ໃນຕອນແລງຂອງວັນທີ12 ກຸມພາ 2021 ນີ້ ໄດ້ມີພິທີມອບຮັບໜ້າທີ່ ລະຫວ່າງປະທານແນວລາວສ້າງຊາດແຂວງຊຽງຂວາງ(ຜູ້ເກົ່າ)ທ່ານ ດຳດີ ນັນທະວົງ ແລະ (ຜູ້ໃໝ່) ທ່ານ ນາງ ບົວສີ ນາຖາວົງ ອາດີດ ຫົວໜ້າໂຮງຮຽນການເມືອງ-ການປົກຄອງແຂວງຊຽງຂວາງ ຂື້ນຢ່າງເປັນທາງການ. ຢູ່ທີ່ຫ້ອງປະຊຸມຊັ້ນ3 ຫ້ອງວ່າການແຂວງຊຽງຂວາງ. ໂດຍເປັນກຽດເຂົ້າຮ່ວມຂອງທ່ານ ໜໍບີຫາ ຕົ່ງປາວ ຮອງເລຂາພັກແແຂວງຊຽງຂວາງ, ມີທ່ານ ນາງ ພວງພະຈັນ ມູນທະວົງ ກຳມະການພັກແຂວງ ຮອງຫົວໜ້າຄະນະຈັດຕັ້ງແຂວງ, ມີບັນດາຫົວໜ້າ-ຮອງຫົວໜ້າພະແນກການອ້ອມຂ້າງ, ມີປະທານ-ຮອງປະທານແນວລາວສ້າງຊາດ ບັນດາເມືອງທັງ 7 ເມືອງຕະຫຼອດຮອດພະນັກງານວິຊາການແນວລາວສ້າງຊາດແຂວງຊຽງຂວາງເຂົ້າຮ່ວມ.

ໃນພິທີທ່ານ ນາງ ພວງພະຈັນ ມູນທະວົງ ກຳມະການພັກແຂວງ ຮອງຫົວໜ້າຄະນະຈັດຕັ້ງແຂວງ, ໄດ້ຂື້ນຜ່ານມະຕິຕົກລົງເລກທີ 291/ຄລສພ ລົງວັນທີ 18 ທັນວາ 2020 , ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອູດໜູນບຳນານ. ຫຼັງຈາກນັ້ນ, ໃນພິທີຍັງໄດ້ຮັບຟັງການສະຫຼຸບລາຍງານ ການຈັດຕັ້ງປະຕິບັດວຽກງານໃນຂົງເຂດແນວລາວສ້າງຊາດແຂວງໃນໄລຍະຜ່ານມາໂດຍຫຍໍ້ ຈາກທ່ານ ດຳດີ ນັນທະວົງ, ອະດີດກຳມະການພັກແຂວງ ປະທານແນວລາວສ້າງຊາດແຂວງ (ຜູ້ເກົ່າ) ໃຫ້ທີ່ປະຊຸມໄດ້ຮັບຊາບ. ຈາກນັ້ນໄດ້ມີພິທີເຊັນມອບ-ຮັບໜ້າຢ່າງເປັນທາງການ, ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມໃຫ້ຄຳຄິດເຫັນຈາກທ່ານ ຮອງເລຂາພັກແຂວງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຊີ້ນຳ-ນຳພາ ຂອງປະທານແນວລາວສ້າງຊາດຜູ້ເກົ່າ ຕະຫຼອດໄລຍະທີ່ຜ່ານມາທີ່ໄດ້ປະຕິບັດສຳເລັດໃນຫຼາຍດ້ານ. ພ້ອມນັ້ນ, ທ່ານຍັງໄດ້້ຮຽກຮ້ອງໃຫ້ປະທານແນວລາວສ້າງຊາດຜູ້ໃໝ່ຈົ່ງສືບຕໍ່ຊີ້ນຳ-ນຳພາເຮັດໜ້າທີ່ວຽກງານທີ່ພັກ-ລັດມອບໝາຍສຳເລັດຜົນ, ສືບຕໍ່ກໍ່ສ້າງພະນັກງານການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າໃນທົ່ວປວງຊົນ, ມີຄວາມໜັກແໜ້ນທາງດ້ານການເມືອງແນວຄິດ, ພ້ອມກັນສ້າງສາ ແລະພັດທະນາປະເທດຊາດກໍ່ຄືຂົງເຂດວຽກງານແນວລາວສ້າງຊາດໃຫ້ມີຄວາມກ້າວໜ້າຍີ່ງໆຂື້ນ.