ໃນຕອນເຊົ້າວັນທີ 12 ກຸມພາ ນີ້ ຂະບວນຜູ້ລົງສະໝັກຮັບເລືອກຕັ້ງ ສສຊ ຊຸດທີ ປະຈໍາ ເຂດເລືອກຕັ້ງທີ 16 ແຂວງເຊກອງ ໄດ້ສືບຕໍ່ເຄື່ອນໄຫວສະເໜີຕົວ ຢູ່ໜ່ວຍປ່ອນບັດເລືອກຕັ້ງບ້ານຊຽງຫຼວງ ເມືອງດາກຈຶງ ແຂວງເຊກອງ, ໂດຍເປັນຈຸດທໍາອິດຂອງເມືອງດາກຈຶງແລະເປັນຈຸດທີ 4ຂອງແຂວງ, ເຊິ່ງນໍາພາຂະບວນໂດຍ ທ່ານເຫຼັກໄຫຼ ສີວິໄລ ເລຂາພັກແຂວງ, ເຈົ້າແຂວງເຊກອງ, ປະທານຄະນະກຳມະການເລືອກຕັ້ງຂັ້ນແຂວງ, ມີຄະນະກຳມະການເລືອກຕັ້ງຂັ້ນເມືອງ ພ້ອມດ້ວຍນັກຮຽນ ແລະປະຊາຊົນ ຜູ້ມີສິດປ່ອນບັດຂອງໜ່ວຍເລືອກຕັ້ງບ້ານຊຽງຫຼວງ, ບ້ານດາກເຊງ ແລະບ້ານດາກເຕຼິບ ໃຫ້ການຕ້ອນຮັບ.

ຈາກນັ້ນ, ບັນດາຜູ້ລົງສະໝັກຮັບເລືອກຕັ້ງ ສສຊ ໄດ້ສະເໜີຊື່ ແລະກ່າວເຖິງຜົນງານຂອງຕົນໃນໄລຍະຜ່ານມາ ເພື່ອຂໍຄະແນນສະໜັບສະໜູນຈາກຜູ້ມີສິດປ່ອນບັດເລືອກຕັ້ງ, ຊຶ່ງແຕ່ລະທ່ານ ຕ່າງກໍມີກົນລະຍຸດຂອງໃຜລາວ ໃນການຂໍຄະແນນສຽງສະໜັບສະໜູນຈາກຜູ້ມີສິດປ່ອນບັດໜ່ວຍເລືອກຕັ້ງບ້ານຊຽງຫຼວງ ຈໍານວນ 799 ຄົນ, ຍິງ 407 ຄົນ; ພ້ອມນີ້ ກໍໄດ້ມີການມອບເຂົ້າສານໜຽວ 1 ໂຕນ, ຜ້າຫົ່ມ, ເສືອກັນໜາວ ຈໍານວນໜຶ່ງ ໃຫ້ປະຊາຊົນໜ່ວຍເລືອກຕັ້ງບ້ານຊຽງຫຼວງ ຕື່ມອີກ, ເຊິ່ງມອບໂດຍທ່ານ ເຫຼັກໄຫຼ ສີວິໄລ ແລະຮັບໂດຍອໍານາດການປົກຄອງບ້ານ ທີ່ຕາງໜ້າໃຫ້ປະຊາຊົນ.
ໂດຍ:ພຸດທະສອນ