ພິທີເປີດຂະບວນການແຂ່ງຂັນ 5 ເປັນເຈົ້າ ຂອງກຳມະບານຮາກຖານພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຄຳມ່ວນ ແມ່ນໄດ້ຈັດຂຶ້ນໃນວັນທີ 11 ກຸມພາ 2021 ໂດຍການເປັນກຽດເຂົ້າຮ່ວມມີທ່ານ ແກ້ວວິໄລ ໄຊຍະທິລາດ ຮອງປະທານສະຫະພັນກຳມະບານແຂວງຄຳມ່ວນ, ທ່ານ ສົມສັກດາ ແກ້ວມະນີ ຄະນະພັກ ຮາກຖານ, ຜູ້ຊີ້ນຳວຽກງານອົງການຈັດຕັ້ງມະຫາຊົນ ພະແນກ ຖວທ ແຂວງ, ມີບັນດາທ່ານໃນຄະນະຮາກຖານ ກຳມະບານພະແນກ, ບັນດາອົງການຈັດຕັ້ງອ້ອມຂ້າງ ຕະຫຼອດເຖິງສະມາຊິກກຳມະບານພາຍໃນຮາກຖານດັ່ງກ່າວ ເຂົ້າຮ່ວມ.

ທ່ານ ສົມກຽດ ພິເນດ ປະທານກຳມະບານຮາກຖານພະແນກ ຖວທ ແຂວງ ໄດ້ຂຶ້ນຜ່ານກ່ຽວກັບ ເນື້ອໃນ ຂໍ້ແຂ່ງຂັນ 5 ເປັນເຈົ້າ ຂອງກຳມະບານຮາກຖານພະແນກ ຖວທ ແຂວງ ປະຈຳປີ 2021 ໂດຍສະເພາະ ທາງດ້ານ ວຽກງານການໂຄສະນາສຶກສາອົບຮົມການເມືອງ-ແນວຄິດ ແມ່ນໄດ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ ພະນັກງານ ສະມາຊິກກຳມະບານ ໂດຍສະເພາະແມ່ນການຈັດຕັ້ງເຊື່ອມຊຶມແນວທາງຂອງພັກ ແລະ ໂຄສະນາເຜີຍແຜ່ ເລົ່າມູນເຊື້ອວັນສຳຄັນຕ່າງໆຂອງຊາດ, ວັນສ້າງຕັ້ງກຳມະບານລາວ ແລະ ວັນກຳມະກອນສາກົນ, ເປັນເຈົ້າໃນການປັບປຸງ ແບບແຜນການນຳພາ ແລະ ຂະຫຍາຍການຈັດຕັ້ງກຳມະບານ ສືບຕໍ່ປຸກລະດົມ, ຊຸກຍູ້ ແລະ ເຂົ້າຮ່ວມທຸກຂະບວນການ ຂອງພັກ-ລັດ, ສືບຕໍ່ຊີ້ນຳ-ນຳພາສ້າງຂະບວນການຕ່າງໆໃຫ້ຫຼາຍຂຶ້ນ ແລະ ເປັນຂະບວນ ການຟົດຟື້ນກວ່າເກົ່າ, ຕິດຕາມ, ກວດກາ ແລະ ຊຸກຍູ້ຂະບວນການແຂ່ງຂັນ 5 ເປັນເຈົ້າ ພ້ອມທັງສະຫຼຸບລາຍງານ ຕໍ່ຂັ້ນເທິງຕາມກຳນົດເວລາ, ເອົາໃຈໃສ່ ເຂົ້າຮ່ວມປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກ ກຳມະບານ, ແຮງງານໃນຂົງເຂດການບໍລິການ ແລະ ອື່ນໆທີ່ຄຸ້ມຄອງໂດຍພະແນກ ຖວທ ແຂວງ ໃຫ້ໄດ້ຮັບຄວາມ ເປັນທຳ, ຊຸກຍູ້ ແລະ ສືບຕໍ່ຂະຫຍາຍສະມາຊິກ ກອງທຶນບັນເທົາທຸກ ແລະ ກອງທຶນອື່ນໆທີ່ຮາກຖານໄດ້ສ້າງຂຶ້ນ, ຊຸກຍູ້, ສົ່ງເສີມໃຫ້ສະມາຊິກກຳມະບານໄດ້ເຂົ້າຮ່ວມ ແລກປ່ຽນບົດຮຽນ ຢູ່ພາຍໃນ ແລະ ຕ່າງປະເທດໃຫ້ຫຼາຍຂຶ້ນ.

ສຳລັບທາງດ້ານວຽກງານວິຊາສະເພາະກໍ່ຈະໄດ້ຊຸກຍູ້ ໃຫ້ສະມາຊິກກຳມະບານໃນແຕ່ລະຂະແໜງການ ຈັດຕັ້ງປະຕິບັດ ໜ້າທີ່ວຽກງານຂອງຕົນ ໃຫ້ຮັບປະກັນໄດ້ທັງດ້ານປະລິ ມານ ແລະ ຄຸນນະພາບ ໂດຍມີການກວດກາ, ຕິດຕາມ ແລະ ສະຫຼຸບລາຍງານງານເປັນແຕ່ລະໄລຍະ. ໂອກາດຽວກັນ ບັນດາໜ່ວຍກຳມະບານອ້ອມຂ້າງກໍ່ໄດ້ຂຶ້ນຈັບມືກັນ ເພື່ອພ້ອມ ກັນນຳເອົາບັນດາເນື້ອໃນແຂ່ງຂັນດັ່ງກ່າວ ໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ສຳເລັດຕາມຄາດໝາຍທີ່ວາງໄວ້.