ທ່ານ ຄຳໃບ ດຳລັດ ຮອງປະທານສູນກາງແນວລາວສ້າງຊາດ, ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 12 ແຂວງຄຳມ່ວນ ນໍ້າເບີ 01 ໄດ້ກ່າວສະແດງຄວາມຮູ້ສຶກຜ່ານສື່ມວນຊົນຂອງແຂວງ ໃນໂອກາດທີ່ເຄື່ອນໄຫວພົບປະກັບປະຊາຊົນກໍ່ຄືຜູ້ມີສິດປ່ອນບັດເລືອກຕັ້ງ ເຊິ່ງທ່ານໄດ້ກ່າວວ່າ: ສຳລັບຄະນະຜູ້ສະໝັກທີ່ມາຈາກສູນກາງມີ 4 ທ່ານ, ທ້ອງຖິ່ນ 8 ທ່ານ ລວມເປັນ 12 ທ່ານ. ເຊິ່ງໄດ້ເລີ່ມເຄື່ອນໄຫວແຕ່ວັນທີ 8 ກຸມພາ ເປັນຕົ້ນມາ ໂດຍເລີ່ມຈາກເຄື່ອນໄຫວເຮັດວຽກຢູ່ອ້ອມຂ້າງແຂວງ ຈາກນັ້ນນັບແຕ່ວັນທີ 10 ກຸມພາແມ່ນໄດ້ເຄື່ອນໄຫວຢູ່ເມືອງ ຜ່ານການຈັດຕັ້ງປະຕິບັດລົງແຕ່ລະບ່ອນກໍ່ເຫັນໄດ້ວ່າປະຊາຊົນມີຄວາມດີອົກດີໃຈໃຫ້ການຕ້ອນຮັບຢ່າງອົບອຸ່ນດ້ວຍຄວາມສາມັກຄີຮັກແພງ, ດ້ວຍຄວາມຈິງໃຈ. ເຊິ່ງບັນດາຜູ້ສະໝັກຮັບເລືອກຕັ້ງພວກເຮົາກໍ່ໄດ້ເວົ້າແບບສະນິດສະໝົມກັບປະຊາຊົນ ແລະ ຍົກໃຫ້ເຫັນເຖິງຄວາມໝາຍຄວາມສຳຄັນຂອງການເລືອກຕັ້ງ, ບົດບາດຂອງສະພາ, ໜ້າທີຂອງ ສສຊ, ສສຂ ມີຄືແນວໃດ ປະຊາຊົນໄດ້ມີຄວາມຮັບຮູ້ເຂົ້າໃຈ ແລະ ກໍ່ມີຄວາມເບີກບານມ່ວນຊື່ນ, ສະແດງອອກໃນການລົງເຄື່ອນໄຫວແຕ່ລະບ່ອນ, ແຕ່ລະຈຸດ, ກໍ່ໄດ້ມີຄວາມອົບອຸ່ນແບບຄອບຄົວດຽວກັນ, ຖ້າຂ້າພະເຈົ້າພ້ອມຄະນະໄດ້ຮັບການເລືອກເປັນ ສສຊ ປະຈໍາແຂວງຄໍາມ່ວນແລ້ວ ຂ້າພະເຈົ້າພ້ອມຄະນະຈະນຳເອົາເນື້ອໃນຈິດໃຈ, ຄໍາຄິດຄໍາເຫັນຂອງປະຊາຊົນ ເພື່ອນໍາສະເໜີຕໍ່ກອງປະຊຸມ ເພື່ອພິຈາລະນາຕາມເຫດຕາມຜົນ, ຕາມລະບຽບກົດໝາຍ ແລະ ຈະນໍາເອົາມະຕິກອງປະຊຸມສະພາແຕ່ລະຄັ້ງ, ແນວທາງນະໂຍບາຍຂອງພັກ – ລັດ ຕິດພັນກັບຂະບວນການຂອງປະຊາຊົນບັນດາເຜົ່າເຮັດໃຫ້ໃຫ້ປະຊາຊົນມີຄວາມຮັບຮູ້ ເຂົ້າໃຈ ປະຊາຊົນມີຄວາມຕື່ນຕົວໃນການຈັດຕັ້ງປະຕິບັດ. ນອກຈາກນີ້ແຕ່ລະໄລຍະຄະນະຜູ້ແທນຈະໄດ້ລົງໃກ້ສິດຕິດແທດກັບປະຊາຊົນບັນດາເຜົ່າ ໂດຍສະເພາະປະຊາຊົນເຂດຊົນນະບົດ ເຂດພູດອຍ ເພື່ອເຫັນໄດ້ສະພາບຄວາມເປັນຈິງຂອງປະຊາຊົນ ເປັນແນວໃດ ເພື່ອຈະໄດ້ມີການຄົ້ນຄວ້ານຳສະເໜີຕໍ່ຂັ້ນເທິງ ເພຶ່ອຊຸກຍູ້ຊ່ວຍເຫລືອປະຊາຊົນ ເຮັດໃຫ້ຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນຕາມແນວທາງນະໂຍບາຍຂອງພັກ-ລັດວາງອອກໃນແຕ່ລະໄລຍະ