ຕອນເຊົ້າວັນທີ 12 ກຸມພາ 2021 ນີ້ ຜູ້ສະໝັກເລືອກຕັ້ງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ຈຳນວນ 25 ທ່ານໄດ້ສືບຕໍ່ພົບປະໂຄສະນາຫາສຽງກັບຜູ້ມີສິດເລືອກຕັ້ງທີ່ເມືອງນອງ ນຳໂດຍ ທ່ານ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ມີທ່ານ ສຸກສາຄອນ ໂພທິລາດ ຮອງເລຂາພັກເມືອງໆນອງ,ບັນດາຫົວໜ້າຫ້ອງການ ພ້ອມດ້ວຍຜູ້ມີສິດເລືອກຕັ້ງພາຍໃນເມືອງເຂົ້າຮ່ວມ. ໃນໂອກາດດຽວກັນນີ້ ທ່ານ ສຸກສາຄອນ ໂພທິລາດ ຮອງເລຂາພັກເມືອງໆນອງ ກໍ່ໄດ້ລາຍງານໂດຍຫຍໍ້ ກ່ຽວກັບການຫ້າງຫາກະກຽມໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ໃຫ້ຮູ້ວ່າ: ທົ່ວເມືອງນອງມີໜ່ວຍປ່ອນບັດເລືອກຕັ້ງ ຈຳນວນ 38 ໜ່ວຍ,ມີພົນລະເມືອງ 33.718 ຄົນ,ຍິງ 16.504 ຄົນ,ຜູ້ທີ່ມີອາຍຸແຕ່ 18 ປີຂຶ້ນໄປຈຳນວນ 16.408 ຄົນ,ຍິງ 8.320 ຄົນ.ມາຮອດປັດຈຸບັນເມືອງນອງແມ່ນມີຄວາມພ້ອມໃຫ້ແກ່ບັ້ນເລືອກຕັ້ງແລ້ວ 100%.

ຈາກນັ້ນທ່ານ ຈິນດາວັນ ບຸດລາສີ ແລະ ທ່ານ ສຸດໃຈ ໄຊຍະວົງ ກໍ່ໄດ້ຜັດປ່ຽນກັນ ນຳສະເໜີລາຍຊື່ ແລະ ປະຫວັດການເຄື່ອນໄຫວຂອງຜູ້ສະໝັກເລືອກຕັ້ງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ຈຳນວນ 25 ທ່ານ,ຍິງ 7 ທ່ານ ແລະ ຜູ້ສະໝັກເລືອກຕັ້ງເປັນສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນອງຈຳນວນ 5 ທ່ານ,ຍິງ 1 ໃຫ້ກັບຜູ້ມີສິດເລືອກຕັ້ງໄດ້ຮັບຮູ້. ພ້ອມທັງແນະນຳວິທີການເລືອກເອົາ ແລະ ຂີດອອກ ສຳລັບສະມາຊິກສະພາແຫ່ງຊາດແມ່ນໃຫ້ເລືອກເອົາ 20 ທ່ານ,ຂີດອອກ 5 ທ່ານ,ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນອງໃຫ້ເລືອກເອົາ 3 ທ່ານ,ຂີດອອກ 2ທ່ານ.

ໃນໂອກາດເຄື່ອນໄຫວໂຄສະນາຫາສຽງທີ່ເມືອງນອງຄັ້ງນີ້ ທ່ານ ນາງ ຫົງຄຳ ໄຊຍະຄົມ ຜູ້ສະໝັກເລືອກຕັ້ງສະມາຊິກສະພາແຫ່ງຊາດນ້ຳເບີ 20 ແລະ ທ່ານ ສະແຫວງ ນັນທະວົງ ຜູ້ສະໝັກເລືອກຕັ້ງສະມາຊິກສະພາແຫ່ງຊາດນ້ຳເບີ 8 ກໍ່ໄດ້ຕາງໜ້າໃຫ້ຜູ້ຮັບສະໝັກເລືອກຕັ້ງທັງ 25 ທ່ານມີຄຳເຫັນວ່າ: ສະພາແຫ່ງຊາດຊຸດທີ VIII ໃນການປະຕິບັດໜ້າທີ່ຕະຫຼອດໄລຍະ 5 ປີຜ່ານມາສາມາດຮັບຮອງກົດໝາຍໄດ້ 90 ສະບັບ ແລະສ້າງໃໝ່ໄດ້ 38 ສະບັບ ແລະສາມາດຕົກລົງແກ້ໄຂບັນຫາສໍາຄັນໄດ້ອີກຫຼາຍບັນຫາ. ນີ້ກໍ່ສະແດງໃຫ້ເຫັນແລ້ວວ່າສະພາແຫ່ງຊາດໃນຊຸດຜ່ານສາມາດປະຕິບັດວຽກງານແກ້ໄຂບັນຫາຂອງປະເທດກໍ່ຄືປະຊາຊົນລາວບັນດາເຜົ່າໃຫ້ມີຊີວິດການເປັນຢູ່ດີຂຶ້ນ.

ແຕ່ເຖິງຢ່າງໃດກໍ່ຕາມເມື່ອຄົບວາລະການປະຕິບັດວຽກງານຂອງສະມາຊິກສະພາແຫ່ງຊາດຊຸດທີ VIII ກໍ່ຕ້ອງໄດ້ມີການເລືອກຕັ້ງເອົາສະມາຊິກສະພາແຫ່ງຊາດຊຸດໃໝ່ກໍ່ຄືຊຸດທີ IX ທີ່ຈະມາເຖິງໃນວັນທີ 21 ກຸມພາ 2021 ນີ້, ໂດຍຜູ້ຮັບສະໝັກເລືອກຕັ້ງປະກອບມີ 25 ທ່ານ, ໃນນີ້ໃຫ້ເລືອກເອົາ 20 ທ່ານ, ໂດຍເລືອກເອົາຜູ້ທີ່ທ່ານມັກຮັກ ເພື່ອເປັນຕົວແທນຂອງທ່ານກໍ່ຄືປະຊາຊົນໃນການແກ້ໄຂບັນຫາ. ເຊິ່ງຜູ້ທີ່ຮັບສະໝັກເລືອກຕັ້ງທັງ 25 ທ່ານນີ້ ລ້ວນແລ້ວແຕ່ແມ່ນຜູ້ທີ່ມີມາດຖານເງື່ອນໄຂຄົບຖ້ວນ ໂດຍຜ່ານການຄັດເລືອກຂອງຄະນະຮັບຜິດຊອບຢ່າງລະອຽດຖີ່ຖ້ວນ. ສໍາລັບຂ້າພະເຈົ້ານີ້ກໍ່ເປັນ 1 ໃນ 25 ທ່ານ ທີ່ໄດ້ລົງຮັບສະໝັກເລືອກຕັ້ງ, ຖ້າເປັນຜູ້ໂຊກດີໄດ້ຮັບຄວາມໄວ້ວາງໃຈ, ຄວາມເຊື່ອໝັ້ນຈາກຜູ້ມີສິດເລືອກຕັ້ງ ແມ່ນພ້ອມແລ້ວທີ່ຈະຮັບໃຊ້ປະຊາຊົນດ້ວຍຄວາມຈິງໃຈ ແລະກໍຈະໃຊ້ຄວາມຮູ້,ຄວາມສາມາດທີ່ມີ ປະຕິບັດໜ້າທີ່ຢ່າງພາວະວິໄສດ້ວຍຄວາມຮັບຜິດຊອບສູງເປັນຕົວແທນທີ່ດີຂອງປະຊາຊົນລາວບັນດາເຜົ່າຢ່າງແນ່ນອນ