ອລະກ້າວ, ແລະ ດໍາເນີນໄປດ້ວຍບັນຍາກາດເບີກບານມ່ວນຊື່ນ, ມີປະຊາທິປະໄຕຖືກຕ້ອງຕາມກົດໝາຍ ແລະ ປະຕິບັດໃຫ້ໄດ້ 300% ຄື: ຜູ້ມີສິດປ່ອນບັດເລືອກຕັ້ງ ຕ້ອງຕື່ນຕົວສະໝັກໃຈໄປໃຊ້ສິດເລືອກຕັ້ງໃຫ້ໄດ້ 100%, ຮັບປະກັນບໍ່ໃຫ້ມີບັດຕາຍ 100%, ແຕ່ລະໜ່ວຍປ່ອນບັດ ແລະ ເຂດເລືອກຕັ້ງຕ້ອງຮັບປະກັນໃຫ້ມີຄວາມສະຫົງບ, ຄວາມປອດໄພໃນວັນເລືອກຕັ້ງໃຫ້ໄດ້ 100% ແລະຈົ່ງພ້ອມກັນໄປໃຊສິດປະຊາທິປະໄຕຂອງຕົນໃຫ້ໄດ້ໃນວັນທີ 21 ກຸມພາ 2021, ທົ່ວເມືອງຕະໂອ້ຍມີ 56 ບ້ານ, ແລະມີ 19 ໜ່ວຍປ່ອນບັດ ມີປະຊາກອນທັງໝົດ 35 ພັນກວ່າຄົນ, ຍິງ 18 ພັນກວ່າຄົນ, ໃນນັ້ນຜູ້ມີສິດປ່ອນບັດເລືອກຕັ້ງ 17 ພັນກວ່າຄົນ, ຍິງ 8 ພັນກວ່າຄົນ, ມີໜ້າປ່ອນບັດຕົວຈິງ 16 ພັນກວ່າຄົນ, ຍິງ 8 ພັນກວ່າຄົນ