ວັນທີ11ກຸມພາ2021 ໜ່ວຍພັກຄະນະກວດກາແຂວງ ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ 2 ສະຫາຍ, ຍິງ 1 ສະຫາຍ, ໂດຍການເຂົ້າຮ່ວມຂອງ ສະຫາຍ ວິຊຽນ ນະວິກຸນ ຄະນະປະຈຳພັກແຂວງ ປະທານຄະນະກວດກາພັກ-ລັດແຂວງ, ມີຄະນະໜ່ວຍພັກ, ຮອງປະທານຄະນະກວດກາແຂວງ ພ້ອມດ້ວຍແຂກທີ່ຖືກເຊີນ ແລະສະມາຊິກພັກເຂົ້າຮ່ວມ.

ສະມາຊິກພັກສຳຮອງ 2 ສະຫາຍ ແມ່ນໄດ້ຜ່ານການຕິດຕາມຢ່າງໃກ້ຊິດ ຈາກຄະນະໜ່ວຍພັກຄະນະກວດກາ, ຊຶ່ງຜູ້ກ່ຽວແມ່ນໄດ້ມີຄວາມຈູບຈ້າວ, ຫ້າວຫັນ, ບຸກບືນໃນການຝຶກຝົນ, ຫຼໍຫຼອມຕົນເອງ ໃນຂະບວນການປະຕິວັດຂອງມະຫາຊົນ, ມີຄວາມຕື່ນຕົວທາງດ້ານການເມືອງ, ແນວຄິດ, ການຈັດຕັ້ງປະຕິບັດລະບຽບຂອງພັກ, ກົດໝາຍຂອງລັດຢ່າງເຂັ້ມງວດ, ມີຄວາມສາມັກຄີພາຍໃນ ແລະນອກຢ່າງກວ້າງຂວາງ, ມີແບບແຜນວິທີເຮັດວຽກ, ສູ້ຊົນເຮັດສຳເລັດໜ້າທີ່ວຽກງານທີ່ໄດ້ຮັບການມອບໝາຍຈາກຂັ້ນເທິງສຳເລັດດ້ວຍຄວາມຮັບຜິດຊອບສູງ, ດັ່ງນັ້ນ ຄະນະໜ່ວຍພັກຈຶ່ງຈັດພິທີຮັບມະຫາຊົນກ້າວໜ້າ ເຂົ້າເປັນສະມາຊິກພັກສຳຮອງຢ່າງເປັນທາງການ.

ເພື່ອໃຫ້ຜູ້ກ່ຽວໄດ້ເຂົ້າມາສັງກັດຢູ່ອົງການຈັດຕັ້ງພັກ, ປະກອບສ່ວນເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ກໍ່ຄືກົມກອງ, ອົງການຈັດຕັ້ງຂອງຕົນໃຫ້ມີຄວາມໜັກແໜ້ນເຂັ້ມແຂງຂຶ້ນເລື້ອຍໆ. ຈາກນັ້ນໃນພິທີກໍ່ໄດ້ຮັບຟັງຄຳໂອ້ລົມຈາກ ສະຫາຍ ວິຊຽນ ນະວິກຸນ ຊຶ່ງກ່ອນອຶ່ນກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນ ຜົນງານທີ່ສະຫາຍສະມາຊິກພັກຍາດມາໄດ້ ພ້ອມທັງໄດ້ເນັ້ນບາງບັນຫາທີ່ສຳຄັນຄື: ສະມາຊິກພັກສົມບູນ-ສຳຮອງແຕ່ລະສະຫາຍ ຕ້ອງກຳໄດ້ຄວາມໝາຍຄວາມສຳຄັນຂອງທຸງພັກ, ທຸງຊາດ, ປະຕິບັດໃຫ້ໄດ້ 5 ໜ້າທີ່, 6 ສິດ ແລະ 9 ຂໍ້ຫ້າມ ຂອງສະມາຊິກພັກຢ່າງເຂັ້ມງວດ, ເອົາໃຈໃສ່ສຶກສາອົບຮົມການເມືອງແນວຄິດເປັນກົກ, ຍົກສູງຄວາມຮັບຜູ້ຊອບຊີ້ໆນຳພາທຸກວຽກງານທີີ່ໄດ້ຮັບມອບໝາຍ, ເປັນແບບຢ່າງນຳໜ້າໃຫ້ແກ່ມະຫາຊົນໃນການຈັດຕັ້ງປະຕິບັດທຸກໜ້າທີ່ໃຫ້ມີຜົນສຳເລັດ.