ໃນໂອກາດທີ່ ຜູ້ລົງສະໝັກຮັບເລືອກຕັ້ງ ສສຊ ແຂວງເຊກອງ ລົງຫາສຽງສະໜັບສະໜູນຢູ່ 3 ຈຸດຂອງ ເມືອງກະລຶມໃນລະຫວ່າງວັນທີ 9-11 ກຸມພາ ຜ່ານມາ ໂດຍຈຸດທີ 1 ໜ່ວຍເລືອກຕັ້ງບ້ານທົ່ງແຄນ, ຈຸດທີ 2 ໜ່ວຍເລືອກຕັ້ງບ້ານຕະນຶງ ແລະຈຸດທີ 3 ໜ່ວຍເລືອກຕັ້ງເທສະບານເມືອງ; ຫຼັງຈາກສໍາເລັດການຫາສຽງແລ້ວ, ກໍ່ໄດ້ເດີນທາງໄປຢື້ຢາມຖາມຂ່າວປະຊາຊົນບ້ານອາຣອງ ເມືອງກະລຶມ ທີ່ໄດ້ຍົກຍ້າຍບ້ານ ມາຕັ້ງຖິ່ນຖານໃໝ່ຢູ່ເຂດຫ້ວຍປຶງ ເມື່ອຕົ້ນເດືອນມັງກອນ ຜ່ານມາ.

ໂອກາດນີ້, ທ່ານ ດົງເພັດ ພະຍົນ ຮອງເລຂາພັກແຂວງ, ຮອງປະທານສະພາປະຊາຊົນແຂວງ, ຜູ້ລົງສະໝັກຮັບເລືອກຕັ້ງສະມາຊິກສະພາແຫ່ງຊາດ ເຂດເລືອກຕັ້ງທີ 16 ແຂວງເຊກອງ ນໍ້າເບີ 1 ກໍໄດ້ຕ່າງໜ້າຄະນະ ແລະ ຕ່າງໜ້າໃຫ້ອໍານາດການປົກຄອງແຂວງ ກ່າວສະແດງຄວາມເປັນຫ່ວງເປັນໄຍຕໍ່ປະຊາຊົນ ພ້ອມເນັ້ນໜັກວ່າ: ພັກ-ລັດ ກໍ່ຄືອໍານາດການປົກຄອງແຂວງເຊກອງ ແລະເມືອງກະລຶມ ບໍ່ໄດ້ລົດລະຄວາມພະຍາຍາມ ຊອກທຸກເງື່ອນໄຂ ເພື່ອຊ່ວຍເຫຼືອປະຊາຊົນໃຫ້ມີທີ່ຢູ່ອາໃສໝັ້ນຄົງຖາວອນ ມີທີ່ທໍາມາຫາກິນ ເພາະສະນັ້ນ, ຂໍໃຫ້ປະຊາຊົນບັນດາເຜົ່າບ້ານອາຣອງ ຈົ່ງເຊື່ອໝັ້ນຕໍ່ການ

ນໍາພາຂອງພັກ-ລັດພວກເຮົາ ແລະຈົ່ງອົດທົນ ສູ້ຊົນຜ່ານມາຄວາມຫຍຸ້ງຍາກໄປນໍາກັນ ເພື່ອອານາຄົດທີ່ດີໃນຂ້າງໜ້າ ຈາກນັ້ນ, ກໍໄດ້ມອບເຂົ້າສານໜຽວຈໍານວນໜຶ່ງໃຫ້ປະຊາຊົນ ໂດຍກ່າວຮັບແມ່ນນາຍບ້ານ-ບ້ານອາຣອງ.