ວັນທີ 11 ກຸມພາ 2021 ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ຄະນະກຳມະການເລືອກຕັ້ງລະດັບຊາດ, ປະທານອະນຸກຳມະການໂຄສະນາ ແລະ ປຸກລະດົມຂະບວນການ ພ້ອມຄະນະ ໄດ້ລົງຕິດຕາມ ການໂຄສະນາ, ປຸກລະດົມຂະບວນການ ໃນບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ບ້ານຫ້ວຍສະເຫງົ້າເມືອງວັງວຽງແຂວງວຽງຈັນ. ໂດຍມີ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງ, ປະທານຄະນະກຳມະການເລືອກຕັ້ງ ແຂວງວຽງຈັນ, ທ່ານ ບຸນຈັນ ມາລາວົງ ກຳມະການພັກແຂວງ, ເລຂາພັກເມືອງ, ປະທານຄະນະກຳມະການເລືອກຕັ້ງເມືອງວັງວຽງ, ມີອຳນາດການປົກຄອງບ້ານ, ພ້ອມດ້ວຍພໍ່ແມ່ປະຊາຊົນບ້ານດັ່ງກ່າວເຂົ້າຮ່ວມ.

ກ່ອນອື່ນ ທ່ານ ປອ ບຸນທອງ ຈິດມະນີ ໄດ້ຮັບຟັງການລາຍງານສະພາບການກະກຽມໃຫ້ແກ່ບັ້ນເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຂອງບ້ານຫ້ວຍສະເຫງົ້າ ຈາກ ທ່ານ ນາງ ແຫຼວທອງ ຈະເລີນສຸກ ນາຍບ້ານ ບ້ານຫ້ວຍສະເຫງົ້າ ເຊິ່ງເປັນບ້ານໜຶ່ງທີ່ນອນຢູ່ໃນເທດສະບານເມືອງ ມີພົນລະເມືອງທັງໝົດ 2.507 ຄົນ, ມີ 489 ຄອບຄົວ, ມີ 37 ໜ່ວຍສາມັກຄີ, ມີຜູ້ມີສິດເລືອກຕັ້ງທັງໝົດ 1.425 ຄົນ, ຍິງ 767 ຄົນ ເພື່ອຮັບປະກັນ ແລະ ສ້າງຄວາມສະດວກໃຫ້ຜູ້ມາໃຊ້ສິດ ຄະນະຮັບຜິດຊອບເລືອກຕັ້ງຂັ້ນເມືອງໄດ້ແບ່ງອອກເປັນ 2 ໜ່ວຍເລືອກຕັ້ງ ຄື:ໜ່ວຍ ທີ 5 ແລະ ໜ່ວຍທີ 6 ຂອງເມືອງ, ຈາກນັ້ນໄດ້ແບ່ງເຂດ ແລະ ສະຖານທີ່ຈະເລືອກຕັ້ງ ໃນນັ້ນ ໜ່ວຍທີ 5 ແມ່ນກຳນົດເອົາ ຫ້ອງການບ້ານ ເປັນສະຖານທີ່ປ່ອນບັດ ເຊິ່ງກວມເອົາ 2 ຄຸ້ມໆໂພນແກ້ວ ແລະ ຄຸ້ມວຽງຊອງ ມີ 19 ໜ່ວຍສາມະຄີ ມີຜູ້ມີສິດປ່ອນບັດ 769 ຄົນ ຍິງ 415 ຄົນ, ໜ່ວຍທີ່ 6 ແມ່ນໄດ້ກຳນົດເອົາ ໂຮງຮຽນ ມໍປາຍ ວັງວຽງເປັນສະຖານທີ່ປ່ອນບັດ ເຊິ່ງກວມເອົາ 2 ຄຸ້ມ ຄືຄຸ້ມໂພນສະອາດ ແລະ ຄຸ້ມຕະຫລາດ ລວມມີ 18 ໜ່ວຍສາມະຄີ ມີຜູ້ມີສິດປ່ອນບັດທັງໝົດ 656 ຄົນ ຍິງ 352 ຄົນ. ປະຈຸບັນທັງ 2 ໜ່ວຍປ່ອນບັດແມ່ນມີຄວາມພ້ອມແລ້ວ 100% ແລະຮັບປະກັນໃຫ້ການເລືອກຕັ້ງບັນລຸ 300% ຕາມ 3 ຄາດໝາຍທີ່ວາງໄວ້.

ໂອກາດດຽວກັນ ທ່ານ ປອ ບຸນທອງ ຈິດມະນີ ກໍ່ໄດ້ມີຄຳເຫັນ ແລະ ຍົກໃຫ້ເຫັນເຖິງຄວາມໝາຍ, ຄວາມສຳຄັນແລະ ຮູບແບບ ຂອງການດຳເນີນການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ເພື່ອເຮັດໃຫ້ການເລືອກຕັ້ງຄັ້ງນີ້ໄດ້ຮັບຜົນສຳເລັດຕາມຄາດໝາຍ, ພ້ອມທັງເໜັ້ນໜັກໃຫ້ອຳນາດການປົກຄອງບ້ານ, ຄະຮັບຜິດຊອບໜ່ວຍເລືອກຕັ້ງ ແລະ ຫົວໜ້າຄອບຄົວຈົ່ງສືບຕໍ່ເປັນເຈົ້າການ, ນຳພາ, ຊຸຸກຍູ້, ປຸກລະດົມ ແລະ ເຕົ້າໂຮມຜູ້ທີ່ມີສິດປ່ອນບັດເລືອກຕັ້ງເຮັດໃຫ້ເຂົາເຈົ້າເຫັນຄວາມໝາຍ, ຄວາມສຳຄັນຂອງການເລືອກຕັ້ງ, ເຫັນເຖິງສິດປະຊາທິປະໄຕ, ພັນທະ ແລະ ກຽດສັກສີຂອງຕົນ ແລະແນະນຳໃຫ້ເຂົາເຈົ້າ ເຂົ້າໃຈລະອຽດກ່ຽວກັບລະບຽບຂອງການປ່ອນບັດເລືອກຕັ້ງ, ຮູ້ເຖິງປະຫວັດຂອງຜູ້ຮັບສະໝັກເລືອກຕັ້ງ, ໃຫ້ສືບຕໍ່ເອົາໃຈໃສ່ເພີ່ມທະວີວຽກງານປ້ອງກັນຄວາສະຫງົບ, ຄວາມປອດໄພ, ສືບຕໍ່ສ້າງ ແລະ ຍູ້ຂະບວນການຕ່າງໆຢ່າງຕໍ່ເນື່ອງ ເພື່ອຮັບປະກັນຕາມ 3 ຄາດໝາຍໃຫຍ່ຄື: ຮັບປະກັນໃຫ້ຜູ້ມີສິດ ໄດ້ຕື່ນຕົວ ແລະ ສະໝັກໃຈໄປປ່ອນບັດເລືອກຕັ້ງຢ່າງຄົບຖ້ວນ 100%, ຮັບປະກັນບໍ່ໃຫ້ມີບັດເສຍ ຫລື ບັດຂີດບໍ່ຖືກຕ້ອງ 100% ແລະ ຮັບປະກັນດ້ານຄວາມສະຫງົບ ຄວາມປອດໄພ ໃນບັ້ນເລືອກຕັ້ງ 100%