ວັນທີ 12 ກຸມພາ 2021 ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ຮອງຄະນະກຳມະການເລືອກຕັ້ງລະດັບຊາດ, ຫົວໜ້າອະນຸກຳມະການໂຄສະນາ ແລະ ປຸກລະດົມຂະບວນການ ພ້ອມຄະນະ ໄດ້ລົງຕິດຕາມ ການໂຄສະນາ, ປຸກລະດົມຂະບວນການ ໃນບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ເມືອງຫີນເຫີບ ແຂວງວຽງຈັນ. ໂດຍມີ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ,ເຈົ້າແຂວງ,ປະທານຄະນະກຳມະການເລືອກຕັ້ງແຂວງວຽງຈັນ, ທ່ານ ວອນ ວໍລະສານ ກຳມະການພັກແຂວງ, ເລຂາພັກເມືອງ,ເຈົ້າເມືອງ,ປະທານຄະນະກຳມະການເລືອກຕັ້ງເມືອງຫີນເຫີບ,ພ້ອມດ້ວຍບັນດາທ່ານໃນອະນຸກຳມະການ ແລະ ຄະນະຮັບຜິດຊອບບັ້ນເລືອກຕັ້ງຂອງແຂວງ,ຂອງເມືອງ,ຂອງບ້ານ,ພະນັກງານຫັຼກແຫຼ່ງເຂົ້າຮ່ວມ.

ກ່ອນອື່ນ ທ່ານໄດ້ຮັບຟັງການລາຍງານຫຍໍ້ກ່ຽວກັບການກະກຽມຄວາມພ້ອມວຽກງານຮອບດ້ານໃຫ້ແກ່ບັ້ນບັ້ນເລືອກຕັ້ງຄັ້ງນີ້ ຈາກ ທ່ານ ວອນ ວໍລະສານ ເຈົ້າເມືອງຫີນເຫີບ ປະຈຸບັນເມືອງຫີນເຫີບໄດ້ມີການກຽມພ້ອມແລ້ວຫຼາຍດ້ານເປັນຕົ້ນແມ່ນດ້ານນິຕິກຳ, ການແບ່ງຄວາມຮັບຜິດຊອບໃຫ້ອານຸກຳມະການແຕ່ລະດ້ານ, ສຳເລັດການກຳນົດໜ່ວຍເລືອກຕັ້ງ, ການເກັບກຳຂໍ້ມູນຜູ້ມີສິດປ່ອນບັດເລືອກຕັ້ງ, ທົ່ວເມືອງມີໜ່ວຍປ່ອນບັດເລືອກຕັ້ງທັງໝົດ 35 ໜ່ວຍ, ໜ່ວຍເຄື່ອນທີ່ມີ 13 ໜ່ວຍ, ມີຜູ້ມີສິດປ່ອນບັດເລືອກຕັ້ງທັງໝົດ 20.767 ຄົນ,ຍິງ 9.898 ຄົນ ແລະ ມີຜູ້ສະໝັກຮັບເລືອກຕັ້ງ ສສຂ ປະຈຳເມືອງຫີນເຫີບມີ 4 ທ່ານ, ຍິງ 1 ທ່ານ, ເລືອກເອົາ 2 ທ່ານ ແລະ ໄດ້ຮັບຟັງການລາຍງານຫຍໍ້ກ່ຽວກັບການກະກຽມຄວາມພ້ອມວຽກງານຮອບດ້ານໃຫ້ແກ່ບັ້ນບັ້ນເລືອກຕັ້ງ ຂອງແຕ່ລະບ້ານ ຈາກເລຂາພັກບ້ານ, ນາຍບ້ານຈຳນວນໜຶ່ງ, ຫຼັງຈາກນັ້ນທ່ານເຈົ້າແຂວງ ກໍ່ໄດ້ມີຄຳເຫັນຊີ້ນຳບາງບັນຫາຕໍ່ເມືອງ ແລະ ບ້ານ ທີ່ເປັນພື້ນຖານໃຫ້ແກ່ບັ້ນເລືອກຕັ້ງຄັ້ງນີ້.

ໂອກາດດຽວກັນນີ້ ທ່ານ ປອ ບຸນທອງ ຈິດມະນີ ກໍ່ໄດ້ມີຄຳເຫັນ ແລະ ຍົກໃຫ້ເຫັນເຖິງຄວາມໝາຍ, ຄວາມສຳຄັນແລະ ຮູບແບບ ຂອງການດຳເນີນການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II, ພ້ອມທັງເໜັ້ນໜັກໃຫ້ເມືອງແລະ ບ້ານ ກວດກາຄືນວຽກງານທຸກດ້ານຂອງການເລືອກຕັ້ງ, ຈົ່ງສືບຕໍ່ເປັນເຈົ້າການ, ນຳພາ, ຊຸຸກຍູ້, ປຸກລະດົມ ແລະ ເຕົ້າໂຮມຜູ້ທີ່ມີສິດປ່ອນບັດເລືອກຕັ້ງເຮັດໃຫ້ເຂົາເຈົ້າເຫັນຄວາມໝາຍ, ຄວາມສຳຄັນຂອງການເລືອກຕັ້ງ, ເຫັນເຖິງສິດປະຊາທິປະໄຕ, ພັນທະ ແລະ ກຽດສັກສີຂອງຕົນ ແລະ ແນະນຳໃຫ້ເຂົາເຈົ້າ ເຂົ້າໃຈລະອຽດກ່ຽວກັບລະບຽບຂອງການປ່ອນບັດເລືອກຕັ້ງ, ໂພສະນາການສາລິລະວິທະຍາ, ແນະນຳປະຫວັດຂອງຜູ້ຮັບສະໝັກເລືອກຕັ້ງໃຫ້ທົ່ວເຖິງ, ເລິກເຊິ່ງທຸກບ້ານ, ທຸກເຂດ, ໃຫ້ສືບຕໍ່ເອົາໃຈໃສ່ເພີ່ມທະວີວຽກງານປ້ອງກັນຊາດ,ປ້ອງກັນຄວາສະຫງົບ, ຄວາມປອດໄພ, ສືບຕໍ່ສ້າງ ແລະ ຍູ້ຂະບວນການຕ່າງໆຢ່າງຕໍ່ເນື່ອງ ເພື່ອຮັບປະກັນຕາມ 3 ຄາດໝາຍໃຫຍ່ຄື: ຮັບປະກັນໃຫ້ຜູ້ມີສິດ ໄດ້ຕື່ນຕົວ ແລະ ສະໝັກໃຈໄປປ່ອນບັດເລືອກຕັ້ງຢ່າງຄົບຖ້ວນ 100%, ຮັບປະກັນບໍ່ໃຫ້ມີບັດເສຍ ຫລື ບັດຂີດບໍ່ຖືກຕ້ອງ 100% ແລະ ຮັບປະກັນດ້ານຄວາມສະຫງົບ ຄວາມປອດໄພ ໃນບັ້ນເລືອກຕັ້ງ 100%.